1 Korẽntɩ 11 - ZE'ELEGO PAALEGA

¹ Tɔgehi ya mam, wuu mam tɔgehɛ Kiresta se'em la.

Zuo pi'a

² N pɛgɛ ya, la yan tɛri mam sɛla woo puan se'em la, gee me tara malema suŋa suna wuu mam dikɛ a se'em bo' ya la.

³ Gee n boti ya bɔkɛ yeti, Kiresta en de buraa woo zuo daana, ti sira me dɛna a pɔga zuo daana, ti Yinɛ dɛna Kiresta zuo daana.

⁴ Burasɛka woo en pu'uhi, bii puta gee ti sɛla pi' ka zuo, diiheri la a zuo daana la vi.

⁵ Gee pɔgesɛka en pu'uhi, bii puta gee ka pi' ka zuo, diihe la ka zuo daana la vi, la ŋwɔni mɛ la ka siie ka zuo la mɛ.

⁶ Se'ere en sɔi la, pɔka han kan pi' ka zuo, ka yi siie ku bahɛ, gee la han dɛna vi ti pɔka kɛ̃ bii siie ka zuo, ka yi vuge sɛla.

⁷ Se'ere en sɔi la, buraa dagi a pi' ka zuo, eŋa en de Yinɛ naanɛ, la Yinɛ suŋa la. Gee pɔka dela buraa suŋa.

⁸ Yelemɛŋerɛ, ba ka naam buraa yehe pɔka puan, gee pɔka ti ba naam yehe buraa puan.

⁹ Ba me ka naam buraa pɔka zuo, gee ba naam la pɔka buraa zuo.

¹⁰ Dina wa zuo, la suŋereba la zuo, pɔka dela ka pi' ka zuo ti la dɛna daalehum ti nɛra en sɔi en.

¹¹ La ka boi la fii me Daana la sore puan, ti pɔka sɔna ka mɛŋa buraa zi'an, buraa me sɔi ka mɛŋa pɔka zi'an.

¹² Wuu pɔka en ze'ele buraa puan na se'em la, bala mɛa ti buraa me zɛ'ɛta pɔka puan na, gee sɛla woo ze'eti la Yinɛ zi'an na.

¹³ Gakɛ ya bo' ya mɛhi nyaa, la de ma'a ti pɔka pu'uha Yinɛ gee ka ti sɛla ka pi' ka zuo?

¹⁴ Naanɛ mɛŋa ka pa'alɛ ya ti buraa han tara zomwogero la ka naaɛ en,

¹⁵ gee pɔka han tara zomwogero, la dela a suŋa? Se'ere en sɔi la, Yinɛ bo' zomwogero la ti la dɛna la sɛla en pi' ka zuo la.

¹⁶ Gee se'em han ka sakɛ gee ŋmɛ'ɛra nɔkpe'ene, tumam ka tari malema aŋa bii Yinɛ Lageŋɔ la.

Daana tuulum dia la galeŋɔ

¹⁷ Nananawa, n kan pɛgɛ ya yele sɛ'a en kini na wa puan. Se'ere en sɔi la, ya han ni lagehɛ taaba na, la ni dagena sum, gee la ni tum dɛna la sageŋɔ.

¹⁸ Mam yeti n pɔhɛ sɛla dela, ya han ni lagehɛ na wuu Yezu lageŋɔ la, mam wum ti yelehego en boi ya puan, ti mam n bihɛ dɛ ta paaɛ zi'an la, mam nam ti la dela bala.

¹⁹ La de sira, yelehego wan ba'ahum bɔna ya puan. Se'ere en sɔi la, yele dina ma'a ti la wan niiɛ peelumen sɛba n de yelemɛŋerɛ Yinɛ pu'uheba ya puan.

²⁰ Ya han ni lagehɛ taaba na, ya ni ka lagehɛ na ti ya di la Daana dia la.

²¹ Se'ere en sɔi la, dia la saŋa han ni ta paaɛ, nɛrawoo zugeri la a zuka dia la puan, ti ayima kule kom, ti ayima me buge.

²² Benii! Ya ka tari yiya ha dita gee nyuura? Bii ya zeeni la Yinɛ lageŋɔ la, gee diiha sɛba n ka tari la vi? N wan yele ya yeti bo? N pɛgɛ ya yoi? Yele dina wa puan, mam kan pɛgɛ ya.

Daana dia la pɔhega

²³ Mam to'e se'ere Daana zi'an la, dinɛ ti mam dikɛ bɔ'ɔra ya. Ti Daana Yezu, yu'uŋɔ seko ti ba wan koohe en la, a dikɛ la boroboro,

²⁴ en bo' fara ba'ahɛ la, a figehe de mɛ gee yeti, “Dina en de mam iŋa ti n dikera bɔ'ɔra ya. Iti ya dɛna la ya tɛra n yele.”

²⁵ Bala mɛa ti a dikɛ wula, ban di yu'uŋɔ ba'ahɛ la, yeti “Wula wa dela mam ziim la nɔpu'ulegɔ paalega. Ita ya dɛna sansɛka woo ti ya yuure de puan, la ya tɛra n yele.”

²⁶ Se'ere en sɔi la, sansɛka woo ti ya ɔbera boroboro wa, gee nyuura wula wa puan, ya tiiheri la Daana la kum gura a lɛbega na.

Daana tuulum dia, la be'em

²⁷ Bala la, fum se'em woo en obe boroboro wa, gee nyu Daana wula la puan ti la ka nara, wan yele se'ere zuo ti fum galum Daana iŋa la la a ziim.

²⁸ Bihɛ ya mɛhi suŋa ba'ahɛ, gee ta'am obe boroboro la gee nyu daam wula la puan.

²⁹ Se'ere en sɔi la, sɛba woo en diti gee nyuura gee ka ti'iha Daana iŋa la tuulum yele, diti gee nyuura la gakerɛ baha ba mɛhi zuto.

³⁰ Dina wa zuo ti ya zo'e zo'e ihe buge ti ya bɛ̃'ɛra, ti ya sɛba ki.

³¹ Gee tu han gakɛ tu mɛhi suŋa suŋa, ba kan gakɛ tɔ.

³² Gee Daana la han gakɛ tɔ, a dɔlege la tu tuba ti tu da lagum nyɛ sageŋɔ la tiŋa zuo nɛreba.

³³ Bala n suurɔ, ya han ni lagum taaba ti ya di Daana dia la, ni gu'uhi ya taaba.

³⁴ Ya kom han duna, ni di ya yire, ti ya han ta lagehɛ taaba, la da dɛna sageŋɔ bo' ya. Han dɛna yɛla asɛ'a la yele, n han ta wa'am na, n wan suŋɛ ya ti ya maalɛ.