Yowel 2 - Godope Awananapa Gilala

Miwalite LODope ga:o kadepa gima lumadima gibaba edeli

¹ Tutuli iwidela, Sayon baiga gobala, na:dowali awana sakala siya pakamina. Wa gobala edelina luma da: sasiwadela, gi ase LODope kadepa a pa:lelo, a:ma kadepa a auwapula elelo,

² wa isa apela ete gogote pa:lelola wate itilamalelona a:na:pi elamalelo, a:ma kadepala sidila iti waelabega ete wa iti kanabi elamalelo. Kadepate pulelola kadepa gweyate podoma manamalelona gi a:na:pi, waelabega kakamalina giwa:lanate pa:dili, a:na:pinapa gi lope tepala pa:pa saodiyana gwama wapikina gogole pa:pa saolamalelo.

³ Ilate obaimunu lopa palale lopala oloda:lo, obaimunu wapiki palale babalelate sidima ditelelo. Obaimunu lopa palala wa Iden egada a:na:pi dololo, ameta obaimunu baiga palala, wa a:napa wa elelo, obai eta lopala pa:pa elatelili.

⁴ Obai os apeda:, giwa:la os a:na:pi obai gugula:te pa:dili.

⁵ Giwa:la gawa a:na:pi siyada pa:dili obai podo sidila sikasikale pa:dili, kakapa oloda:lona ila babalela siya a:na:pi, kakamalina giwa:lana a:na:pi, baiga egelama litatili.

⁶ Waelabega lumate obai tida:te palama gugula:te palama gugula:te edelamadili, lumumunu sosoko malabega eda:madili.

⁷ Obai kakamalina giwa:lana a:na:pi gugula:te pa:dili, giwa:lana dala a:na:pi obai baiga ta sidima didili. Obai menagi nabidile a:i saominini, obai giwiminale sogolale a:i saowaminada:le pa:da: gi pa:pa ekedili.

⁸ Obai pa:pa etate eta dubumitale na:dili, obai sa:lele lopa palama na:dili. Obai baiga ta talamite sa:eda:te giwiminale na:da: pa:pa ekedili. Obai giwimina pa:pa talada:minini.

⁹ Obai baiga gobama sa:eda:mada:le gugulili, obai ta sidila guguglili. Obai gegenama gogobama didili, ilina a:na:pi obai totokaba gobale sa:edili.

¹⁰ Obaimunu lopa palala a:ibaiga sasiwolo, a:pite sawisaka gagaga elelo, kadepata: samosota: a iti kanabi ediwina, a:pite ibina pa:ipila gi a ekediwina.

¹¹ LODote kadepa siya a:na:pi gigilalo, obape giwa:lanapimunu lopa palala, obape giwa:lana gagasida: domona pa: awapa, a:pite obape kakami gilala enamada:te gima kamidilina giwa:lana kakamalibeyagai. LODope kadepa enoba kamlibega, a:pite emosa:mida:bega, a:ma gobala powate kanika:wamaleloya.

Lumate gi iwalela opa:yada:mina gima obai awada:miyana gi

¹² A:te amapula LOD a:negelalelo, na: dima gwama pa:da:la da:pe gwana goba gida, baya awana gita: adimada: gita: sabe gita:da.

¹³ Da:dowali alipo tatalada:mina, pa: da:dowali kaliko. Gwama pa:da:la LOD da:dowali Gododima, oba enoba nagalata: awe iwalelata: tawanapa, pa: sela ga:otanapa a:pite awe iwalela kabiginapa, oba gi iwalela opa:yamineno galabete pa:pa saolamalele.

¹⁴ Powate itawaya, oba esa:te da: aweda:maleloga a:pite wapiki palama sa:kelamina gi elatelamalelo, kon tao nagala lopalata: adami wi nagala lopalata:, da:dowali LOD Gododima apila gima.

¹⁵ Tutuli iwila Sayon sakala, baya awana eda: gima luma danala, awanale gaomina gima awada:mina.

¹⁶ Luma gaogoda:mina, luma Gododima awanana da:mina, wawana dala menagi sabama alete pa:da:la, segeta: gaogoda:mina, ya:mai omo nanilina sege kokowabi. Awapa susa:gi gwalila kanika: obate obape genama elatete pa:lamalelo, a:pite dalagi awa kanika: obape saba elatete saolamalelo.

