1 Korẽntɩ 12 - ZE'ELEGO PAALEGA

Sia yɛla

¹ Nananawa, han dɛna la Sia yɛla la, n suurɔ, mam ka boti ya bɔna aliko.

² Ya mi' ti, yan daa nan de bageditiba la, ba daa pã'ahɛ ya mɛ, tara ya ti ya ta bɔregɛ, dɔla baga en ka tã tɔgera.

³ Bala zuo, n boti ya bɔkɛ mɛ ti, nɛra ka boi tɔgera Yinɛ Sia la paŋa puan tabelɛ, “Puta baha Yezu zuo.” Bii nɛra ta'am yeti “Yezu en de Daana,” han dagena Fa'a Sia la paŋa puan.

⁴ Lan de se'em n ŋwana: Zu'uhegɔ bo'olum la boi la yima yima, gee Saa kayima mɛa en bo'ori,

⁵ ti tuuma la me bɔna yima yima gee ba tuni bɔ'ɔra la Daana ayima mɛa.

⁶ Ti tuuma yima yima tuna, gee Yinɛ deyina mɛa n bo'ori ba za'a paŋa, ti ba tuna nɛrawoo puan.

⁷ A bo' nɛra woo la Sia tuunɛ Sia tuunɛ, ti nɛra woo nyɛta, nɛra woo sum zuo.

⁸ Ayima, Sia la bo' en la yɛm tugum puan, ti ayima me, Sɛkaŋa mɛa n bo' en mi'ilum tugum puan,

⁹ ti ayima me, Sɛkaŋa mɛa bo' en la sakerɛ, ti ayima me tibegɔ bo'olum yima yima,

¹⁰ ti ayima me, Sɛkaŋa mɛa bo' en la kirehi tuuma bo'olum, bo' ayima me purega bo'olum, gee bo' ayima me sɛɛhi baŋerɛ bo'olum, bo' ayima tugum buuri buuri bo'olum, bo' ayima me tugum leregere bo'olum.

¹¹ Nananawa, bo'olum buna wa za'a, Sia kayima wa n bahɛ ti ba tuna. Sia kayima mɛa n bo'ori nɛra woo a bo'olum a bo'olum wuu Sia la mɛŋa n boti se'em la.

Iŋa kayina, luga zo'e zo'e

¹² Wuu iŋa en de kayina gee tara luga zo'e zo'e se'em la, ti iŋa la luga la zo'e se'em gee dɛna inyiŋa se'em la, la ani la bala Kiresta puan.

¹³ Se'ere en sɔi la, Sɛyiŋa mɛa puan ti ba sɔ tu za'a ko'om, ki'ihɛ inyiŋa puan. Yuuduma, la Girikiduma, da'aba, la sɛba en bo' fai, gee bahɛ ti tu za'a nyu Sɛyiŋa la.

¹⁴ Yelemɛŋerɛ, iŋa la dagi lɔge yiŋɔ ma'a, gee lɔgerɔ zo'e zo'e.

¹⁵ Ti na'arɛ han wan ta'am yeti, “Mam n dagi nu'o la zuo, mam ka po pa'ahɛ iŋa la puan,” bala kan bahɛ ti a kan pa'ahɛ iŋa la puan.

¹⁶ Tuberɛ han wa ta'am yeti, “Mam dagi niho la zuo, mam ka po pa'ahɛ iŋa la puan,” bala kan ta'am bahɛ ti a kan pa'ahɛ iŋa la puan.

¹⁷ Iŋa la za'a han deni la niho, sɛla n wan wuna bɛɛ? Iŋa la za'a han deni la tuberɛ, sɛla n wan nyuuhera nyuuŋo bɛɛ?

¹⁸ Gee lan de se'em la, Yinɛ en tigehe lɔgerɔ la za'a iŋa la puan, ayima ayima wuu en boti se'em.

¹⁹ Ba za'a han deni la lɔgeyiŋɔ, iŋa wan boni la bɛ?

²⁰ Gee lan de se'em la nananawa la, luga la zo'e mɛ, gee dɛna inyiŋa.

²¹ Bala la, niho kan ta'am yele nu'o yeti, “Mam ka eere fum,” bii zuo yele na'arɛ yeti, “Mam ka eere fum.”

²² Gee lan tugum dɛna se'em dela, iŋa la lɔgesɛ'a en ani tɔregɔ la yele pakɛ mɛ,

²³ tu iŋa la lɔgesɛ'a ti tu ti'iha ti ba ka tari tuni la, tu biheri ba mɛ suŋa la na'ahegɔ. Tu iŋa lɔgeseto en ka tari nimpiilum la, tu biheri ba mɛ la na'ahegɔ kãtɛ.

²⁴ Gee tu ihe lɔgesɛ'a en ba' tari na'ahegɔ la ka eere yele ana. Gee Yinɛ tigehe iŋa la la sadɔseko ti lɔgeseto ti tu ka ba' tɛra tu yele la en tugum nyɛta na'ahegɔ kãtɛ.

²⁵ A iŋɛ ŋwana ti bɔgehegɔ da bɔna iŋa luga la puan, gee luga la tugum suŋera taaba.

²⁶ Iŋa la lugerɛ deyima han nyɛ wuŋerɛ, iŋa la luga la za'a ni lagum nameha mɛ; iŋa la lugerɛ deyima han nyɛ na'ahegɔ, iŋa la za'a ni lagum nyɛɛna mɛ.

²⁷ Nananawa, ya dela Kiresta iŋa, ti ya ayima ayima dɛna iŋa la luga.

²⁸ Ti Yinɛ en looe sɛba lageŋɔ la puan n ŋwana, yia, tuntuneba, yi'i, nɔtɔgeheba, ta'a pa'aleba, nyaa bo' kirehi, nyaa bo' tibegɔ bo'olum yima yima, suŋɛ yima yima, nɛheduma yima yima, la tugum buuri buuri bo'olum.

²⁹ Nɛrawoo dela tuntuna yoi? Bii Nɛrawoo en de nɔtɔgeha? Nɛrawoo dela pa'ala yoi? Bii Nɛrawoo en tuni kirehi?

³⁰ Nɛrawoo tari la tibegɔ bo'olum yima yima? Bii Nɛrawoo en tɔgeri zɛlempaala? Nɛrawoo en tã lɛregera zɛlempaala yoi?

³¹ Gee tugum bahɛ ya ti ya nini mu'ɛ la bo'olum sebo en tari suŋɛ bo' nɛra woo. Gee n wan pa'alɛ ya sadɔseko en de ma'a gana za'a pa'ahɛ.