1 Korẽntɩ 1 - ZE'ELEGO PAALEGA

Pɔɔl pu'uhegɔ

¹ Pɔɔl, se'em ti Yinɛ yi' ti, a dɛna Kiresta Yezu tuntuna, doohe Yinɛ mɛŋa suboolum la, la tu suuɔ Sositenese

² en gulehɛ bɔ'ɔra Yinɛ Lageŋɔ la en boi Korinti tiŋa, la sɛba ti ba soke ba, Yezu Kiresta puan, gee yi ba ti ba dɛna nɛresunduma, ta pa'ahɛ la sɛba woo en boi ze'sɛka woo yi'ira Yezu Kiresta yu'urɛ la, ti a dɛna bamam la tumam Daana la.

³ Zu'uhegɔ dɛna ya dinɛ, la suma'ahum en ze'ele Yinɛ en de tu Sɔ la, la tu Daana Yezu Kiresta zi'an na, bɔna la ya.

⁴ Mam bo'ori n Yinɛ fara mɛ saŋa woo ya zuo, la Yinɛ zu'uhegɔ kãtɛ se'ere ti a ka'ɛ bahɛ ya zuo yoo Kiresta Yezu puan la,

⁵ beni zuo, sadɔɔ seko woo puan, ya pirɛ mɛ a puan, la tugum, la mi'ilum woo,

⁶ doohe la Kiresta yɛla la en ba'ari nyɛga ya puan se'em suŋa suŋa la,

⁷ bahɛ ti ya ka koŋe zu'uhegɔ bo'olum sebo ya puan, yan guri tu Daana Yezu Kiresta niirɛ na wa.

⁸ A me wan sɛ ya ze'ele suŋa suŋa ta paaɛ ba'ahegɔ, ti ya kan tara gbelegere, tu Daana Yezu Kiresta dabeherɛ la puan.

⁹ Yinɛ dela yelemɛŋerɛ daana. Eŋa puan ti ba yi' ya ti ya tara Lageŋɔ la a Dayua Yezu Kiresta en de tu Daana la.

Bɔgehegɔ en boi Korinti Lageŋɔ la puan

¹⁰ Nananawa, n yeti ya mɛ la ninmu'urɛ n suurɔ, tu Daana Yezu Kiresta yu'urɛ la puan, ti ya za'a sakera bɔ'ɔra taaba ti bɔgehegɔ da bɔna ya puan, gee ya tugum naaɛ taaba dɛna buyina, la putɛ'yinɛ

¹¹ N suurɔ wa, se'ere en sɔi la, Kuloo yire nɛreba yele mam ti nɔkpɛ'ɛma en boi ya tiŋasuka.

¹² De vuurɛ dela, ya sɛba yeti, “Mam dole la Pɔɔl,” bii “Mam dole la Apolose,” bii “Mam dole la Sefase,” bii “Mam dole la Kiresta.”

¹³ Aa! Kiresta bɔgehi mɛ yoi? Pɔɔl ti kpa' bo' ya la? Bii ya daa sɔ ko'om la Pɔɔl yu'urɛ puan?

¹⁴ Mam bo' Yinɛ fara ti, mam ka sɔ ya mina ko'om, han dagena Kiresepusi la Gayɔse ma'a,

¹⁵ ti se'em da ta'am ta yeti, ba daa sɔ ko'om fum la mam yu'urɛ puan.

¹⁶ (Ɛhɛɛ! N me daa sɔ Stefanase yire duma. Han dagena bana, mam ka ti'ihɛ n le sɔ nɛra ko'om.)

¹⁷ Se'ere en sɔi la, Kiresta ka tum mam ti n sɔɔra nɛreba ko'om, gee n muula Yinɛ faarɛ yelehum la, dagi asaala yɛm kirega puan, ti Kiresta pumpuuredɔɔ paŋa la da bahɛ yoo.

Kiresta paŋa la Yinɛ yɛm

¹⁸ Se'ere en sɔi la, Pumpuuredɔɔ yelehum la dela gɔɔnyɛla bo' sɛba en baheri yoo la. Gee han dɛna tumam sɛba en nyɛ faarɛ wa, bu dela Yinɛ paŋa.

¹⁹ Se'ere en sɔi la, la gulehɛ yeti, “Mam wan sagum yɛm duma yɛm, gee burum baŋereba baŋerɛ.”

²⁰ Yɛm daana la bɛɛ? Gɔnmina la bɛɛ? Sankana nɔkpe'en ŋmɛ'ɛra la bɛɛ? Yinɛ ka iŋɛ ti tiŋa wa zuo yɛm la dɛna la gɔɔnɛ?

²¹ Ze'ele Yinɛ yɛm puan na, timpaberɛ wa zuo nɛreba ka mi Yinɛ ba mɛhi yɛm puan, Yinɛ en iŋɛ a puti'irɛ ti a doohe tumam gɔɔnɛ muulegɔ wa puan, la a faaɛ sɛba en nam la.

²² Se'ere en sɔi la, Yuuduma boti ba nyɛ la kirehi, ti Girikiduma me bɔta yɛm ti ba ta'am nam.

²³ Gee han dɛna tumam, tumam muuli la Kiresta ti ba kpa' la, yelese'ere en de pirega lɔkɔ bo' Yuuduma, gee dɛna gɔɔn yelehum bo' sɛba en dagi Yuuduma la.

²⁴ Gee sɛba ti Yinɛ yi' la, Yuuduma, la Girikiduma za'a, Kiresta dela Yinɛ paŋa, la Yinɛ yɛm bo' ba.

²⁵ Se'ere en sɔi la, nɛreba en nyɛ sɛla ti'iha ti Yinɛ gɔɔnɛ n bala la, nyani asaala yɛm, ti nɛreba en nyɛ sɛla ti'iha ti Yinɛ tɔregɔ en bala la, nyana asaala paŋa.

²⁶ N suurɔ wa, pun bihɛ ya mɛhi puan ti ba yi' ya se'em wa, Dagi ya zo'e zo'e en daa de yɛm duma asaala gakerɛ puan, dagi ya zo'e zo' en de pahi duma, dagi ya zo'e zo'e en daa de nabiihi ya dɔgum puan.

²⁷ Gee Yinɛ looe la sɛla en de gɔɔnɛ tiŋa wa zuo, ti a diihe yɛm duma la vi. Yinɛ looe la sɛla en ka tari paŋa tiŋa wa zuo, ti a diihe paŋa duma la vi.

²⁸ Yinɛ looe la tarema, la sɛla en ka tari zuo tiŋa wa zuo, yelesɛ'a en pun dagena sɛla la, ti a sigehe yelekãra duma la ti ba lebege zaŋa,

²⁹ Ŋwana ti nɛra kan ŋmɛ' nyu'ɔ Yinɛ nɛŋan.

³⁰ Yinɛ en de ya vom nyɛgerɛ, Kiresta Yezu puan, se'em en de tu yɛm, ze'ele Yinɛ zi'an na, dɛna tuuntɔɔ la, se'em en sokere la, la ayɔto'e daana la,

³¹ ti wuu lan gulehɛ se'em yeti, “Se'em woo en ŋmɛ'ɛri a nyu'ɔ, a ŋmɛ' kɔ Daana la puan la.”