1 Pita 3 - ZE'ELEGO PAALEGA

Pɔgeba la Sireba

¹ Pɔgeba, bala mɛa, sigehe ya mɛhi bo' ya mɛhi sireba, ti basɛba han pun ka nam yelehum la, ba wan nyaŋɛ ba, gee pun ka yele se'ere, gee ba pɔgeba aŋa la ma'a,

² ba han nyɛta ya zulaam vom la, la ya na'ahegɔ seko en boi ya vom puan la.

³ Da yeen nɔni ya ya mɛhi yiŋa, doohe ya zuto gulega, la salema lɔgerɔ yɛa, bii futo da'a en kpe'em,

⁴ gee tugum bahɛ ya ti ya nunɔm la bɔna ya puan, ya ana ma'ma, gee tara bããlam sia vom la en de sunsɛka en ka tari ba'ahegɔ, tara tuulum kãtɛ Yinɛ nɛŋan la.

⁵ Sadɔɔ kuna ti diimen diimen tuulum pɔgeba la en yuum tari beere puti'irɛ Yinɛ puan la, yuum nɔna. Nana ba sireba en tari kpe'eŋo seko woo la.

⁶ Bala ti Saara nam Aberaham, pun ta yi'ira en a daana.Ya me dela a poyɔɔhi, wuu ya han ita sɛla en ani suŋa, gee ka bahɛ ti dabeem sãɛ ya.

⁷ Sireba, bala mɛa, me zu'uhi ya ya pɔgeba, yan boi la taaba la, na'ahera fum pɔga, la eŋa en pun dɛna tɔregɔ lɔkɔ la, se'ere en sɔi la, ba wan ta to'e Yinɛ vom bo'olum la mɛ. Iti ya bala ti sɛla da gu'ura ya pu'uhegɔ.

Itesuŋɔ namehegɔ

⁸ Ba'ahegɔ, ya woo tara Sia la nɔyinɛ vom la, zɔta taaba nimbu'ɔ, nɔŋɛ ya taaba, tari ya taaba giile, gee sigehe ya mɛhi ya suya puan bo' taaba.

⁹ Da dikɛ be'em yɔ be'em, bii kɛhega yɔ kɛhega. Gee lan de se'em dela, lɛbehera sum. Ŋwana zuo ti Yinɛ yi' ya, ti ya wa'am na to'e sum la.

¹⁰ Se'ere en sɔi la, “Sɛba en boti vom, gee bɔta ti ba nyɛ dabeha suma la, ba ta'na ba zɛlehi da tɔgera be'em, ba da tara ba nɔya pã'aha.

¹¹ Ba bire ba pɔya bahɛ be'em, gee ita suŋa. Ba ɛɛra suma'ahum, gee mu'ɛ nini dɔla bɔ.

¹² Se'ere en sɔi la, Daana la nini gã' la tuuntɔɔ duma zuo, ti a tuba ana kɛli la ba pu'uhegɔ. Gee Daana la nɛŋa ka loregere la sɛba en tuni be'em.”

¹³ Nananawa, ani n wan daam ya, ya han mu'ɛ nini ti ya ita sɛla en ani suŋa?

¹⁴ Gee ya han pun nameha yan iti sɛla en de ma'a zuo, sum boi mɛ la ya. Da zoti ya ba, gee me da bahɛ ti la daana ya,

¹⁵ gee ya suya puan, tugum malum gurɛ ya Kiresta ti a dɛna daana. Saŋa woo, maahum ya ti ya tɔgɛ po'e ya mɛhi, se'em en soke ya ti ya pa'alɛ en ya beere puti'irɛ wa, lerege ya en bããlam la Yinɛ zoolum.

¹⁶ Tari ya susunɛ, ti ba han pun yi'ira ya yu'yooro, sɛba en keheri ya itesuŋɔ Kiresta puan la, vi wan di ba.

¹⁷ Se'ere en sɔi la, la ani suŋa ti fum nyɛ namehegɔ fum itesuŋɔ zuo, namehegɔ la han dɛna Yinɛ sumboolum, nyana fum nyɛ namehegɔ be'em tuuma zuo.

¹⁸ Kiresta me wa namehɛ mɛ buyina, tumam za'a be'em zuo. Tuntɔɔ daana en namehɛ bo' sɛba en dagi tuuntɔɔ duma, ti a tari ya na bo' Yinɛ. Ba ku en mɛ ingɔŋɔ wa puan, gee ba vo'e en mɛ Sia puan,

¹⁹ bilam ti a kiŋɛ ta muulɛ bo' sɛɛhi la en boi paka deo puan la,

²⁰ sɛ se'ehi yuuman yuuman ha, en yuum ka nam, Yinɛ en yuum gu'uhi la sugeri Nowa dabeha la puan, uureŋɔ la maalegɔ saŋa ha la, ti nɛreba fii wa, en de nɛreba ba nii ma'a yuum nyɛ faarɛ ko'om la puan la.

²¹ Ko'om sua wa ti yele dina wa yuum ze'ele bo' la, en faaɛ ya bahɛ nananawa. Dagi la bu yehe la dɛgerɔ ya iŋa puan, gee bu dela Ko'om sua sɛka ti tu suhera Yinɛ ti a bo' tu putɛ'sunɛ doohe Yezu Kiresta vo'ore la puan.

²² Kiresta, en bala zom saazuo ha, ta bɔna Yinɛ zuɔ nu'o bɔba, la suŋereba, kpɛ'ɛnduma, la pahi se'ehi ti ba dikɛ biŋe a nama timpaberɛ.