1 Tesaloniki 4 - ZE'ELEGO PAALEGA

Vom sebo n tigeri Yinɛ nini

¹ Ba'ahegɔ puan, n suurɔ, tu yeti ya mɛ gee ka'ana ya Daana Yezu puan ti, wuu yan zamehɛ tu zi'an, yan wan vɔna se'em tigɛ Yinɛ nini la, (wuu yelemɛŋerɛ, yan pun ita se'em wa la), malum iŋɛ ya bala paaɛ paaɛ.

² Se'ere en sɔi la, ya mi' pa'alegɔ seko ti tu dikɛ bo' ya doohe Daana Yezu puan la.

³ Ŋwana en de Yinɛ sumboolum, ti ya sukɛ ya mɛhi. Ya ayima ayima yehe ya mɛhi yaluntuuma puan.

⁴ Ti ya ayima ayima mina yan wan ta'am tara ya ihe tuulum tarega, la na'ahegɔ tarega.

⁵ Dagi la ya tara kunkoma'ahum wuu sɛba en dagi Yuuduma en ka mi' Yinɛ la.

⁶ Ti ya se'em da tuue, bii fã a suuɔ yele ana wa puan, beni zuo, Daana la mɛŋa en wan lerege yele ana woo puan, wuu tumam en pun te'ele yele ya gee ka'am ya la ninmu'urɛ se'em la.

⁷ Yinɛ ka yi' tu na bahɛ dɛgerɔ tuuma puan, gee tu dɛna Yinɛ tuulum duma.

⁸ Ŋwana zuo, se'em woo en zagehɛ yele ana wa, ka zagehɛ la asaala kpe'eŋo gee Yinɛ, se'em me en bo'ori tu a Fa'a Sia la.

⁹ Nananawa, han dɛna suurɔ nɔŋerɛ yele, ya ka eere se'em gulehɛ bo' ya na. Se'ere en sɔi la, Yinɛ en pun pa'alɛ yamam ti ya nɔŋɛ taaba mɛ.

¹⁰ Ti la me sirum dɛna asira ti ya nɔŋɛ ya suurɔ woo en boi Masedoniya timpaberɛ puan mɛ. Gee tumam ka'ani ya mɛ n sunɔŋerɛ duma wa, ti ya malum iŋɛ bala paaɛ paaɛ.

¹¹ Ya kpeŋe ya mɛhi bɔna bããlam, biha ya mɛhi yɛla, gee sakɛ ya tuna la ya mɛhi nu'uhi wuu tumam en pa'alɛ ya se'em la,

¹² la ya ta'am tara ya mɛhi suŋa, ita sum bɔ'ɔra yiŋa duma, gee da dikɛ ya mɛhi delum se'em.

Daana la lɛbega na

¹³ Gee tu ka boti ya bɔna aliko n suurɔ, doohe sɛba en ki la yele, ti ya suya da ba' sagum wuu sɛba en ka tara beere puti'irɛ la.

¹⁴ Tumam en diŋɛ nam ti Yezu ki' mɛ gee ihege la, bala mɛa ti Yezu puan, Yinɛ wan tari sɛba en ki la en la wa'am na.

¹⁵ Ŋwana zuo, ti tu yɛta ya Daana yelehum la puan yeti, tumam sɛba en vɔi wa, la sɛba en yee gura Daana kinɛ na la, sore ka boi ti tumam wan tole sɛba en ki la nɛŋa.

¹⁶ Se'ere en sɔi la, Daana la mɛŋa wan sige na, doohe la nuurɛ ti ba bo' la kɔkɛ'ɛŋa, ti suŋereba nɛŋa daana la yi' na, ti Yinɛ tintanɛ la pɛɛbera, ti sɛba en ki' Kiresta puan la ihege yia,

¹⁷ ti tumam sɛba en vɔi wa, la tu sɛba en yee wa, wan naaɛ la ba sagbama puan, ti tu to'ohe Daana la kusebego puan, bala ti tu wan bɔna la Daana la wuuha wuuha.

¹⁸ Bala, kpemehe ya taaba la yelehum buna wa.