1 Korẽntɩ 4 - ZE'ELEGO PAALEGA

Yezu tuntuneba tuuma

¹ Bala, yeen dikɛ ya tu ŋwana, ti tu dela Kiresta yamehi, tu dela sɛba en biheri Yinɛ sugelum yɛla la.

² Se'ere en gani bala dela, la dele sɛba en biheri Yinɛ lɔgerɔ la ti ba dɛna sɛba ti nɛreba wan nam ba.

³ Gee han dɛna mam, la dela yelepika bo' mam, ti yamam gakɛ mam, bii saaleba tugum zi'an gakɛ mam. Mam mɛŋa pun ka gakera n mɛŋa.

⁴ Mam ka nyɛ se'ere ti mam tuue n mɛŋa, gee la bala za'a, mam ka piiɛ. La dela Daana la ma'a en gakeri mam.

⁵ Bala, da gakɛ ya gee ti saŋa la nyaa paaɛ, gee ti Kiresta nyaa wa'am na, eŋa se'em daana en wan bahɛ ti sɛlawoo en sugɛ lika puan nananawa niiɛ peelumen, gee lilege suure puan yɛla la. Bilam ti nɛrawoo nyaa wan to'e a pɛka Yinɛ zi'an.

⁶ Mam bahɛ ti Apolos la mam mɛŋa dɔla yele ana mɛ yamam sum zuo, n suurɔ wa, ti ya zamehɛ tumam puan, la ya se'em da vɔna zɔɛ sɛla en gulehɛ la. Ŋwana ti ya se'em kan ukera a mɛŋa la eŋa en boti se'em gana se'em la zuo.

⁷ Beni zuo, ani en nyɛ sɛla en boi la tɔka fum puan? Beni ti fum tara gee ka to'e de Yinɛ zi'an? Fum han to'e la Yinɛ zi'an, ŋwani ti fum ŋmɛ'ɛra nyu'ɔ wuu la dagi la bo'olum ti ba dikɛ bo' fum?

⁸ Bala! Yamam pun tara sɛla woo ti ya bɔta la mɛ! Yelemɛŋerɛ ya pun dɛna la buntateba? Ya pun lebege la naduma ti tumam ka te'ele ya? Mam boti ni ti ya sirum lebege ni la naduma, ti tumam me deni naduma la ya.

⁹ Mam ti'ihɛ ti Yinɛ ka kãalɛ tumam tuntuneba wa pa'ahɛ nɛreba puan, beni zuo, tu ani wuu ba maahum tu yɛ'a la kua la, beni zuo, ba dikɛ tu diilɛ mɛ bo' timpaberɛ wa, la suŋereba, la saaleba.

¹⁰ Bala! Tumam nyaa dela geto Kiresta zuo, gee ti yamam dɛna yɛm duma Kiresta puan. Tumam tari la tɔregɔ, gee yamam dɛna paheduma. Yamam dela zuto duma, gee tumam dɛna fagehum duma.

¹¹ Wa'am na paaɛ tumam en kɔ'ɔm zɛ'a wa, kom la ko'nyuurɔ en kuuri tɔ, tu yɛ la lɔge-ãahema, ti ba ŋmɛ'ɛra tɔ, tu ka tari yire wan kɛ̃,

¹² tu taregerɛ mɛ la tu mɛhi nu'uhi tuuma. Ba han ni to' tɔ, tu ni ka' la sum bo' ba duma. Ba han mɛlehɛ tɔ, tu ni ŋmibe mɛ,

¹³ ba han ni zɛregɛ tɔ, tu ni lebehe mɛ la kɔsuŋa. Tumam ani wuu tu dela tiŋa wa zuo sɔgerɔ la, dɛna sɛla woo bunkɛhela wa'am na paaɛ zina.

Sɔ kã'aŋɔ

¹⁴ Mam ka gulehɛ ŋwana ti n bahɛ ti vi en nyɔkɛ ya, gee n ka'am ya, wuu yan de n sunɔŋerɛ kɔma la.

¹⁵ Ya ta'am tara bihereba tuha pia Kiresta puan, gee ya ka tari sɔduma zo'e. Yelemɛŋerɛ, Kiresta Yezu puan, ti mam lebege ya sɔ, faarɛ yelehum wa zuo.

¹⁶ Ŋwana zuo, mam beleni ya mɛ, ti ya tɔgeha mam.

¹⁷ Dina wa zuo ti n tum Timoti, se'em en de mam sunɔŋerɛ la n sakerɛ dayua Daana la puan, ti a tiihɛ ya mam n dole Kiresta Yezu yɛla la se'em, wuu mam en pa'ali a se'em zi'an woo, la Lageŋɔ woo puan se'em la.

¹⁸ Gee ya sɛba en ti'iheri ti mam kan le wa'am ya zi'an na la, lebege la nɛrewureba.

¹⁹ Gee n wan wa'am ya zi'an nananawa na, la han dɛna Daana la suboolum, la n baŋɛ, dagi la nɛrewureba wa yetɔgum la ma'a, gee ba paŋa la me.

²⁰ Se'ere en sɔi la, Yinɛ sɔ'ɔlum la dagi la tugum ma'a, gee paŋa.

²¹ Beni ti ya wan bɔta? N wa'am ya zi'an na la kpa'aherɛ bii, nɔŋerɛ la sigehe mɛŋa?