1 Korẽntɩ 6 - ZE'ELEGO PAALEGA

Sakereba n tari taaba kina tugum zi'an

¹ Ya se'em han tara se'ere la a tadaana, a wan sakɛ tari dɛ kiŋɛ sɛba en ka dole Yezu la zi'an ti ba ta gakɛ ya, gana a tari kiŋɛ nɛresunduma la zi'an?

² Yamam ka mi' ti nɛresunduma la en wan ta gakɛ timpaberɛ wa? Yamam han wan ta gakɛ timpaberɛ wa, la iŋɛ la ŋwani ti ya kan gakɛ yele-pigehi wa?

³ Yamam ka mi' ti tumam en wan gakɛ suŋereba, nyaa benti yele ana wa?

⁴ Bala, ya han ni nyɛ yele pigehi ana wa, la dela ya digehɛ gakereba sɛba en ka boi lageŋɔ la puan ti ba gakɛ?

⁵ N yeti ya ŋwana ti vi en nyɔkɛ ya. La wan ta'am dɛna ti, nɛra yinɛ me ka boi ya puan tara yɛm wan ta'am maalɛ sakereba bayi tiŋasuka,

⁶ gee ti sakera tari sakera kiŋɛ tugum zi'an, sɛba en ka dole Yezu nɛŋan yele ana wa zuo?

⁷ Yelemɛŋerɛ, ya pun tara yɛla la taaba pun pa'alɛ ti ya koŋe mɛ en bala. Ŋwani ti yamam tugum ka bahɛ ti ba tuue ya? Ŋwani ti yamam tugum ka bahɛ ti ba fa' ya?

⁸ Vi ka tari ya, yamam mɛhi en tugum tuura, gee fãara, ti ba me dɛna ya sakereba taaba?

⁹ Yamam ka mi' ti be'emduma kan kɛ̃ Yinɛ sɔ'ɔlum la puan? Da pã'ahɛ ya mɛhi. Yalum duma, bage kaabereba, sɛba en tuni kabohi, pɔgenindɔɔrɔ la buraahi bii pɔgehi en gã' taaba,

¹⁰ nageyigehi, nyigereba dabugereba, tuureba, la fãareba, bana wa ayima kan kɛ̃ Yinɛ sɔ'ɔlum la puan.

¹¹ Gee bala ti ya sɛba daa ana. Gee ba pee ya mɛ, ba sukɛ ya mɛ, ba bo' ya la buurɔ tu Daana Yezu Kiresta yu'urɛ la, la tu Yinɛ Sia la puan.

Na'aha Yinɛ, inganɛ la Sia puan

¹² “Sɛla woo ka kihi bɔ'ɔra mam,” gee dagi sɛla woo en tari nyuurɔ. “Sɛla woo ka kihi bɔ'ɔra mam,” gee mam kan lebege da'aberɛ bo' sɛla.

¹³ “Dia dela puurɛ dinɛ, ti puurɛ me dɛna dia dinɛ,” gee Yinɛ wan sagum ba za'a. Inganɛ la ka boi la yaluntuuma zuo, gee de boi bo' la Daana la, ti Daana la me bɔna bo' inganɛ la.

¹⁴ Yinɛ en vo'e Daana la kum puan, gee me wan vo'e tumam me a paŋa la puan.

¹⁵ Ya ka mi' ti ya ihe la dela Kiresta dinɛ? Bala, n dikɛ Kiresta lɔgerɔ lebege yaalegɔ lɔgerɔ? La kan tum.

¹⁶ Ya ka mi' ti se'em woo en dikɛ a mɛŋa naaɛ la yalema, dela inganɛ deyina la en? Se'ere en sɔi la, la gulehɛ yeti, “Bayi' la wan lebege inganɛ deyina.”

¹⁷ Gee se'em woo en dikɛ a mɛŋa naaɛ la Daana la dela buyina la en Sia puan.

¹⁸ Zagehɛ yaluntuuma, se'ere en sɔi la, be'em sebo woo ti nɛra tum ni dɛna la iŋa la yiŋa na. Gee yaluntuuma daana galum la iŋa la za'a.

¹⁹ Bii ya ka mi' ti ya iŋa la dela pu'uhegɔ yire bo' Fa'a Sia la en boi la ya la, se'em ti ya daa to'e Yinɛ zi'an la. Bala, ya ka le sɔna ya mɛhi?

²⁰ Se'ere en sɔi la, ba da' ya mɛ la da'alum, bala zuo, na'ahɛ ya Yinɛ la ya inganɛ la.