1 Korẽntɩ 10 - ZE'ELEGO PAALEGA

Nyɛ ya kã'aŋɔ yehe Izirale puan

¹ Mam ka boti ya bɔna aliko n suurɔ, ti tu sɔyaabeduma la za'a yuum boi sagbanɛ la tilen la mɛ, ba za'a yuum doohe ateko la puan tole mɛ,

² ba za'a yuum to'e Moose dɔlega ko'om sua la mɛ, sagbanɛ la, la ateko la puan,

³ ti ba za'a di sia puan diyiŋa la,

⁴ gee ti ba za'a nyu sia puan ko'yimɔ la. Se'ere en sɔi la, ba nyu ko'om la la sia puan taŋa la en yuum dole ba la, tansɛka en de Kiresta la.

⁵ Gee la bala za'a, Yinɛ nini da ka tigɛ la ba zo'e zo'e, ti ba kɔrum ba muuen la ha.

⁶ Yele ana wa iŋɛ ti a dɛna la yɛm nyɔka bo' tumam, ti tu kɔrehi da le bɔna be'em puan wuu bamam en da iŋɛ se'em la.

⁷ Da lebege ya bageditiba wuu ba basɛba n da iŋɛ se'em la, wuu lan gulehɛ se'em yeti, “Nɛreba la zi'ire mɛ di, gee nyu gee ihege wa'ara wa'yooro la.”

⁸ Tu ka de tu dikɛ tu mɛhi kɛ̃ yaluntuuma puan wuu ba basɛba en yuum iŋɛ se'em la, ti tuha pihiyi' la a tã yuum ki daarɛ de yina puan la.

⁹ Tu ka de tu mageha Kiresta biha wuu basɛba en daa iŋɛ se'em ti kampiihi kɛ̃'ɛ̃ra ba kuura la.

¹⁰ Tu me da nyɔna wuu ba puan basɛba en yuum iŋɛ se'em ti Sagena la sagum ba la.

¹¹ Yele ana wa iŋɛ ba ti la dɛna la makerɛ, gee ti ba gulehɛ a biŋe ti a pa'alɛ tumam sɛba en boi ba'ahegɔ buuri saŋa wa puan la.

¹² Bala, fum se'em en ti'ihɛ fum ze' mɛ, bihɛ suŋa la fum da lu.

¹³ Makerɛ ka boi paaɛ ya gee ka tabelɛ paaɛ nɛrese'em. Yinɛ dela yelemɛŋerɛ daana, a kan bahɛ ti makerɛ paaɛ ya gaŋɛ ya paŋa tɛka. Gee makerɛ la puan, a wan pa'alɛ ya sore ti ya ŋmibe de puan.

¹⁴ Bala zuo, n zɔduma wa, ɛkɛ ya baga kaabegɔ puan yehe.

¹⁵ Mam mi' ti mam tɔgeri bɔ'ɔra la yɛm duma. Gakɛ ya bo' ya mɛhi mam en yeti ya sɛla wa.

¹⁶ Sum wanɛ la ti tu ni ka' bahɛ de puan la, tu ni ka nyuura la Kiresta ziim la n bala de puan la? Boroboro la me ti tu ni gi'ihɛ la, tu ni ka tɔta la Kiresta iŋa la en bala?

¹⁷ Boroboro la en de deyina la zuo, tumam en zo'e se'em la dela inganɛ deyina, se'ere n sɔi la, tu lagum obe la boroboro deyina la.

¹⁸ Bihɛ ya Izirale nɛreba wa, ba sɛba en diti kaabegɔ dia la, dagi la taaba kaabegɔ bimbine la zuo?

¹⁹ Beni ti n dikɛ ŋwana makera wa? Dia la en dikɛ kaabɛ baga la en de sɛla bii, baga la en de sɛla.

²⁰ Aayi, mam yeti sɛla wa dela, sɛla ti bage kaabereba la ni kaabɛ bo' la, ba ni kaabɛ bo' la kulekpa'bɛ'ɛhi gee dagi Yinɛ. Mam ka boti ya dikɛ ya mɛhi naaɛ la kulekpa'bɛ'ɛhi.

²¹ Ya kan ta'am nyu Daana wanɛ la puan, gee le nyu kulekpa'bɛ'ɛhi wanɛ puan. Yamam kan ta'am naaɛ la Daana di, gee le naaɛ la kulekpa'bɛ'ɛhi di.

²² Bii tu boti tu ihege la Daana la nyuure? Bii tumam kpe'em gana en mɛ?

Ita sɛla woo pɛgera Yinɛ

²³ “Ya yeti, fum ta'am tari sore ti fum ita sɛla woo” gee ya me mina ti dagi sɛla wuu en tari nyuurɔ, “Ya yeti, fum ta'am tara sore ti fum ita sɛla woo,” gee ya me mina ti dagi sɛla woo n mɛti.

²⁴ Da eere ya, ya mɛhi sum ma'a, gee eere ya suurɔ me sum.

²⁵ Diti ya sɛla woo en koohe da'a puan, gee da soke ya doohe ya puti'ira en iti ya se'em la.

²⁶ Se'ere en sɔi la, “Timpaberɛ wa, la kaŋa en pirɛ se'em gã'a wa dela Daana la dinɛ.”

²⁷ Se'em en ka dole Yezu sore han yi' fum ti fum wa'am na di, ti fum iŋɛ fum puti'irɛ ti fum kiŋɛ, fum han ta paaɛ, di sɛla woo ti ba tari na ze'ele fum, gee da soke sokere doohe la fum puti'irɛ en iti fum se'em.

²⁸ Gee nɛra la han yele fum ti, “Ba dikɛ dia wa kaabɛ la bagerɛ,” da di dikaŋa, se'em daana en yele fum la zuo, la puti'irɛ la en wan ita se'em la zuo.

²⁹ Mam yeti sɛla wa dela, nɛre-ina wa puti'irɛ zuo, dagi fum mɛŋa puti'irɛ. Beni zuo, ŋwani ti mam fai bɔŋa wan bahɛ ti ayima puti'irɛ gakera en?

³⁰ Mam han bo' Yinɛ fara gee di dia, ŋwani ti ayima wan zɛregera mam disɛka ti mam bo' Yinɛ fara ka zuo gee di?

³¹ Bala, ya diti mɛ, ya nyuuri mɛ, bii sɛla woo ti ya ita, iti ya sɛla woo ti Yinɛ yu'urɛ nyɛta pɛka.

³² Da boni ya bunsɛka en wan tara daaŋɔ wa'am Yuuduma bii Girikiduma, bii Yinɛ lageŋɔ la puan na.

³³ Wuu mam muuri ti n tigɛ nɛra woo nini sɛla woo ti n ita puan se'em la, n ka eere n mɛŋa sum gee en eere la zo'e zo'e sum, ti ba ta'am nyɛ faarɛ.