1 Korẽntɩ 8 - ZE'ELEGO PAALEGA

Baga dia yɛla

¹ Nananawa, disɛka ti ba dikɛ kaabɛ bo' baga sɔhega la. Tu mi' ti, “Tu za'a tari mi'ilum mɛ.” Mi'ilum bo'ori la pa'alɛ mɛŋa gee nɔŋerɛ en mɛti.

² Se'em han ti'ihɛ ti eŋa mi' sɛla, nan kelum ka tara mi'ilum sebo en de a tara.

³ Gee se'em en nɔŋɛ Yinɛ, Yinɛ mi' en mɛ.

⁴ Bala, han dɛna disɛka en dikɛ kaabɛ baga sɔhega la, tu mi' ti “Bagerɛ ka boi tiŋa wa zuo dɛna bunvua,” ti yinɛ ka bɔna han dagena “Yinɛ deyina wa ma'a.”

⁵ Yelemɛŋerɛ, sɛla ta'am bɔna ti ba yi'ira ba yina ti ba bɔna saazuo bii tiŋa wa zuo, wuu lan de sira se'em ti yina la daanduma boi mɛ la.

⁶ Gee han dɛna tumam, Yinɛ dela ayima, Sɔ la, se'em zi'an ti sɛla woo ze'ele na la, la se'em zuo ti tu za'a vɔna la, Daana ayima, en de Yezu Kiresta la, se'em puan ti sɛla woo ze'ele na, la se'em zuo ti tu vɔna la.

⁷ Dagi nɛra woo en tari mi'ilum buna wa, gee yelemɛŋerɛ nɛreba basɛba boi mɛ ti ba suya ba' lu' la baga, tara tara la zina, ba kelum ti'iha dia ti ba di ti ba dikɛ ka kaabɛ bo' la baga, ti ba puti'ira la en ka kpe'em la nyaa galum ba.

⁸ “Dia kan ta'am tari tu lɛm Yinɛ.” Tu ka sagum tole tu han ka di ka, tu me ka nyani se'em tu han di ka.

⁹ Gee bihɛ ya mɛhi suŋa ti ya fai yɔ'ɔ wa da dɛna pirega lɔkɔ bo' sɛba en ka kpe'em la.

¹⁰ Se'ere en sɔi la, basɛba han nyɛ yamam sɛba en de mi'ilum duma wa ti ya boi baga zɔŋɔ puan dita, la kan bahɛ ti bamam sɛba puti'ira en ka kpe'em la me iŋɛ ba puti'irɛ ta paaɛ ze'sɛka ti ba me bɔta ti ba di dia n dikɛ kaabɛ bagerɛ?

¹¹ Bala, ya mi'ilum la zuo ti sɛba ti Kiresta ki bo' ba, gee ti ba nan ka kpe'em la nyɛta sageŋɔ.

¹² Gee fum han tuna fum yire duma be'em, pɔgelum ba puti'ira la en nan ka kpe'em la, fum tuni la Kiresta be'em.

¹³ Bala zuo, dia la en han sɔna ba lua, mam yi kan makɛ obe nɛŋɔ, la n da bahɛ ti ba ayima lu.