1 Tesaloniki 1 - ZE'ELEGO PAALEGA

Pu'uhegɔ

¹ Mam Pɔɔl, Silevanuse, la Timoti en gulehɛ gɔŋɔ wa bɔ'ɔra sakereba Lageŋɔ la en boi Tɛsalonika la, Yinɛ en de Sɔ la, la Daana Yezu Kiresta. Zu'uhegɔ la suma'ahum bɔna la ya.

Tɛsalonikaduma sakerɛ en de makerɛ

² Tumam daarɛ woo bo'ori Yinɛ fara mɛ ya za'a zuo, gee puta ya yu'ura tu pu'uhegɔ puan saŋa woo.

³ Tu tɛɛra tu Yinɛ en de tu Sɔ la nɛŋan ya sakerɛ tuuma, la ya nɔŋerɛ tuuma, la yan ze' se'em kankaŋi ya beere puti'irɛ la puan se'em tu Daana Yezu Kiresta puan la.

⁴ Tu mi', tu suurɔ wa en de Yinɛ sunɔŋerɛ nɛreba wa, ti eŋa en looe ya,

⁵ beni zuo, tu faarɛ yelehum muulegɔ la ka wa'am ya zi'an na dɛna la yetɔgum ma'a, gee bu wa'am mɛ na la paŋa, la Fa'a Sia, la suteere paŋa. Wuu yamam en mi' tumam en pa'alɛ ya tumam en de nɛresɛba taaba bɔna la ya yamam zuo la.

⁶ Ti yamam me tɔgehɛ tumam, la tu Daana la, se'ere en sɔi la, la yan pun nyɛta namehegɔ la, ya to'e yelehum la mɛ la nyɛɛma sɛ'a ti Fa'a Sia bo' la mɛ.

⁷ Bala ti ya dɛna makerɛ bo' sakereba la woo en boi Masedoniya la Akaiya tihi la.

⁸ Se'ere en sɔi la, Daana yelehum la doohe ya puan yehe mɛ, dagi la bu paaɛ la Masedoniya la Akaiya tihi ma'a puan, gee zi'an woo, ya sakerɛ se'ere tara Yinɛ puan la niiɛ mɛ, ti la pun ka pakɛ ti tumam le tɔgɛ de yele.

⁹ Se'ere en sɔi la, nɛre sɛba en boi tihi sina puan la, puti tu yele mɛ yan to'e tu se'em, la yan ŋmɛregɛ baga kaabegɔ puan se'em lebe Yinɛ zi'an na, ti ya tuna bɔ'ɔra Yinɛ vua, la yelemɛŋerɛ Yinɛ wa se'em,

¹⁰ gee gura a Dayua la en wan ze'ele saazuo na la, se'em ti a ihege en kum puan la. Yezu, se'em en faaɛ tɔ Yinɛ sunsunyiim sebo en kini na la.