1 Pita 4 - ZE'ELEGO PAALEGA

Kiresta Kɔma Vompaalemɔ

¹ Lan de ti Kiresta namehɛ mɛ ingɔŋɔ wa puan la, me bobe ya mɛhi la zaba lɔgerɔ, la putɛ' dinɛ mɛa. (Bala fum se'em woo en boi Kiresta puan nyɛ namehegɔ fum ingɔŋɔ wa puan, la dela fum nyaŋɛ be'em paŋa).

² Bala yan vɔi vom dabeha sɛ'a en gee timpaberɛ wa zuo wa, da voni ya bu la asaala kunkɔma'ahum, gee Yinɛ suboolum vom.

³ Ya pun diŋɛ dikɛ la saŋa zo'e zo'e tuna sɛla ti sɛba en dagi Yuuduma ita la. Zufagehum, kunkɔma'ahum, buka, dikãra, yaalegɔ, la baga kaabegɔ.

⁴ La iŋɛ nɛreba la pakerɛ ti yan ka le lagena la ba tuna tuunyooro tunɔ taaba la, bala ti ba yaala ya la.

⁵ Gee ba wan ta yele bo' eŋa se'em en maahum ti a gakɛ vɔpa la ki'induma la,se'ere zuo ti ba yaala ya la.

⁶ Ŋwana zuo, ti ba muulɛ faarɛ yelehum la, pun ta paaɛ ki'induma la, ti la bahɛ ti ban pun gakɛ ba ingɔŋɔ puan wuu nɛra woo ti ba gakɛ se'em la, ba wan vɔna Sia puan wuu Yinɛ en ani se'em la.

⁷ Sɛla woo ba'ahegɔ pɔri mɛ. Bala, mu'ɛ ya nini, gee ta'na ya mɛhi tara suŋa, ya pu'uhegɔ zuo.

⁸ Sɛla en gani bala, tari ya nɔŋerɛ saŋa woo bɔ'ɔra taaba, se'ere en sɔi la, nɔŋerɛ pi'ire la be'em zo'e zo'e.

⁹ To'oheri taaba suŋa ya yiya puan, gee da gɔgeni ya.

¹⁰ Wuu yan de tuntuneba suma, ti Yinɛ zu'uhegɔ pirɛ ya la, tuni ya bɔ'ɔra taaba, la bo'olum sebo woo ti yamam ayima ayima to'e la.

¹¹ Fum se'em en tɔgeri, dela a tɔgera wuu Yinɛ mɛŋa en tɔgeri la. Fum se'em en tuni bɔ'ɔra, dela a tuna la pansɛka za'a ti Yinɛ bo' en la, bala ti Yinɛ wan nyɛ na'ahegɔ sɛla woo puan, doohe Yezu Kiresta puan. Eŋa en sɔi na'ahegɔ la paŋa, wuuha wuuha. Taari.

Kiresta kɔma namehegɔ

¹² N sunɔŋerɛ duma wa, da bahɛ ya ti la iŋɛ ya pakerɛ, la namehɛ tuulɛ wa en boi ya puan ti bu makɛ ya bihɛ wa, ti la ana wuu yele saanɛ bo' ya.

¹³ Gee nyɛɛni ya, la yan lagum tuta Kiresta namehegɔ la, bala ti ya me wan ta vɔɔla la nyɛɛma, a han ta niiɛ na la a suŋa la.

¹⁴ Ba han tuura ya Kiresta yu'urɛ zuo, sum en dole ya, beni zuo, sia sɛka en de suŋa la, dɛna Yinɛ Sia la, en boi la ya.

¹⁵ Gee da bahɛ ya ti ya se'em nyɛ namehegɔ, ti a ku mɛ, bii nageyiga, tuunfi'iha, bii se'em en kɛ̃'ɛ̃ra nɛreba yɛla puan.

¹⁶ Gee la bala za'a, ya se'em han nyɛ namehegɔ yan de Kiresta kɔma la zuo, da bihɛ ya ti la dɛna vi' bɔ'ɔra ya, gee pɛgeri ya Yinɛ, la yan tari yu'urɛ dina wa la zuo.

¹⁷ Saŋa la paaɛ mɛ ti gakerɛ la pɔhɛ Yinɛ yire la puan yia, ti la han pɔhera tumam, la wan ba'ahɛ la ŋwani la sɛba en ka nam Yinɛ faarɛ yelehum la?

¹⁸ Gee “La han kpe'em bo' tuuntɔɔ duma ti ba nyɛ faarɛ, la wan ana la ŋwani bo' putɔpa, la be'em duma la?”

¹⁹ Bala, bahɛ ya ti sɛba en nameheri dɔla Yinɛ sumboolum la, dikɛ ba mɛhi bo' Naana la en de sakerɛ daana la, gee kelum ita ba sum la.