1 Korẽntɩ 7 - ZE'ELEGO PAALEGA

Pɔgedire yɛla

¹ Nananawa, han dɛna yelesɛ'a ti ya gulehɛ sɔkera la, yan yeti, “La ani suŋa ti buraa da kalum pɔka.”

² Gee yaluntuuma la zuo, buraa woo di a suure pɔga, ti pɔka woo me ele ka suure sira.

³ Sira la dela a naara la a pɔga lan nari se'em la , ti pɔka me naara la ka sira lan nari se'em la.

⁴ Se'ere en sɔi la, pɔka la ka sɔi ka mɛŋa iŋa la, gee sira la en sɔi, bala mɛa ti sira la me ka sɔna ka mɛŋa iŋa la, gee pɔka la en sɔi.

⁵ Da zagehere ya taaba, han dagena ti ya ku la nuurɛ la taaba saŋa ka yima puan, ti ya kaabɛ ya mɛhi bo' pu'uhegɔ. Gee bala han tole, ya lebe naaɛ taaba, ti Sagena la da makɛ ya bihɛ, yan ka ta' ya mɛhi tara la zuo.

⁶ Mam en yeti ya sɛla wa dela n yeen yele mɛ gee dagi nuurɛ ti n bo'.

⁷ Mam boti ni ti ya za'a ani ni wuu mam wa, gee nɛra woo tari la a bo'olum sebo ti Yinɛ dikɛ bo' en. Ayima tari la bo'olum buna, ti ayima me tara bo'olum buna.

⁸ Yamam sɛba en ka di pɔgeba bii ele sireba la, la pokɔpa la, mam yeti, la ani suŋa ti ya kelum bɔna bala ya ma'a woo mam n boi se'em wa.

⁹ Gee ba han ka zameha ba mɛhi ti ba tana ba mɛhi tara, ba di pɔgeba, bii ba ele sireba. Se'ere en sɔi la, la ani suŋa ti ba di pɔgeba bii ba ele sireba nyana kunkoma'ahum en kuuri ba.

¹⁰ Sɛba en tari pɔgeba la sireba la, mam bo' ya la nɔdina wa, dagi mam gee Daana la, ti pɔka da bahɛ ka sira.

¹¹ (Gee pɔka han bahɛ ka sira, ka da yi le ele, bii ka yi lebe ta naaɛ la ka sira la), ti sira me da lebehe a pɔga.

¹² Yamam sɛba en gee la me, mam n yeti se'ere n ŋwana gee dagi Daana la. Ti sakera han tara pɔga ti ka ka sakɛ bo' Yezu, gee bɔta ti ka bɔna la ka sira la, sira la da lebehe ka.

¹³ Pɔka han tara ka sira en ka sakɛ bo' Yezu, gee ti buraa la bɔta a bɔna la pɔga la, pɔka la da bahɛ buraa la.

¹⁴ Se'ere en sɔi la, sira wa en ka sakɛ bo' Yezu la lebege la tuulum nɛra, a pɔga wa zuo. Bala mɛa ti pɔgesɛka en ka sakɛ bo' Yezu la me wan lebege tuulum nɛra a sira la zuo. Han dagena bala, ba kɔma la kan dɛna tuulum kɔma. Gee lan de se'em la, ba dela tuulum kɔma.

¹⁵ Gee sɛba en ka dole Yezu la han bahɛ taaba, de dɛna bala, la han iŋɛ bala, buraa la bii pɔka la ka boi bobere puan. Suma'ahum zuo ti Yinɛ yi ya.

¹⁶ Gee ani n mi', Pɔka wa, fum ta baŋera la ti fum faaɛ fum sira la mɛ, sira wa, fum ta baŋera la ti fum faaɛ fum pɔga la mɛ.

Vom sebo ti Daana bɔta

¹⁷ Lan pun dɛna se'em woo, nɛrawoo vɔna vomsebo ti Daana la dikɛ bo' en la, vom sebo ti Yinɛ yi' ya ti ya vɔna la. Mam nɔze'elego en ŋwana bɔ'ɔra lageŋɔ duma la za'a.

¹⁸ Se'em boi ti ba pun ŋma en gee ti Yinɛ baŋɛ yi' en? A duma da zigera ti a saalum ŋmaa daalehum la bahɛ. Se'em boi ti Yinɛ yi' en gee ti a nan ka ŋma, a da zigera ti a ŋma.

¹⁹ Ŋmaa dagi sɛla, a ka ŋma me dagi sɛla, gee Yinɛ nɔze'elego la naŋa en de sɛla woo.

²⁰ Bahɛ ya ti nɛra woo ana wuu en daa boi se'em gee ti Yinɛ yi' en la.

²¹ Fum daa dela da'aberɛ gee ti Yinɛ yi' fum? Da bahɛ ti la daana hɔ, fum han pun wan nyaŋɛ faaɛ fum mɛŋa bɔna fai, dikɛ fum boi se'em zina wa tum gaŋɛ sɛla woo.