¹⁷ LOD dima gisaola edelina guwali dalate balelamina genama ogosata: awana ba:kele genama palata: tepa tepala adimadelamadili. Obaite lalamadili, O LOD, awe gi kekemi a:dowali lumadima. Ege e aleloyana lumadima pisala data, eta:mi lumate obai iyada:minamada:le, powa gima obai luma gobala ma:na:pi lala eda:madiliya, obaimunu God ba:maya.

LODope gilala wisa

¹⁸ LOD obape wa gima kabigibegale gi iwalelalo, obape luma oba iwaleda:lo.

¹⁹ LOD obai dima wisa gilala lalamalelo. Na: da:dima konata: adami wi kanika:ta: sapeta: auda:minamalowa, de nidelete da:dowali gwanate ida:mada:le. Na: pa:pa gwama lumate da: pisalada:minamada:le wabeganapa wama da: auwada:minamalowa.

²⁰ Ne wawi ya:dele pa:diyana giwa:lana da: gobala wabegama alete welamalowa, na: obai wi bininapa a:napa wama galada:minamalowa, obai lopadamate pa:yana gagasila kaolanapa wasewa gobama auda:minamalowa, a:pite a:yatanapa gagasila Meditaliyan wasewa gobama auda:minamalowa. Apite lumumunu obebete pokopoko edelamadili, aula: ipowate sidima dilamalelo. Gibapi obaite a: dima kabigida:na gi a:na:da:miniyana.

²¹ A:i, a: ege emo. A: sa:keladele sikasika eyo. Gi ase LOD kabigida:na gi a a:na:da:munowena.

²² Wa gobana wai, da: ege emodela, wa gobana tila a sa:lele apedili. Adami ite adami a alawadaminini, pigi ita: tokobe i adamita: obaimunu ya:biya:bi a alawada:minini.

²³ Sa:keladela da: Sayon baigana luma, da: LOD da:dowali Gododima sa:keladela, gi ase oba da:dima a dapulowena sogola gobana ibowa gwi. Oba awapale kabiginapa gwi aumiwila a ononowena, lopala pa: tolanapa tepala gwama nana ulama pa: patilanapa tepala.

²⁴ Kon tukuda:mina gegenama kon taote tawatawabega eda:madili, kanika:da:na waenta: oweleta: tawatawabega eda:madili.

²⁵ Miwalite naniyana gogona lopala gima na: gwama wisa elamalowa, kabigida:na miwalita: a:pite kokowabina sa:sa:ta:, eta:mi tagada:ta: gwama eta:mi sa:sa: waelabeyagaita:, enobai giwa:lana dala ne da: gobama auda:miyamana.

²⁶ Da: nana lopala kabigibega nanete gwana ida:madili, a:pite da: da:dowali LOD Godope gagi ewamenamadelewa, obate memelada:na gi da: gima a a:na:da:munowena, na:dowali luma pa:pa gwama pisala eda:madili.

²⁷ Amale da: itawa eda:madelewa na: Islael wala elelowa, a:na:pi na: enoba da:dowali LOD God elelowa, eta God bini balama, na:dowali lumate pisala pa:pa gwama egelamadili.

LODope kadepa gi

²⁸ A:pite tepa saolamalelo na: na:dowali limo waelabega luma sidima saminamalowa. Da:dowali kakasita: aminata: wala gilala ladelamadili, da:dowali wawana dalate inigwile gi tidelamadili. Da:dowali apeda: kanika:da:na dala taote opa:ya eda:te gi tidelamadili.

²⁹ Na: na:dowali gisaolanadima, enobai dalata: atota:, na:dowali limo saminamalowa a:ma kadepala.

³⁰ Kadepa sidila na: memelada:na gi kekeda:munamalowa, a:ibaigata:la, enoba dedeta: ilata: a:pite waota:.

³¹ Kadepa itikanabi elamalelo samosote dede bega elamalelo LODope emosa:mida:napa kadepa pa: saolelona tepala.

³² A:pite LODope gagi gima mamamidelamadilina a:mai lumate galabe pawamina gi egelamadili, gi ase Sayon sakata: Yelusalem baigalata: galabe pawamina gite dololamalelo, LODote layana gi a:na:pi, enobai galabe gobala wama alete saoyana luma gobala LODote awada:miyana luma.