1 Korẽntɩ 3 - ZE'ELEGO PAALEGA

Korinti lageŋɔ bɔgehegɔ suhega

¹ Bala la, n suurɔ, mam ka ta'am ni tɔgɛ bo' ya wuu sɛba ti Fa'a Sia la bɔna la ba, gee en tugum tɔgɛ bo' ya wuu sɛba ti Sia la ka bɔna ba puan la. Wuu ya dela kɔma Kiresta puan la.

² Mam bo' ya la bi'ihum, gee dagi dikpe'ene, se'ere en sɔi la, ya daa ka maahum ti ya di dikpe'ene. La nananawa me, ya pun kelum ka maahum,

³ beni zuo, ya kelum bɔna la ingɔŋɔ puan. Nyuure la nɔkpɛ'ɛma en kelum bɔna ya puan wa, ya ka boi la ingɔŋɔ puan wa, ita saaleba itegɔ?

⁴ Beni zuo, ya ayima han yeti, “Mam dole la Pɔɔl,” ti ayima yeti, “Mam dole la Apolos,” ya kɔ'ɔm ka ita la nɛresaalenɛ en bala?

⁵ Ani en de Apolos? Ti ani dɛna Pɔɔl? Ba za'a dela yamehi se'ehi ti ya doohe ba puan baŋɛ Yinɛ, wuu Daana la en bo' ba ayima ayima se'em la.

⁶ Mam burɛ mɛ, ti Apolos bahɛ ko'om. Gee Yinɛ en bahɛ ti la yehe na.

⁷ Bala, dagi se'em en burɛ la, bii se'em en bahɛ ko'om la en de sɛla, gee Yinɛ ma'a, se'em en bahɛ ti la yehe la.

⁸ Se'em en burɛ la, la se'em en bahɛ ko'om la dela buyina, ti ba ayima woo wan to'e a yɔɔrɛ doohe la ba ayima woo tuuma en de se'em.

⁹ Tumam dela Yinɛ yamehi, tuna la taaba; Yamam en de Yinɛ va'am, dɛna Yinɛ yire.

¹⁰ Doohe la Yinɛ zu'uhegɔ ti a zu'uhɛ mam la, mam ani mɛ wuu se'em en mi' mɛa, iibɛ ɛ̃berɛ la biŋe, ti ayima me wa'am na mɛ dɔgelɛ. Mɛta wuu dela a bihɛ suŋa en wan mɛ se'em dɔgelɛ de zuo.

¹¹ Se'ere en sɔi la, nɛra ka boi wan ta'am iibɛ ɛ̃berɛ deyima me, han dagena ɛ̃berɛ se'ere ti ba pun iibɛ la. Ɛ̃berɛ dinɛ dela Yezu Kiresta.

¹² Bala, se'em han mɛta ɛ̃berɛ wa zuo mɛ la salema, salempɛɛla, kugesuma, dɔɔrɔ, kinka, la muɔ,

¹³ mɛta woo tuunɛ wan ta niiɛ na, se'ere en sɔi la, dabeherɛ la daarɛ wan niiɛ dɛ na, beni zuo, bugum en wan ta bahɛ ti de niiɛ na, bugum la wan magehɛ tuunse'ere taaba ti nɛra woo tum la bihɛ.

¹⁴ Ti sɛla en dikɛ mɛ dɔgelɛ ɛ̃berɛ la zuo la han ka di, mɛta la wan to'e yɔɔrɛ.

¹⁵ Gee mɛta la tuunɛ la han di bugum, mɛta la namehɛ bahɛ la yoo. A mɛŋa wan nyɛ faarɛ, gee la wan ana en wuu a doohe la bugum puan tole la.

¹⁶ Yamam ka mi' ti ya dela Yinɛ yire, ti Yinɛ Fa'a Sia la bɔna ya puan?

¹⁷ Ya se'em han sagum Yinɛ yire wa, Yinɛ me wan sagum a daana. Se'ere en sɔi la, Yinɛ yire la dela fa'a, ti yamam en dɛna Yinɛ yire la.

¹⁸ Da pã'ahɛ ya mɛhi. Ya han ti'ihɛ ti yamam en de yɛm duma buuri sankana wa puan, ya tugum lebege geto, la ya ta'am nyɛ yɛm.

¹⁹ Se'ere en sɔi la, tiŋa wa zuo yɛm dela gɔɔnɛ Yinɛ zi'an. Beni zuo, la gulehɛ yeti, “Yinɛ nyɔgere yɛm duma mɛ ba mɛhi nyaleŋɔ puan,”

²⁰ le yɛ'ɛha, “Daana la mi' yɛm duma ti'ihegɔ mɛ, ti ba ka tari vuurɛ.”

²¹ Bala, se'em da ŋmɛ'ɛra nyu'ɔ la saaleba kpe'eŋo. Se'ere en sɔi la, sɛlawoo dela ya dinɛ,

²² la dɛna Pɔɔl, bii Apolos, bii Sefase, bii timpaberɛ wa, bii vom, bii kum, bii zina, bii beere yele, la woo dela ya dinɛ,

²³ ti yamam me dɛna Kiresta dinɛ, ti Kiresta me dɛna Yinɛ dinɛ.