Yowel 3 - Godope Awananapa Gilala

A:ibaigana lumumunu gi babamudamonoyana gi

¹ LODote lalelo, a:ma kadepanapa tepala, ne Yudata: Yelusalemata: obaimunu gi gwama sa:leda:munamalowamena,

² na: baigabaiga waelabeyagai gaogoda:munote Yeyosopat golo gobama alete pa:lamalowa. Amale na: obaimunu gi babamudamonamalowa, obaite na:dowali lumadima a:na:da:miniyana gima. Obaite eta:mi opa:pa:yana wama na:dowali Islael luma alete na:diyana gima amale obaite Islael a:i iwatadiliyana.

³ Obai na:dowali Islael luma alelamada:le gi kakalaminapa ba:kelele iyadiliyana, amale dala bibilina ato alelamada:le kakasi ewadiliyana, a:pite waen alelamada:le amina ewadiliyana, obaite nida: gima.

⁴ Amapula na: powa gi da:dima a a:na:miyamanaya, o Tayata: Sidonota: gwama Pilisitiyana wa kabigibegata:. Da: ne a:na:miyamana gima wisa edelewata. Da:na: dima gwama mai wisa gi a:na:minenewamena tepala, na: da:pe ganabima sela pa:labega elamalowa. A:pite da:dima wisa elamalowa.

⁵ Gi ase na:dowali silibata: gaolodota: de alelelyamana, na:dowali sa:sa:lena lopala da:dowali awana gegenamama a:ipatite na:deyamana.

⁶ Yudata: Yelusalem baigana lumata: de Gulik lumadima ewadeleyamana, obaite baiga ya:bi elatete wabeganapa wama na:da:mada:le.

⁷ Daga tila, de obai ewadeleyamana wala na: obai gwama pakada:minamalowa, a:pite na: de obai dima a:na:da:mineyamana gima da:dowali ganabima wisa elamalowa.

⁸ Da:dowali kakasita: aminata: na: Yuda wana dima ewadolamalowa, a:pite obaite Sabeyana lumadima ewadelamadili, enoba wabeganapa wa. LODote lalelo.

⁹ Baigabaiga gogobala ma:ma gilala ladela. Giwa:la gima sa:leda:la, Giwa:lana dala pakakamina. Awapa giwa:lana dalate giwa:la auwama pa:da:te giwa:la eda:la.

¹⁰ Da:dowali a:i pasada:mina lopala giwa:la gili a:na:da:mina gima sasada:mina da:dowali kon dapola gili ameta kibili a:na:da:mina. A:pite bonogowanapa lumagite lalamalelo, na: a kamali ewamena.

¹¹ Sela pa:da:la, da: baigabaiga waelabega ya:deta:ya:deta:la, da: pa:da:te a:mama gaogoda:mina. A:dowali kakamalina giwa:lana auda:mi, O LOD.

¹² Baiga baiga waelabega patimada:la, Yeyosopat golo gobama pa:da:la ase na: a:mala manonamalowa palata: palata: waelabega a:ibaiganapimunu gi babamudamonamalale.

¹³ Kon dapola gili alete wiwida:mina, gi ase kon tao a kakalediwina. Pa:da:la, ga:lip adami etoda:minamadili, gi ase adami wi tukutukuda:mina kabuwa a tawawena, wi a wama saesilili. Obaimunu sosawe gi enoba a:na:pi a kabigibega ediwina.

¹⁴ Luma waelabeyagai domona pa: awapa gi mila gobala edeli. LODope kadepate a auwapula elelo. Gima kamina golo gobala.

¹⁵ Kadepata: samosota: itida:madili, a:pite ibina pa:pa pa:ipila.

¹⁶ LODote Sayon sakala ulupuda:malelo a:pite Yelusalem baigala gigulamalelo, a:ibaigata: sawisakata: sasiwadili. Ameta LODote obape lumumunu kalekalenapa a:wa saba elelo, enoba Islael lumadima kalekalenapa giligili ogosa a:na:pi elamalelo.

Godope lumumunu sa:kela gi

¹⁷ Da: amale itawa eda:madelewa na:, da:dowali LOD God, Sayon sakala elelowa, na:pe awana saka. Yelusalem enoba awana elamalelo, eta:mi wana lumate pa:pa gwama baiga gobale sa:eda:te na:da:tedelamadili.

¹⁸ A:ma kadepala podole kanika:napa waen wite ta:tedelamadili, a:pite a:i pokopoko eda:le dina wite ta:tedelamadili, Yudape tata gobale wite ta:tedelamadili. Wi daodote LODope genama gobala wama saolamalelo a:pite pa:te Sitim golo baumunamalelo.

¹⁹ Ameta Isipt wa luma bininapa wa elamalelo, a:pite Idom wate a:napa wa elamalelo, gi ase obaite Yuda lumadima giwa:la ediyana gima, enoba obaimunu wa gobala gi pa:pa a:na:miyana lumumunu dede a sasaminiyana.

²⁰ Yuda lumate elomina tepala edelamadili a:pite Yelusalemala luma matate elomina tepala edomidelamadili.

²¹ Na: dede wisa elamalowa, enoba dede na: pa: wisa elanapa, ase na:pe ela saba enoba Sayon.