1 Korẽntɩ 16 - ZE'ELEGO PAALEGA

Korintiduma bu'a

¹ Nananawa, lige lagehegɔ la ti ya yeti ya lagehɛ bo' nɛresunduma la, doohe ya mam en pa'alɛ Galatia lageŋɔ duma la se'em la.

² Dabeha ayopɔi woo pɔhega daarɛ, nɛra woo ni yehe en nyɛ nyuurɔ se'em la puan biŋe, ti la de ta dɛna ya lagehɛ, n han ta wa'am na.

³ N han ta paaɛ na, n wan tum se'em ti ya wan looe la, la gɔnɔ seto n pa'alɛ ti tu mi' en, ti a tari ya bo'olum la kiŋɛ Yerusalɛm.

⁴ La han le nara ti n me kiŋɛ, ba wan kɔlegɛ mam.

Sore kinɛ maaheŋɔ

⁵ N wan doohe na limehe ya guum n han ta kaaɛ Masedoniya duma ba'ahɛ, se'ere en sɔi la, mam iŋɛ n puti'irɛ ti n kaaɛ la Masedoniya ba'ahɛ,

⁶ gee daanse'ere n wan bɔna la ya, bii n pun ta bɔna la ya ɔɔrɔ saŋa la puan, ti ya bahɛ mam ti n kiŋɛ mam boti n kiŋɛ zi'an woo.

⁷ N ka boti n nyɛ ni ya nananawa n tɔlega wa puan, se'ere en sɔi la, n boti ni ti n kɛ̃ ni la ya dabeha ayi', Daana la han bo' sore.

⁸ Gee n wan bɔna Ɛfisu ta paaɛ dabeha pinuu de'eŋo la,

⁹ Se'ere en sɔi la, kulenkãtɛ en yu'ɛ bo' mam ti n tum tuuma n tari zuo, gee dinduma en zo'e.

¹⁰ Timoti han ta wa'am na, da iŋɛ ya sɛla ti a zɔta ya dabeem, se'ere en sɔi la, a kɔ'ɔm tuna Daana tuuma la mɛ wuu mam la.

¹¹ Bala la, da bahɛ ya ti se'em zeem en. Suŋɛ ya en ti a kiŋɛ a sore la la suma'ahum, ti a ta'am wa'am n zi'an na, se'ere en sɔi la, mam guri en mɛ la suurɔ tuseto la.

¹² Nananawa, han dɛna tu suuɔ Apolos yele, mam yele en mɛ la ninmu'urɛ ti a wa'am na bihɛ yamam, la suurɔ tuseto la, gee a pun ka bɔta la fii me ti wa'am na nananawa na. A han ta nyɛ yɔ'ɔ a wan wa'am na.

Ba'ahegɔ yelehum, la pu'uhegɔ

¹³ Biheri ya suŋa, ze' ya kankaŋi ya sakerɛ la puan, kpemehe ya ya mɛhi, gee kpe'em.

¹⁴ Bahɛ ya ti sɛla woo ti ya ita, ya ita dɛ la nɔŋerɛ.

¹⁵ Nananawa, n suurɔ, ya mi' ti Stefanase yire duma n de yia duma ti ba tee Akaiya tiŋa puan, gee me kaabɛ ba mɛhi tuna bɔ'ɔra nɛresunduma la.

¹⁶ Mam ka'ani ya mɛ ninmu'urɛ ti ya dikɛ ya mɛhi tuna tuun aŋa taaba bɔ'ɔra nɛrebamam taaba, la sɛba woo en tuni gee wɔbegera muregere la ba.

¹⁷ Mam puurɛ pee mɛ la Stefanase, Fotunatuse la Akaikus kinɛ na la, se'ere en sɔi la, ba sooe la ya na'arɛ.

¹⁸ Ba bugelɛ la mam suure la yamam suure. Bala, to'e ya nɛrebana wa la na'ahegɔ.

¹⁹ Lageŋɔ seto n boi Esiya pu'uhi ya na. Akuila la Pirisika ta ta' la lageŋɔ la en boi ba yire puan la pu'uhi ya suŋa suŋa Daana la puan.

²⁰ Suurɔ la za'a pu'uhi ya na. Pu'uheri ya taaba la yelemɛŋerɛ kɔkerɛ.

²¹ Mam Pɔɔl n gulehɛ pu'uhi kuna la n mɛa nu'o pu'uhera ya na.

²² Bahɛ ya ti ka'be'o dɔla se'em woo n ka nɔŋɛ Daana la. Maranata! (De vuurɛ dela, “Tu Daana, wa'am na.”)

²³ Daana Yezu zu'uhegɔ bɔna la ya.

²⁴ Mam nɔŋerɛ bɔna la ya za'a Kiresta Yezu puan.