1 Tesaloniki 3 - ZE'ELEGO PAALEGA

¹ Ŋwana, tumam en daa kan le ta'am ŋmibe la zuo, tu daa iŋɛ tu puti'irɛ ti tu yee la tu ma'a Atense timpaberɛ puan,

² gee tum Timoti tu suuɔ, la tu tuntuna tadaana Yinɛ puan, se'em en muuli Kiresta faarɛ yelehum la, ti a wa'am na bo' ya paŋa, gee kpemehe ya ya sakerɛ la zuo,

³ ti ya se'em da miina mɛlehegɔ kuna wa zuo. Yelemɛŋerɛ, ya mɛhi mi' ti tumam n lu' tu suya ti tu paaɛ zi'an n bala.

⁴ Yelemɛŋerɛ, tumam n daa boi la ya la, tu pun daa yele ya mɛ, gee ti la nan ka paaɛ, ti tu wan nyaa mɛlehɛ, ti la sirum wa'am na dɛna bala, wuu yan mi' de se'em la.

⁵ Yele dina wa zuo, mam daa kan le ta'am ŋmibe la zuo, ti n tum na, ti n baŋɛ ya sakerɛ la en ze' se'em. Mam zoti la dabeem ti daan se'ere mageha la magehɛ ya bihɛ mɛ, ti tu namehegɔ tuuma la bahɛ yoo.

Timoti inkpegere sɔɔleŋa

⁶ Gee Timoti nan kɔ'ɔm ze'ele la ya zi'an wa'am tu zi'an na wa. A tari la yelesuma na bo' tu doohe ya sakerɛ, la ya nɔŋerɛ en ani se'em. A me yele tu ti ya kɔ'ɔm tɛra tu yele mɛ suŋa suŋa, gee mu'ɛ bɔta ti ya nyɛ tɔ, wuu tumam en kɔ'ɔm bɔta ti tu nyɛ ya se'em la.

⁷ Ŋwana zuo, n suurɔ, tumam susageŋɔ, la tu mɛlehegɔ wa puan za'a, tumam ihe kpeŋe mɛ yamam zuo, doohe la ya sakerɛ la.

⁸ Se'ere en sɔi la, tumam wan vɔna, ya han kelum sɛ zɛ'a kankaŋi Daana la puan.

⁹ Tu wan iŋɛ la ŋwani bo' Yinɛ fara yamam zuo la ti la seke, la nyɛɛma sɛ'a ti tumam tara Yinɛ nɛŋan yamam zuo wa?

¹⁰ Yu'uŋɔ la wuntɛɛŋa, tu pu'uhi mɛ la ninmu'urɛ ti tu nyɛ ya la tu nini, la tu malum lebehe sɛla woo en pɔ̃hegɛ ya sakerɛ puan la.

¹¹ Nananawa, tu Yinɛ, la Sɔ la mɛŋa, la tu Daana Yezu pa'alɛ tu sore, ti tu wa'am ya zi'an na.

¹² Gee ti Daana la iŋɛ ya ti ya zo'e, gee pirɛ la nɔŋerɛ bɔ'ɔra taaba la nɛra woo, wuu tumam en pirɛ la nɔŋerɛ bɔ'ɔra ya se'em la.

¹³ A wan kpemehe ya suya la Yinɛ tuulum vom puan, ti ya ka tara tuure tu Yinɛ, la tu Sɔ la nɛŋan, tu Daana Yezu, la a nɛresunduma la kinɛ puan na.