1 Korẽntɩ 9 - ZE'ELEGO PAALEGA

Yezu tuntuna buurɔ

¹ Mam ka boi la fai yoi? Mam dagi la Yezu tuntuna yoi? Mam ka nyɛ la Yezu tu Daana la yoi? Dagi yamam en de mam tuuma Daana la puan?

² Mam han pun ka dɛna Yezu tuntuna bo' basɛba, gee la se'em se'em me, n de mɛ bo' yamam, se'ere en sɔi la, yamam en de mam daalehum pa'ala ti n dela Daana la tuntuna.

³ Mam pu'uri n mɛŋa se'em n ŋwana, nɛreba han ni ta viihera ti ba baŋɛ nyaa n de Yezu tuntuna yoi.

⁴ Tu ka tari sore ti tu dita gee nyuura tumam en boti sɛla?

⁵ Tu ka tari sore ti tu pɔgeba en de tu sakereba la dɔla tɔ wuu Yezu tuntuneba basɛba la, la Daana suurɔ la, la Sefase en iti se'em la?

⁶ Bii Banabase la mam ma'a n kɔ'ɔm ka tari sore ti tu me bahɛ da tuna diiha tu mɛhi?

⁷ Ani n boi, ni yɔɔra a mɛa pɛntɛrɛ tuuma puan? Ani n sɛ tiihi gee ka dita si wala, bii ani en dole piihi gee kan sũna si iilum?

⁸ Mam yeti se'em wa dela nɛre saala puti'irɛ? Nɔze'elego la me ka yeti la bala mɛa?

⁹ Se'ere en sɔi la, la gulehɛ Moose nɔze'elego puan yeti, “Da lu' lɔlega nuurɛ gee tara ka tulegera ki.” La dela lɔlemɛŋehi ti Yinɛ yɛta wa?

¹⁰ Gee Yinɛ ka tɔgeri ŋwana za'a la tumam zuo, yelemɛŋerɛ, ba gulehɛ dina wa la tumam zuo? Se'ere en sɔi la, se'em han kɔɔra, a kɔɔri gee tara la beere puti'irɛ, ti se'em me han tɔɔra ki, a tɔɔri gee tara la puti'irɛ ti a wan to'e a tɔtɛ.

¹¹ Tumam han burɛ la sia sum ya puan, tu nyaa han kɛ̃'ɛ̃ra ya ingɔŋɔ puan nyuurɔ, la ba' gaŋɛ mɛ yoi?

¹² Basɛba han tara sore ti ba to'e sɛla ya zi'an, tumam ka nari gaŋɛ bala? Gee aayi, tumam ka makɛ dikɛ yɔ'ɔ kuna wa tum, gee tumam ŋmiberi mɛ sɛla woo puan, nyana tu dikɛ sɛla beŋe Kiresta faarɛ yelehum wa puan.

¹³ Yamam ka mi' ti sɛba ti ba dikɛ ti ba tuna pu'uhegɔ yire, nyɛti ba dia la pu'uhegɔ yire la puan, ti sɛba me n tuni kaabegɔ bimbine zuo la me ni to'e ba dinɛ la sɛla ti ba dikɛ kaabɛ la puan?

¹⁴ Bala mɛa, Daana la bo' nuurɛ ti sɛba woo n muulɛ faarɛ yelehum la, nyɛta ba nuurɛ dia faarɛ yelehum mɛa puan.

¹⁵ Gee mam ka dikɛ yɔ'ɔ kuna wa la kuyina me tum, bii n nyaa guleha ŋwana ti ya dikɛ de tum sadɔseko puan. Yelemɛŋerɛ, mam tugum ki nyani nɛre se'em gu' mam se'ere zuo ti mam ŋmɛ'ɛra n nyu'ɔ la.

¹⁶ Mam han muulɛ faarɛ yelehum wa, dina ka bo' mam sore ti n ŋmɛ'ɛra n nyu'ɔ, se'ere en sɔi la, la dela tuunɛ gã'a n zuo, ti yele n bɔna n zuo, n han ka muulɛ faarɛ yelehum wa.

¹⁷ Beni zuo, mam han tuna dina wa la n mɛŋa suboolum, mam tari yɔɔrɛ mɛ, gee la han dagena mam mɛŋa suboolum, ba ye dikɛ tuunɛ la bo' mam mɛ ti n tum ti ba yɔ mam.

¹⁸ Beni en nyaa de mam yɔɔrɛ la? La dela n muulegɔ la, n bahɛ ti faarɛ yelehum wa paaɛ nɛreba zaŋa la, ti n da ta'am dikɛ mam tari yɔ'ɔ seko faarɛ yelehum wa puan la tum.

¹⁹ La mam pun bɔna fai la, mam na'ahera nɛra woo mɛ, dikɛ n mɛŋa lebege da'aberɛ bo' nɛra woo, ti n ta'am nyaŋɛ ba zo'e zo'e.

²⁰ Yuuduma la zi'an, mam ni dikɛ n mɛŋa lebege la Yuda nɛra, ti n ta'am tee Yuuduma la, Sɛba en dole kiha la me zi'an, mam ni dikɛ n mɛŋa lebege la bamam en ani se'em la, (La mam pun ka bɔna kiha puan la), ti n ta'am tee sɛba en boi kiha puan la.

²¹ Sɛba en ka dole kiha la, mam ni dikɛ n mɛŋa lebege la sɛba en ka dole kiha la (la mam pun ka bɔna fai Yinɛ kiha la puan gee bɔna la Kiresta kiha puan la), ti n ta'am tee sɛba en ka boi kiha puan.

²² Sɛba en tari tɔregɔ, mam ni lebege la tɔregɔ daana, ti n ta'am tee tɔregɔ duma la. Mam lebege la sɛla woo bo' nɛra woo ti sadɔseko woo puan, n ta'am faaɛ basɛba.

²³ Mam iti ŋwana za'a la faarɛ yelehum la zuo, ti n ta ta'am tara tɔtɛ bu sum la puan.

²⁴ Yamam ka mi' ti zua puan, zɔteba la woo ni pagera la taaba, gee ba ayima ma'a en ni ta di mi'a? Zɔ ya yan wan zɔ se'em la ya ta'am di.

²⁵ Zɔteba kpemehere ba mɛhi la ba tana ba mɛhi tara sɛla woo puan. Ba iti dina wa ti ba to'e la muŋa sɛka en ta' Sagena, gee tumam dela muŋa sɛka en ka ta' sageni.

²⁶ Bala, mam ka zoti yoo yoo, bii n ŋmɛ'ɛra kunkura yoo yoo,

²⁷ Gee mam kpemehe n iŋa wa mɛ ti ka dɛna da'aberɛ, ti n han ta muulɛ bo' basɛba, mam mɛŋa kan bahɛ yoo.