²² Se'ere en sɔi la, se'em ti ba yi' en ti a dɛna da'aberɛ Daana la puan, dela se'em en boi fai, dɛna Daana la dinɛ, wuu se'em en daa boi fai gee ti Yinɛ yi' fum ti fum dɛna da'aberɛ se'em bo' Kiresta la.

²³ Ba da' ya mɛ la da'alum, da deni ya da'aba bo' saaleba kpɛ'ɛnduma.

²⁴ Yan daa boi bɔnsɛka taaba gee ti Yinɛ yi' ya la, n suurɔ, kelum boni ya bala la Yinɛ.

Sɛba en ka ele bii di pɔgeba, la pokɔpa

²⁵ Nananawa, pɔgesakaha la me yele en ŋwana, Daana la ka bo' mam nuurɛ, gee mam bo'ori ya la n mɛŋa puti'irɛ, wuu se'em ti Daana la zɔ' n nimbu'ɔ ti n dɛna se'em ti ya wan nam la.

²⁶ Mam ti'iheri yeti, tumam en nyɛti daaŋɔ seko en boi la zuo, la wan ana suŋa ti ya kɔ'ɔm bɔna yan boi se'em la.

²⁷ Fum di la pɔga? Da zigera ti fum bahɛ ka. Fum ka tari pɔga? Da ɛɛra pɔga.

²⁸ Gee fum han di pɔga bii fum ele la sira, fum ka tum be'em. Pɔgesakãherɛ me han ele, a ka tum be'em. Gee sɛba en ele bii di pɔgeba la, ba wan nyɛ ɛregɔ, gee n boti n faaɛ ya mɛ yele ana wa puan bahɛ.

²⁹ Mam n yeti se'em wa la, n suurɔ, dela, sansɛka ti Yinɛ looe la ba'aheri mɛ n bala, bala nananawa yɛ'a ha, bahɛ ya ti sɛba en pun tara pɔgeba la, bɔna wuu ba ka tari la pɔgeba la,

³⁰ ti sɛba en kele, ana wuu ba ka kele me la, ti sɛba en nyɛɛni, ana wuu ba ka nyɛɛni me la, ti sɛba en da'ari kɔɔhera ana wuu ba ka tari mɛ la,

³¹ ti sɛba en tuni tiŋa wa zuo ana wuu ba ka tuni mɛ la. Se'ere en sɔi la, tinkana wa ba'aheri mɛ n bala.

³² Mam boti n faaɛ ya mɛ ninmu'urɛ puan bahɛ. Se'em n ka tari pɔga nini mu'ɛ mɛ la Daana la, en wan iŋɛ se'em ti Daana nini tigɛ.

³³ Gee se'em n tari pɔga nini mu'ɛ mɛ la tiŋa wa zuo yɛla, a biheri la en wan iŋɛ se'em pee a pɔga puurɛ,

³⁴ a puti'irɛ la dela buyi. Gee pɔge se'ehi en ka ele, la pɔgesakaha la nini mu'ɛ mɛ la Daana la, ti ba dɛna tuulum nɛreba inganɛ la Sia puan. Gee pɔge se'ehi en ele nini mu'ɛ mɛ la tiŋa wa zuo yɛla, eŋa n wan iŋɛ se'em pee a sira puurɛ.

³⁵ N tɔgeri yele ana wa woo la ya sum zuo, dagi la n gu'uri ya mɛ se'ere puan, gee n bahɛ ti sɛla woo dɔla ma'a ma'a, gee ti sɛla da gu' ya Yinɛ sore dɔlega la puan.

³⁶ Se'em han ta bihɛ ti a kan ta'am a mɛŋa tara la pɔgesakãherɛ la ti a bɔna la de la, a kunkoma'ahum han ba' zɔ'ɔra la pɔka la, wuu lan suni ti la ana se'em la, a di ka wuu en boti se'em la, la dagi be'em. Bahɛ ya ti ba di taaba.

³⁷ Gee se'em han zɛ'a kankaŋi en ku se'em a suure puan, ti pɛregerɛ ka bɔna gee tana a mɛŋa kunkoma'ahum tara, gee iŋɛ a suuren ti a kan kalum pɔgesakãherɛ la, la wan suŋɛ en.

³⁸ Bala la, se'em en di a pɔgesakãherɛ iŋɛ suŋa, gee fum se'em en ka di a pɔgesakãherɛ en gani za'a.

³⁹ Pɔka en ele boi la sire ele kiha puan, a sira n nan vɔi la. Gee a sira la han ki, a tari sore ti a malum ele eŋa en boti se'em, gee a ele doohe Daana sumboolum puan.

⁴⁰ Gee mam puti'irɛ puan, sum wan boni la pɔka la, ka han zi' ni bala ka ele. Mam ti'ihɛ ti mam me tari Yinɛ Sia la n puan mɛ.