1 Korẽntɩ 2 - ZE'ELEGO PAALEGA

Kiresta kpa'a muulegɔ

¹ Mam n wa'am ya zi'an na la n suurɔ, mam ka wa'am na muula Yinɛ sugelum yelehum la la yɛm kirega sɛka bii nɔmaalum puan bɔ'ɔra ya.

² Beni zuo, mam daa iŋɛ n puti'irɛ ti n ka boti n baŋɛ se'ere ya puan, han dagena Yezu Kiresta, la ban en kpa' en la ma'a.

³ N wa'am ya zi'an mɛ na la tɔregɔ, la dabeem la gbi'a zo'e zo'e.

⁴ Mam tugum, la n muulegɔ la daa dagi pã'ahegɔ yetɔgum, gee Sia la tuuma, la paŋa,

⁵ ti la bahɛ ti ya sakerɛ la da yaga asaala yɛm zuo, gee Yinɛ paŋa puan.

Yinɛ yɛm

⁶ Gee la bala za'a, sɛba en bi'ɛ sakerɛ puan la, ti tari yɛm tɔgera mɛ, gee dagi zina beere yɛm wa puan, bii pahi se'ehi en sɔi zina beere wa biha, gã'a gura sageŋɔ paaɛ si wa.

⁷ Gee tumam tɔgeri la Yinɛ yɛm en sugɛ, yele sɛ'a ti nɛreba ka mina, ti Yinɛ yuum pun tɔgɛ a yele ti tiŋa wa nam pun ka naam, tumam tibehum zuo.

⁸ Se'em ka boi sankana na'duma wa puan bɔkɛ yele ana wa; Ba han bɔkɛ ni mɛ, ba kan kpa' ni Tibehum Za'a Daana la.

⁹ Gee wuu lan gulehɛ se'em yeti, “Sɛla ti niho ka tabelɛ nyɛ, bii tuberɛ wum, bii asaala suure tabelɛ bɔkɛ dɛ, Sɛla ti Yinɛ maahum biŋe sɛba en nɔŋɛ en la” —

¹⁰ Yele ana ti Yinɛ niiɛ pa'alɛ tumam doohe Sia la puan. Se'ere en sɔi la, Sia la mi' sɛla woo mɛ, pun ta ta' yele sɛ'a en sugɛ Yinɛ zi'an.

¹¹ Asaala ini en wan ta'am mina sɛla en sirum de asaala, han dagena asaala sia la en boi a puan la? Bala mɛa ti se'em ka bɔna wan bɔkɛ sɛla en sirum de Yinɛ yele, han dagena Yinɛ Sia la.

¹² Nananawa, han dɛna tumam, tumam ka to'e la tiŋa wa zuo sia la, gee Sɛsɛka en ze'ele Yinɛ zi'an na, ti tu ta'am bɔkera bo'olum sebo ti Yinɛ ka'ɛ bahɛ tu zuo la.

¹³ Ti tumam tɔgera yele ana wa mɛ dagi la asaala pa'alegɔ yɛm puan, gee Sia la pa'alegɔ. Lɛregera Sia puan yɛla pa'ala sɛba en tari Sia la.

¹⁴ Sɛba ti Sia la ka bɔna la ba la, ka to'ore Yinɛ Sia bo'olum la, se'ere en sɔi la, ba ka tari vuurɛ bo' ba, ti ba me kan ta'am bɔkɛ ba, se'ere en sɔi la, ba dela Sia puan yɛla.

¹⁵ Sɛba ti Sia la bɔna la ba la bɔkeri sɛla woo mɛ, ba ka boi nɛra nu'uhi ti a bihera ba.

¹⁶ Se'ere en sɔi la, “Ani en mi' Daana la puti'irɛ, wan ta'am pa'alɛ en?” Gee tumam tari la Kiresta puti'irɛ.