1 Korẽntɩ 5 - ZE'ELEGO PAALEGA

Yalum tuuma

¹ Ba kɔ'ɔm yele mam mɛ ti galehi en boi ya puan. Galehi sɛ'a taaba en pun ka bɔna sɛba en ka dole Yinɛ puan. Beni zuo, buraa en boi ya puan gã'a la ka sɔ pɔga.

² Gee ti ya tugum ukera. La dagi ni la ya tugum kɛla, gee ti se'em en tum tuun-dina wa la, ya fooe ni en ya puan bahɛ?

³ La mam pun ka bɔna la ya inganɛ puan la, n boi la ya mɛ Sia puan, ti lan ani wuu mam boi mɛ la ya mɛ la, mam pun purɛ la gakerɛ,

⁴ Daana Yezu yu'urɛ la puan bahera buraa sɛka en tum tuun-dina wa taaba wa zuo. Bala ya han ta lagehɛ, ti n sia bɔna la ya, la Daana Yezu paŋa la,

⁵ ya dela ya dikɛ nɛre-ina daana bo' Sagena la ti a sagum a inganɛ la, gee ti a sia ta nyɛ faarɛ Daana dabeherɛ la puan.

⁶ Ya pa'ali mɛŋa la ka tari vuurɛ, yamam ka mi' ti dabelɛ fii wa en ni bahɛ ti zom la za'a ihegera?

⁷ Pee ya dabelɛ kɛka la bahɛ, la ya ta'am dɛna dabelɛ paalum ma'a, wuu dabelɛ en sirum ka boi ya puan se'em wa la. Se'ere en sɔi la, ba kaabɛ tu azɔɛtole pebila la en de Kiresta la mɛ.

⁸ Bala zuo, bahɛ ya ti tu de'em ya de'eŋo wa, dagi la dabelɛ kɛka la en de pa'ahegɔ, la be'em dabelɛ la, gee tu de'em ku la boroboro zaŋa la en de sira, la susunɛ.

Galeŋɔ dela ba gakɛ

⁹ Mam daa gulehɛ n gɔŋɔ la puan yeti ya da dikɛ ya mɛhi lagum la sɛba en tuni galeni ba mɛhi la,

¹⁰ ka pa'alɛ la fii me ti sɛba en ka dole Kiresta tiŋa wa zuo la, bii sɛba en nyigere, la fãareba, bii bage kaabereba. La han dɛna bala, la yi dela ya bahɛ tiŋa wa zuo en bala.

¹¹ Gee nananawa, mam en gulehɛ yɛta ya se'em dela, ya da dikɛ ya mɛhi naaɛ la se'em en yi'iri a mɛŋa ya suuɔ, gee yaala, nyigera, bii kaabera baga, bii nɛreba tua, dabugere, bii fãara. Da pun naaɛ la ena daana di.

¹² Han dagena bala, mam yeti n gakɛ sɛba en ka dole Kiresta iŋɛ la beni? La dagi la sɛba en dole Yinɛ la en de tu gakɛ?

¹³ Yinɛ mɛŋa en wan gakɛ sɛba en ka dole Kiresta la. “Fooe ya be'em daana la ya puan bahɛ.”