1 Korẽntɩ 14 - ZE'ELEGO PAALEGA

Purega la yetɔgum buuri buuri bo'olum

¹ Ɛ ya nɔŋerɛ ninmu'urɛ, gee me mu'ɛ nini ti ya nyɛ Sia yɛla, yele yele wuu purega bo'olum.

² Se'ere en sɔi la, sɛba n tɔgeri buuri buuri yetɔgum la ka tɔgeri bɔ'ɔra la nɛreba gee Yinɛ. Beni zuo, nɛra ka boi bɔkera ba. Ban tɔgeri sɛla en sugɛ Sia puan la zuo.

³ Gee zi'an kayima me, puteba la, tɔgeri bɔ'ɔra la nɛreba, ti la mɛ ba, gee kpemehe ba, gee bugelɛ ba suya.

⁴ Se'em en tɔgeri buuri buuri yetɔgum la mɛti la a mɛŋa, gee se'em en puti la mɛti la lageŋɔ la.

⁵ Lan de se'em dela, mam wan boti ni ti ya za'a tɔgera yetɔgum buuri buuri la, gee n wan ba' boti ni ti ya puta. Se'em en puti la gani se'em en tɔgeri yetɔgum buuri buuri la mɛ, han dagena nɛra en boi lerege a yetɔgum la, ti bu mɛ lageŋɔ la.

⁶ Bala, n suurɔ, mam han wa'am ya zi'an na tɔgera buuri buuri yetɔgum, n wan suŋɛ ya la ŋwani, han dagena n lilege la se'ere pa'alɛ ya bii mi'ilum bii purega bii pa'alegɔ puan?

⁷ La dela buyina la bumŋmɛ'ɛla, wuu talitiŋa bii kɔ̃legɔ. Limehego han ka limehe, nɛra wan iŋɛ la ŋwani baŋɛ yuunɛ se'ere ti ba ŋmɛ'ɛra, bii pɛɛbera?

⁸ Le yɛ'ɛha me tintanɛ han ka peebe gɔlegɛ, ani n wan maahum yehe pɛntɛrɛ?

⁹ La ani la bala la ya. Fum han bɔna tɔgera buuri buuri puan, ti nɛra ka bɔkera bɔ, nɛra yeti a iŋɛ la ŋwani baŋɛ fum yeti sɛla? Fum tɔgera bahera la sabeeo puan yoo.

¹⁰ Bu'a ka bo' ti, yetɔgum zo'e zo'e boi timpaberɛ wa zuo mɛ, ti yetɔgum ka bɔna ka tara bu bɔkerɛ.

¹¹ La han dɛna ti mam ka mi' yetɔgesebo vuurɛ, mam dela saana bo' tɔgera la, ti tɔgera la me dɛna saana bo' mam.

¹² La ani la bala mɛa la ya, yan kɔ'ɔm mu'ɛ nini ɛɛra Sia yɛla la. Zigɛ ya suŋa suŋa la ya dikɛ bu tum suŋa ti la mɛ lageŋɔ la.

¹³ Bala, se'em en tɔgeri yetɔgum buuri buuri, a pu'uhɛ nyɛ paŋa la a ta'am lerege de.

¹⁴ Se'ere en sɔi la, mam han pu'uha la yetɔgum buuri buuri, mam sia la en pu'uhi, gee mam puti'irɛ ka bɔkeri.

¹⁵ Beni ti n nyaa wan iŋɛ? N wan pu'uha la sia la puan, gee me pu'uha la n puti'irɛ la, gee yuuna pɛka yuuma la n sia la, gee yuum pɛka yuuma la n puti'irɛ la me.

¹⁶ Han dagena bala, fum han ka'ara sum sia la puan, ŋwani ti yiŋa daana wan ta'am yeti “Taari” bo' fum fara bu'a la, yiŋa daana la n en ka bɔkerɛ fum n yeti sɛla la?

¹⁷ Yelemɛŋerɛ, han dɛna fum, fum ta'am pɛgɛ Yinɛ mɛ paaɛ paaɛ, gee la ka mɛti ayima.

¹⁸ Mam bo' Yinɛ fara ti n tɔgeri yetɔge buuri buuri gana ya za'a,

¹⁹ gee la ka boi la fii me, ti lageŋɔ puan, mam wan tugum tɔgɛ la yɛla anuu la n puti'irɛ ti la ta'am ka'am basɛba, nyana mam tɔgɛ yɛla tuha pia buuri buuri yetɔgum puan.

