1 Pita 2 - ZE'ELEGO PAALEGA

Ɛ̃berɛ, la Yinɛ en looe nɛre sɛba

¹ Bala, yehe ya mɛhi, yele ana wa puan. Putoo, wikerɛ, birekɔgenɛ, nintɛrega, la yu'sageŋɔ.

² Wuu yan de bilɛɛhi la, kɔ'ɔm leebere ya mɛ la Sia puan bi'ihum sumɔ la, bala ti bu wan bahɛ ti ya zɔ'ɔra ya faarɛ la puan,

³ ya han sirum lem mɛ nyɛ Daana la en ani suŋa se'em.

⁴ Wa'am ya a zi'an na, eŋa en de vom ɛ̃berɛ kugere la, la saaleba en pun zagehɛ en la, gee eŋa ti Yinɛ looe, ti a dɛna tuulum lɔkɔ Yinɛ nɛŋan.

⁵ Wuu yan de vom kuga en dikɛ ya mɛhi mɛ Sia yire, deni ya tuulum malema duma, kaabera sia puan kaabegɔ en tigɛ Yinɛ nini doohe Yezu Kiresta puan.

⁶ Se'ere en sɔi la, la boi gulehegɔ la puan yeti, “Bihɛ, n biŋere la ɛ̃berɛ kugere Zaayɔn, ɛ̃berɛ kugere se'ere ti ba looe, gee ti de dɛna tuulum kugere. Se'em woo en nam en, vi kan di en.”

⁷ Ti fum se'em woo en nam, a dela tuulum lɔkɔ bo' fum, gee sɛba en ka nam la, “Ɛ̃berɛ kuge se'ere ti mɛteba zagehɛ la, dinɛ en de kuge sunɛ, tara ɛ̃berɛ la,”

⁸ gee “Me dɛna kuge se'ere ti ba sɛrena de zuo luta, dɛna tansɛka en piti ba lɔbera.” Ban piti luta la dela, ban ka nam yelehum la, wuu ban pun maahum ba ti ba iŋɛ se'em la.

⁹ Gee yamam dela buuri se'ere ti Yinɛ looe, ya dela malemaduma nabiihi, dɛna tuulum timpaberɛ, Yinɛ mɛŋa nɛreba, ti ya muulɛ tuunkãra sɛ'a en de se'em daana en yi' ya lika puan yehe niihum kãtɛ puan na la dinɛ.

¹⁰ Ya daa nan ka de a nɛreba, gee nananawa, ya dela Yinɛ nɛreba. Ya daa nan ka to'e nimbɔ'zɔrɛ, gee nananawa, ya to'e nimbɔ'zɔrɛ.

Vɔni ya wuu Yinɛ yamehi

¹¹ N sunɔŋerɛ duma mam ka'ani ya mɛ la ninmu'urɛ, wuu yan de saama, la nɔgereba la, ti ya yehe ya mɛhi ingɔŋɔ wa kɔrehi sɛ'a en zaberɛ la ya sia la puan.

¹² Tara ya mɛhi suŋa sɛba en dagi Yuuduma la zi'an, bala ti ban pun dikɛ ya yi' be'em duma la, ba wan nyɛ ya tunsuma la, gee pɛgera Yinɛ, a han ta wa'am na ti a gakɛ.

¹³ Daana la zuo, nane ya asaala tigere woo kpe'eŋo, yele yele wuu Timbihega nɛŋa daana se'em en sɔi ya za'a bihera la,

¹⁴ bii timbihega duma ti a tum ba, ti ba namehɛ tuunfi'iha duma, gee pɛgera sɛba en tuni ma'a la.

¹⁵ Se'ere en sɔi la, la dela Yinɛ sumboolum ti ya han ita sɛla en de ma'a, ya wan ma'ɛ gɔɔnɔ la en ka mi' la nɔya.

¹⁶ Yamam en de Yinɛ yamehi la, vɔni ya fai, gee la bala za'a, da dikɛ ya fai bɔŋa la tuna be'em.

¹⁷ Na'ahɛ ya nɛra woo. Nɔŋɛ ya suurɔ seto en de sakereba la. Zoti ya Yinɛ. Na'aheri ya timbihega nɛŋa daana la.

Kiresta namehegɔ makerɛ

¹⁸ Yamehi, nane ya ya kpɛ'ɛnduma kpe'eŋo woo la na'ahegɔ, dagi la sɛba en iti ya suŋa, gee ana ma'ma la ya la ma'a, gee sɛba me en vɛgeleni ya.

¹⁹ Se'ere en sɔi la, la dela yɔɔrɛ bɔ'ɔra ya, yan mi' Yinɛ la, ya han ŋmibera too, gee nyɛta namehegɔ seko en dagi tuuntɔɔ.

²⁰ Ya han ŋmibera ban ŋmɛ'ɛri ya sɛla ti ya tuue puan, beni nyuurɔ en boi bini? Gee ya han ŋmibera yan tum ma'a gee ti ba namehɛ ya de zuo, Yinɛ nini tigɛ mɛ la ya.

²¹ Ŋwana zuo ti Yinɛ yi' ya la, beni zuo, Kiresta namehɛ mɛ bo' yamam ti ya biha bala niira a nama la.

²² “A ka tari be'em, pã'ahegɔ ka tabelɛ ze'ele a nuuren na.”

²³ Ban wa tu' en la, a ka leregere la tuurɛ. Ban wa nameha en la, a ka lebehe ba. Gee a dikɛ a mɛŋa bo' la se'em en gakeri tuuntɔɔ la.

²⁴ Eŋa mɛŋa en zi' tu be'em a iŋa puan pumpuuredɔɔ la zuo. Be'em la en ki tumam puan la, tu nyaa wan vɔna tuuntɔɔ vom. A pɔgeleŋɔ la puan, ti ya nyɛ tibegɔ.

²⁵ Se'ere en sɔi la, ya daa bɔregɛ mɛ wuu piihi la, gee nananawa, ya ŋmɛregɛ lebe la dunkiina sɛka en guri ya sɛɛhi la zi'an na.