1 Tesaloniki 2 - ZE'ELEGO PAALEGA

Pɔɔl tuuma Tɛsalonika puan

¹ Yamam mɛhi mi', n suurɔ, ti tu kinɛ ya zi'an na la, ka bahɛ yoo,

² gee la tumam en pun nyɛ namehegɔ, la zufagehum sebo itegɔ seko Filipi timpaberɛ wuu yan mi' de se'em la, tumam kelum tara inkpegere mɛ muula Yinɛ faarɛ yelehum la, la sɛba en pun ka sakɛ bo' tu la en zo'e se'em la.

³ Tumam en yeti ya sɛla la ka ze'ele la pa'ahegɔ bii putɛ'yoo, bii nigeŋɔ puan na,

⁴ gee wuu Yinɛ en bihɛ nam tɔ ti a dikɛ faarɛ yelehum wa iŋɛ tu nu'uhen se'em la, bala ti tumam ka tɔgera ti tu pee saaleba suya, gee tu pee Yinɛ suure, se'em en makere tu suya bihɛ la.

⁵ Wuu yan mi' se'em la, ti Yinɛ me dɛna tumam aze'nyɛ daana se'em la, tu ka tabelɛ wa'am ya zi'an na la nɔmaalum yetɔgum, bii la kunkonyiim puti'irɛ,

⁶ bii tu ɛɛra pɛka saaleba zi'an, la dɛna yamam zi'an bii basɛba zi'an,

⁷ tu ta'am soke ya sɛla yele, wuu tumam en de Kiresta tuntuneba la. Gee tu daa ani la ma'ma la ya, wuu pɔgesɔɔ en biheri ka mɛŋa kɔma la giile se'em la.

⁸ Tu ba' tara la ya giile gaŋɛ zuo, ti tu iŋɛ tu puti'irɛ ti tu tɔrɛ la ya, dagi la Yinɛ faarɛ yelehum la ma'a, gee tu mɛhi vom. Se'ere en sɔi la, ya ba' bɔna la tu suya puan.

⁹ Ya tɛri tumam n daa tuni gee nameha se'em, n suurɔ, tu daa tuni la bala yu'uŋɔ la wuntɛɛŋa za'a, ti tu da dɛna zeero bo' ya, tumam n muulɛ Yinɛ faarɛ yelehum la bɔ'ɔra ya la.

¹⁰ Yamam dela aze'nyɛduma, la Yinɛ me, tumam en de tuulum, la tuuntɔɔ, ka tara tuure tu itegɔ puan se'em bɔ'ɔra yamam sɛba en nam la.

¹¹ Wuu yan mi' se'em la, tumam iti ya woo mɛ, wuu Sɔ en iti a kɔma se'em la,

¹² ka'ana, gee kpɛmeha ya, gee me bɛlena ya ti ya vɔna vom sebo taaba n nari bɔ'ɔra Yinɛ, se'em en yi' ya ki'ihɛ a mɛŋa sɔ'ɔlum, la a suŋa puan la.

¹³ Tu me kelum bɔ'ɔra Yinɛ fara mɛ saŋa woo yele dina wa zuo. Ti yan to'e Yinɛ yelehum la ti ya wum tu zi'an la, ya nam bu mɛ, ti bu dagi asaala yelehum, gee bu sirum dela Yinɛ yelehum sebo en tuni la yamam sɛba en nam la suŋa suŋa.

¹⁴ Gee yamam n suurɔ wa, ya dela sɛba en tɔgehi Yinɛ lageŋɔ la en boi Kiresta Yezu puan bɔna Yudiya la. Se'ere en sɔi la, ya namehɛ la bala mɛa ya mɛhi nɛreba zi'an, wuu ban yuum iŋɛ Yuuduma puan se'em la.

¹⁵ Sɛba en ku' Daana Yezu, la nɔtɔgeheba la, gee sa'ɛ tu bahɛ yiŋa la. Ba ba' tum sagum la Yinɛ suure, gee ka sakera bɔ'ɔra se'em se'em,

¹⁶ doohe la ban pɛregeri tɔ ti tu da tɔgera yelehum la bɔ'ɔra sɛba en dagi Yuuduma, ti ba nyɛ faarɛ la. Ŋwana ti saŋa woo, ba be'em la malum pa'ahera, gee ti Yinɛ sunsunyiim wan sige ba zuo mɛ ba'ahegɔ puan.

Pɔɔl le bɔta a bihɛ Tɛsalonikaduma

¹⁷ Gee han dɛna tumam n suurɔ, saŋa fii wa tumam han lebege kiibehe la tumam en welege tu mɛhi ya zi'an ingɔŋɔ wa puan la, gee dagi suure puan. Tu ba' bɔta mɛ la sunɔŋerɛ ti tu nyɛ taaba la tu nini.

¹⁸ Se'ere en sɔi la, tu ba' boti ni ti tu wa'am ya zi'an me na. Yelemɛŋerɛ, mam Pɔɔl kɔ'ɔm boti ni n lebe ya zi'an mɛ na yɛ'ɛha, gee Sagena la en gu' tu sore la.

¹⁹ Beni en de tumam beere puti'irɛ, bii nyɛɛma, bii nyu'ɔ ŋmɛ'a muŋa tu Daana Yezu nɛŋan, a lɛbega daarɛ na la? La dagi la yamam?

²⁰ Ɛ̃ɛ, yamam en de tumam na'ahegɔ la tu nyɛɛma!