1 Korẽntɩ 15 - ZE'ELEGO PAALEGA

Kiresta vo'ore

¹ Nananawa n wan tiɛ ya n suurɔ, faarɛ yelehum la ti n muulɛ bo' ya la, sɛ'a ti ya to'e, gee sɛ zɛ'a a puan la,

² yelehum sebo puan ti ya nyɛ faarɛ, doohe ya han gurɛ yelehum la ti n muulɛ bo' ya la kankaŋi, han dagena ti ya yeen sakɛ la yoo.

³ Se'ere en sɔi la, mam bo' ya la sɛla n de ninmu'urɛ yele yia ti mam to'e de. De dela, Kiresta ki bo' la tumam be'em, doohe gulehegɔ la,

⁴ ti ba laaɛ en, ti a vo'e dabeha atã daarɛ, wuu lan gulehɛ se'em la,

⁵ ti bilam pooren, ti a niiɛ a mɛŋa pa'alɛ Sefase, gee nyaa niiɛ a mɛŋa pa'alɛ pia la bayi' la.

⁶ Gee nyaa le ta niiɛ a mɛŋa pa'alɛ suurɔ en gani kɔbehi sinuu bɔbeyinɛ, ti ba puan basɛba kelum vɔna la zina, ti basɛba me ki.

⁷ Ti a nyaa ta niiɛ a mɛŋa pa'alɛ Yemesi, gee niiɛ a mɛŋa pa'alɛ a tuntuneba la za'a.

⁸ Ba'ahegɔ za'a, a niiɛ a mɛŋa pa'alɛ la mam se'em en ani woo nɛra en ka bi'ɛ gee ti ba dɔgɛ en la.

⁹ Se'ere en sɔi la, mam n pɔ'ɛ Yezu tuntuneba la puan, ka nara ti ba yi'ira mam a tuntuna, se'ere n sɔi la, mam n daa dole mɛleha Yinɛ lageŋɔ la.

¹⁰ Gee Yinɛ zu'uhegɔ la zuo, mam dela mam en de se'em la, ti a zu'uhegɔ la ti a dikɛ bo' mam la me ka bahɛ yoo. Gee mam tugum tum mɛ paaɛ paaɛ gaŋɛ ba za'a. La dagi mam mɛŋa paŋa, gee Yinɛ zu'uhegɔ la n boi la mam la.

¹¹ Bala zuo, la dɛna mam bii bamam, tumam en muulɛ se'em n bala, ti bala mɛa ti yamam me wa'am na nam.

Kum Vo'ore

¹² Nananawa, ba han muula ti Kiresta vo'e mɛ a kum puan, ŋwani ti ya basɛba wan yeti, vo'ore ka boi bɔ'ɔra sɛba n ki la?

¹³ Vo'ore han ka bɔna bo' sɛba n ki la, Kiresta yi ka vo'e.

¹⁴ Ti Kiresta me han ka vo'e, tu muulegɔ la ye dela yoo, ti ya sakerɛ la me dɛna yoo.

¹⁵ Tumam pun nyaa dɛna la pumparenduma bo' Yinɛ. Se'ere en sɔi la, tumam yeti, Yinɛ vo'e Kiresta mɛ, gee ti a me ka vo'e en, la han sirum dɛna yelemɛŋerɛ ti sɛba n ki, ka vo'ore.

¹⁶ Se'ere en sɔi la, sɛba n ki la han ka vo'e, Kiresta mɛ ka vo'e.

¹⁷ Kiresta han ka vo'e, ya sakerɛ la yi dela zaŋa, ti ya kelum bɔna la ya be'em la puan.

¹⁸ Ti sɛba n ki Kiresta puan la me, bahɛ yoo.

¹⁹ La han dɛna la tiŋa wa zuo vom ma'a zuo ti tu tara puti'irɛ Kiresta puan, tumam n yi de nimbaalega duma gana nɛra woo.

²⁰ Gee yelemɛŋerɛ la dela, Kiresta vo'e mɛ kum la puan, dɛna kum vo'ore walediinɛ bo' sɛba woo en ki la.

²¹ Wuu kum n doohe asaala puan wa'am na la, bala mɛa ti vo'ore me doohe asaala puan wa'am na.

