1 Pita 5 - ZE'ELEGO PAALEGA

Yinɛ piihi gurega

¹ Nananawa, mam mɛŋa en de kiima, gee dɛna aze'nyɛ daana bo' Kiresta namehegɔ la, gee me dɛna se'em en wan ta nyɛ tɔtɛ suŋa la en wan ta niiɛ na la puan. Mam kpemehe kiinduma en boi ya puan la

² yeti, ya gura Yinɛ piihi la en boi ya nu'uhen la suŋa, dagena pɛregerɛ puan gee la susunɛ, wuu Yinɛ en wan boti ni ti ya ita se'em la, dagi kunkonyiim puan gee ya kɔ'ɔm mu'ɛ la nini la tuuma la.

³ Da dikɛ ya zeero ziile sɛba en boi ya nu'uhen la, gee deni ya makerɛ bo' piihi la.

⁴ Ti dunkiin naba la han ta niiɛ na, ya wan di suŋa muŋa sɛka en ka pelegere la.

⁵ Bala mɛa, ti yamam bumbile paalehi la me dɛna ya nana ya kiinduma la puan. Ya za'a yɛ sigehe mɛŋa ti a dɛna ya fuo, ya bɔŋa la taaba. Se'ere en sɔi la, “Yinɛ zagehɛ zɛkɛ n mɛŋa daana mɛ, gee bɔ'ɔra sigehe n mɛŋa daana zu'uhegɔ.”

⁶ Bala, sigehe ya mɛhi Yinɛ nu'uhen, ti a zɛkɛ ya, saŋa la han ta paaɛ.

⁷ Dikɛ ya ninmu'urɛ za'a bahɛ Yinɛ nu'uhen, beni zuo eŋa en biheri ya.

⁸ Tana ya mɛhi tara, gee me maahum. Gee ya dindaana la en de Sagena la kɔ'ɔm mu'ɛ la nini nyaara wuu gbigenɛ la, ɛɛra nɛra ti a obe.

⁹ Da bo' ya en sore, sɛ ya ze'ele kankaŋɛ ya sakerɛ la puan, se'ere en sɔi la, ya mi' ti ya suurɔ en boi timpaberɛ wa zuo za'a, me dole la namehegɔ kuna mɛa puan tɔla.

¹⁰ Ti ya han namehɛ yuue fii wa, Yinɛ en de zu'uhegɔ za'a daana la, se'em en yi' ya ti ya wa'am na bɔna sunsɛka en ka tari ba'ahegɔ Kiresta puan la, a mɛŋa wan lebehe ze'ele ya, te'ele ya, kpemehe ya, gee sɛ ya ze'ele kankaŋi.

¹¹ Eŋa ti paŋa dɛna a dinɛ wuuha wuuha. Taari.

Ba'ahegɔ pu'uhegɔ la ka'a

¹² Doohe Silevanuse, se'em ti mam nyɛ ti a dela suuɔ en de sakerɛ daana, ti mam gulehɛ gɔŋɔ girega wa, ti n kpemehe ya, gee pa'alɛ ti Yinɛ zu'uhegɔ yelemɛŋerɛ en ŋwana. Sɛ ya ze'ele kankaŋi de puan.

¹³ Ya lageŋɔ suurɔ en boi Babilɔn, ti Yinɛ lagum looe ya la, pu'uhi ya na. Bala mɛa ti mam dayua Maki me pu'uha ya na.

¹⁴ Pu'uhi ya taaba la suurɔ kɔkerɛ. Suma'ahum bɔna la ya woo en boi Kiresta puan la.