²⁰ N suurɔ, da deni ya kɔma ya ti'ihegɔ puan, gee tugum deni ya kɔmbilɛɛhi be'em tuuma puan, gee ti'ihegɔ puan deni ya bunkureba.

²¹ Yinɛ Gɔnɔ la puan, la gulehɛ yeti, “Doohe la nɛreba en tɔgeri buuri buuri yetɔgum puan, Doohe saama nɔgbama puan, Ti n wan tɔgɛ bo' nɛrebana wa, gee la bala za'a, ba kan kelehe mam,” Daana la n yele.

²² Bala yetɔge buuri buuri yi dagi daalehum bo' sakereba, gee sɛba en nan de saama sakerɛ la puan, gee purega dagi sɛba en de saama sakerɛ puan la dinɛ, gee sakereba la dinɛ.

²³ Han dɛna bala, la han iŋɛ ti lageŋɔ la za'a lagehɛ na, ti nɛra woo tɔgera buuri buuri, yiŋa nɛra bii sɛba en dagi sakereba kɛ̃ na, ba kan yeti ya zuto ka tuni?

²⁴ Gee ya za'a han puta, ti se'em en dagi sakera bii yiŋa nɛra kɛ̃ na, ya za'a n bahɛ ti a nyɛ teere, ya za'a en bahɛ ti a mina en de se'em.

²⁵ Yelesɛ'a en sugɛ a suure puan la han niiɛ na, nɛra la wan kpa' duma, lu tiŋa aliko Yinɛ nɛŋan, na'ahɛ en, gee muulɛ yeti, “Yinɛ sirum boi mɛ la ya.”

Ma'a ma'a pu'uhegɔ

²⁶ Beni en nyaa de ya iŋɛ n suurɔ wa? Ya han ni lagehɛ taaba na, ya ayima ayima tara yuunɛ, tara pa'alegɔ, tara lilegere, tara buuri yetɔgum yetɔgum bii tara yetɔge buuri buuri leregere. Iŋɛ ya sɛla woo suŋa ti la mɛ lageŋɔ la.

²⁷ Se'em ya puan han wan tɔgera yetɔge buuri buuri, ba dɛna bayi bii ba han pun wan zo'e batã. Ba tɔgera sɔɔhena, ti nɛra bɔna ya puan lɛregera ba yetɔgum la.

²⁸ Gee nɛra han ka bɔna wan lerege yetɔgum buuri buuri la, ba ana suram lageŋɔ la puan, gee tɔgera bɔ'ɔra ba mɛhi la Yinɛ.

²⁹ Bahɛ ya ti sɛba en puti la, bayi bii batã tɔgɛ, ti basɛba me bɔna ti'ihɛ ban tɔgɛ sɛla la bihɛ.

³⁰ Gee Yinɛ han lilege sɛla bo' se'em me en zi' bilam, bahɛ ya ti se'em en puti yia la yee bããlam.

³¹ Se'ere en sɔi la, ya woo ta'am puta ayima ayima, ti ya woo zamehɛ ti la kpemehe ya.

³² Purega paŋa la boi la puteba la nu'uhi.

³³ Se'ere en sɔi la, Yinɛ dagi Yinse'ere n gbiregeri, gee a dela suma'ahum Yinɛ. (Wuu nɛresunduma lageŋɔ la woo puan la iti se'em la,

³⁴ pɔgehi dela ba ana bããlam lageŋɔ la woo puan. Se'ere en sɔi la, ba ka bo' ba sore ti ba tɔgɛ, gee ba biŋe ba mɛhi tiŋa wuu pa'alegɔ la n yele se'em la.

³⁵ Se'ere han bɔna ti ba bɔta ti baŋɛ, ba soke ba sireba yire. La dela nyanɛ ti pɔka tɔgera lageŋɔ puan.

³⁶ Benii! Bii Yinɛ yelehum la pɔhɛ la yamam zi'an na? Bii yamam ma'a n de sɛba ti yelehum la paaɛ?)

³⁷ Se'em en yeti a dela nɔtɔgeha bii a tari Sia pahi, dela a mina ti mam en guleheri sɛla bɔ'ɔra ya wa dela Daana la nuurɛ.

³⁸ Se'em woo en ka dikɛ yele ana wa yi sɛla, se'em me da dikɛ en yi sɛla.

³⁹ Bala n suurɔ, mu'ɛ ya nini la purega bo'olum la, da gu'uri ya yetɔge buuri buuri la me.

⁴⁰ Gee sɛla woo dela ya ita dɛ suŋa, gee ita dɛ ma'a ma'a.