²² Se'em woo n yehe Adam puan na n kiiri se'em la, bala mɛa ti se'em woo n yeheri Kiresta puan na wan vɔna.

²³ Gee nɛreba la woo tari la ba sore ba sore ti ba wan vo'e. Kiresta n de walediinɛ la, a lɛbega na, sɛba n de a dinɛ la wan vo'e.

²⁴ Gee ti ba'ahegɔ la nyaa wa'am na, Kiresta han ta dikɛ sɔ'ɔlum la bo' Yinɛ en de Sɔ la, bala ma'a ti a pun sagum bihereba woo, la kpe'eŋo woo, la paŋa woo en zaberɛ la Yinɛ mɛ.

²⁵ Se'ere en sɔi la, Kiresta ba'ahum dɛna naba, gura ti “Yinɛ dikɛ a dinduma za'a biŋe a nama tiŋa.”

²⁶ Dima sɛka ti a wan sagum ba'ahegɔ za'a dela kum.

²⁷ Se'ere en sɔi la, “Yinɛ dikɛ sɛlawoo biŋe la Kiresta nama tiŋa.” Gee lan yeti, “Sɛla woo boi la a nama tiŋa la,” la niiɛ mɛ ti, se'em daana en dikɛ sɛla woo iŋɛ Kiresta nama tiŋa la mɛŋa ka lagum pa'ahɛ bini.

²⁸ Sɛla woo han dikɛ bo' Kiresta, Kiresta en de Dayua la mɛŋa me wan bɔna se'em daana en dikɛ sɛla woo iŋɛ a nu'uhen la me nu'uhen, ti Yinɛ nyaa sɔna sɛla woo, gee bɔna sɛla woo puan.

²⁹ Han dagena bala, nɛrebana wan iŋɛ la ŋwani? Bama sɛba en to'ohe ko'om sua bɔ'ɔra sɛba n ki la? Han dɛna ti sɛba n ki la kan vo'e, ŋwani ti nɛreba tɔ'ɔha ko'om sua bɔ'ɔra sɛba n ki la?

³⁰ Gee ŋwani ti tumam pɔ̃hera tu nyuurɔ saŋa woo?

³¹ Mam kiiri la daarɛ woo. La dela yelemɛŋerɛ n suurɔ, wuu mam ŋmɛ'ɛri n nyu'ɔ ya zuo se'em la. Nyɔ'ɔ ŋmɛ'sɛka ti mam ŋmɛ'ɛra Kiresta Yezu en de tu Daana la puan.

³² La han yeen dɛna la mam puti'irɛ boi la nɛresaala vom wa ma'a puan zuo, ti mam ta zabera la nɛreba en ani wuu muuen duhi Ɛfisu, beni nyuurɔ ti n wan nyɛ ni de puan? La han dɛna ti sɛba n ki la ka vo'ore, “Yi bahɛ ya ti tu dita gee nyuura, se'ere n sɔi la, beere ŋwana ma'a ti tu ki ya.”

³³ Da bahɛ ya ti se'em pa'ahɛ ya. “Nɛreyaalehi sageni la vom sumɔ.”

³⁴ Sigehe ya mɛhi, gee nyɛ putɛ'sunɛ, la ya da le tum be'em. Se'ere en sɔi la, nɛreba basɛba ka mi' Yinɛ. N yeti dɛna wa ti la dɛna la vi bo' ya.

Vo'ore iŋa

³⁵ Gee basɛba wan soke yeti, “ Kum ta vo'ore la ŋwani? Beni ihe taaba ti ba wan tara?”

³⁶ Gerego wa, sɛla ti fum burɛ kan ta'am yehe na, han dagena la pu'ɛ mɛ nyaa bule yehe na.

³⁷ Sɛla ti fum burɛ la me, fum ni ka burɛ la naanɛ en wan yehe na la, gee fum ni burɛ la biiliho en de wuu, mui, bii biili sɛ'a.

³⁸ Gee Yinɛ en bo'ori naanɛ la eŋa en boti de se'em. A bo'ori biileho woo mɛ la bu naanɛ.

³⁹ Dagi naanɛ woo en ŋwani taaba, gee saaleba tari la iŋa kayima, ti duhi me tara iŋa kayima, ti niihe me tara naanɛ deyima, ti zim me tara iŋa kayima.

