1 Pita 1 - ZE'ELEGO PAALEGA

Pu'uhegɔ

¹ Mam Pita en de Yezu Kiresta tuntuna, en gulehɛ gɔŋɔ wa bɔ'ɔra sɛba en nɔgɛ bɔna zi'an woo, Pɔntusi, Galatia, Kapadosia, Esiya, la Bitiniya tihi puan la.

² Sɛba ti Yinɛ en de Sɔ la daa pun te'ele looe ba, maahum ba, gee duuhe ba la a Fa'a Sia la, ti ba nana Yezu Kiresta, gee ti a miihi ba la Yezu ziim la. Zu'uhegɔ la suma'ahum zo'e zo'e dɛna ya dinɛ.

Beere putɛ'vua

³ Sum dɛna Yinɛ en de tu Daana Yezu Kiresta Sɔ la dinɛ! A nimbɔ'zɔrɛ kãtɛ la zuo, a bo' tu la dɔgum paalemɔ ti tu tara beere putɛ'vua doohe Yezu Kiresta vo'ore a kum la puan.

⁴ A yi ya mɛ ti ya to'e lɔgerɔ seto en ka sageni, ka galum, ka kuregera, en maahum biŋe saazuo ha gura ya.

⁵ Yamam sɛba ti Yinɛ paŋa gu'ura ya doohe ya sakerɛ puan la, ya faarɛ la wan niiɛ ba'ahegɔ saŋa la na.

⁶ Dina puan ti ya nyɛɛna, la han pun dɛna ti nananawa, saŋa fii wa, ya namehɛ kãra yima yima doohe mageha yima yamam puan

⁷ ti ya yelemɛŋerɛ sakerɛ la en tari tibehum gana salema, sakerɛ wa en tari tibehum gana salema wa, en pun tana Sagena la, gee ba wan kelum magehɛ bu la bugum bihɛ, bala mɛa ti ba wan magehɛ ya sakerɛ la bihɛ, gee de wan tara pɛka la suŋa, la na'ahegɔ, Yezu Kiresta han ta niiɛ na.

⁸ La yan pun ka nyɛ en la, ya nɔŋɛ en mɛ. La yan pun ka nyɛ en nananawa la, ya nam en mɛ, gee nyɛɛna mɛ la nyɛɛma kãtɛ sɛ'a en ka tari tɛka pirɛ suŋa.

⁹ Se'ere en sɔi la, ya to'ore la ya sakerɛ yɔɔrɛ en de ya sɛɛhi faarɛ la.

¹⁰ Han dɛna faarɛ dina wa yele, nɔtɔgeheba sɛba en yuum purɛ zu'uhegɔ la en wan dɛna ya dinɛ la, ma'ɛ ba mɛhi mɛ, viihɛ, gee ɛ bu paaɛ paaɛ,

¹¹ viihera ɛɛra nɛresɛka, la sansɛka ti Kiresta Sia la en boi ba puan la ta pa'alɛ ba, doohe la Sia la en te'ele yele ba namehegɔ seko taaba en maahum gura Kiresta, la na'ahegɔ seko en dole ku poore.

¹² La yuum niiɛ pa'alɛ ba yeti, ba ka tuni bɔ'ɔra la ba mɛhi, gee tumam, doohe yelesɛ'a en nyaa muulɛ bo' ya nananawa, doohe sɛba en tari faarɛ yelehum wa na bo' ya la, doohe Fa'a Sia la ti Yinɛ tum en saazuo ha bahɛ na la.Yele sɛ'a ti suŋereba mu'ɛ nini ti ba nyɛ la.

Fa'a vom yi'a

¹³ Ŋwana zuo, maahum ya puti'ira ti ya tum. Tana ya mɛhi tara. Bahɛ ya ti ya puti'ira za'a bɔna zu'uhegɔ seko ti Yezu Kiresta wan tari na bo' ya, a han ta niiɛ na la puan.

¹⁴ Wuu yan de kɔma en nane la, da naaɛ ya la kunkoma'ahum sebo taaba ti ya yuum pun tara, yan yuum nan ka mi' la.

¹⁵ Gee wuu se'em en yi' ya la, en de fa'a se'em la, deni ya Yinɛ tuulum nɛreba ya mɛhi, ya itegɔ woo puan.

¹⁶ La gulehɛ yeti, “Deni ya Yinɛ tuulum nɛreba, se'ere en sɔi la mam dela Fa'a.”

¹⁷ Yamam han yi'ira en Sɔ, se'em en gakeri nɛra woo ka tara ninkɔɔra, gee nɛra woo la a tuuma en de se'em la, voni ya la dabeem ya nɔka saŋa wa puan.

¹⁸ Ya mi ti Yinɛ yɔ mɛ to'e ya yehe vom yoo sebo ti ya to'e ya yaabeduma zi'an la. A ka yɔ mɛ la lɔgeseto en sageni, ana wuu salempɛɛla bii salema,

¹⁹ gee Kiresta tuulum ziim en ani wuu kaabegɔ pebila en ka bɛ̃' bii tara dɛkɔ se'em la.

²⁰ Yinɛ yuum pun maahum en mɛ gee ti timpaberɛ wa baŋɛ pi'ilum, gee ta niiɛ en ba'ahegɔ saŋa wa puan, yamam zuo.

²¹ Doohe eŋa puan ti ya wa'am na nam Yinɛ, se'em en ihege en a kum puan la, gee bo' en na'ahegɔ, ti ya sakerɛ, la ya beere puti'irɛ la bɔna Yinɛ zi'an.

²² Nananawa ti ya pee ya sɛɛhi doohe yan nam yelemɛŋerɛ la, nyaa tara yelemɛŋerɛ nɔŋerɛ la, nɔŋɛ ya taaba paaɛ paaɛ ya suya puan ha.

²³ Ba dɔgɛ ya la dɔgum paalum, dagena la biiliho sebo en pu'uri, gee biiliho sebo en ka pu'uri, ba malum dɔgɛ ya doohe la Yinɛ yelehum vua la en ka malum ba'aha la puan.

²⁴ Se'ere en sɔi la, “Asaala woo ani mɛ wuu muɔ la ti ba suŋa za'a ana wuu mɔpuuro la. Muɔ ku'uri mɛ, ti mɔpuuro zɔgera,

²⁵ gee Daana yelehum la kɔ'ɔm bɔna mɛ wuuha wuuha.” Yelehum buna wa dela faarɛ yelehum sebo ti ba muulɛ bo' ya la.