⁴⁰ Saazuo ihe boi mɛ, ti tiŋa wa zuo ihe me bɔna. Gee saazuo ihe la suŋa boi mɛ ti tiŋa wa zuo ihe suŋa me bɔna.

⁴¹ Wuntɛɛŋa suŋa boi mɛ, ti ŋmarega suŋa bɔna, ti ŋmarebibehi me suŋa bɔna. Yelemɛŋerɛ ŋmarebibehi suŋa boi la yima yima la taaba.

⁴² Bala mɛa ti la wan ana la kum en wan ta vo'e la. Sɛla en burɛ pu'uri mɛ, gee sɛla ti ba vo'e ka pu'uri.

⁴³ Ba buti la dɛgerɔ puan, gee vɔ'ɔra suŋa puan. Ba buti mɛ la tɔregɔ, gee vɔ'ɔra la paŋa.

⁴⁴ Ba buti la ingɔŋɔ iŋa puan, gee ba vo'ore la sia iŋa puan. Ingɔŋɔ puan iŋa han bɔna, sia puan iŋa me boi mɛ.

⁴⁵ Bala ti la gulehɛ yeti, “Yia buraa, Adam la, lebege la asaala”, gee pooren Adam la lebege la sɛsɛka en bo'ori vom.

⁴⁶ Gee la dagi sia iŋa la en de yia, gee ingɔŋɔ iŋa la. Nyaa bo' sia iŋa la.

⁴⁷ Yia buraa la dela la timpaberɛ wa zuo dinɛ, a dela tintɔnɔ nɛra. Yi'i buraa la dela saazuo nɛra.

⁴⁸ Wuu tintɔnɔ nɛra la n ani se'em la, bala mɛa ti sɛba n de tintɔnɔ nɛreba la ana. Wuu saazuo nɛra la n ani se'em la, bala mɛa ti sɛba n de saazuo nɛreba la ana.

⁴⁹ Wuu tumam n tari tintɔnɔ nɛra la naanɛ se'em la, bala mɛa ti tu wan tara saazuo nɛra la me naanɛ.

⁵⁰ Sɛla ti mam yɛta wa n suurɔ, dela dina wa: Ingɔŋɔ la ziim kan ta'am to'e Yinɛ sɔ'ɔlum. Bii sɛla en pu'uri to'e sɛla en ka pu'uri.

⁵¹ Kelehe ya, n wan yele ya sɛla en sugɛ. Yelemɛŋerɛ tu za'a kan ki, gee tu za'a wan ta tee,

⁵² saŋa pika pika puan, wuu niho en kpamehɛ la puan, ba'ahegɔ tintanɛ la peebego puan. Se'ere en sɔi la, tintanɛ wan ta peebe, ti sɛba n ki wan vo'e kan le pu'ɛ, gee han dɛna tumam tu inganɛ wa wan tee.

⁵³ Se'ere en sɔi la, ingɔŋɔ seko en pu'uri wa wan ta tee yɛ ingɔŋɔ seko en ka pu'uri, ti ingɔŋɔ seko en kiiri wan ta tee yɛ ingɔŋɔ seko en ka kiiri.

⁵⁴ Ingɔŋɔ seko en pu'uri wa han tee yɛ ingɔŋɔ seko en ka pu'uri, ti ingɔŋɔ seko n kiiri wa ta tee yɛ ingɔŋɔ seko en ka kiiri la, bala ti yetɔge sebo ti ba gulehɛ la nyaa wan wa'am yelemɛŋerɛ na. Ba gulehɛ yeti, “Ba vole kum mɛ, la nyaŋerɛ.”

⁵⁵ “Kum, fum nyaŋerɛ la bɛɛ? Kum, fum duŋa la bɛɛ?”

⁵⁶ Kum duŋa dela be'em, ti be'em paŋa dɛna kiha la.

⁵⁷ Gee pɛka dɛna Yinɛ dinɛ, se'em n bo'ori tu nyaŋerɛ doohe tu Daana Yezu Kiresta puan.

⁵⁸ Bala, n sunɔŋerɛ duma wa, ze' ya kankaŋi, da bikeri ya, kɔ'ɔm boni ya Daana la tuuma puan saŋa woo malum pa'ahera, se'ere en sɔi la, ya mi' ti Daana la puan ya tuunkãra la kan bahɛ yoo.