Yowel 1 - Godope Awananapa Gilala

¹ Ma:ma enoba LODope gilalate Petuwelepe mata Yoweledima pa:yana.

Miwalite wa kabigibega egeyana gi

² Wawa dala, da: ma:ma gilala enamada:la, wa gobala edelewamena luma da: gi enamada:la. De lope edeleyamana tepala ma:na:pinapa gi saoyanata o da:dowali iniwali kakabeyate edeliyana tepala ma:na:pinapa gi saoyanata.

³ Ma:ma gi da: da:dowali sege danala, a:pite da:dowali segete obaimunu segedima ladelamadili, a:pite obaite gwama obaimunu segedima ladelamadili.

⁴ Miwalite na:sa:da:miyana lopala tagada:te naniyana, tagada:te na:sa:da:miyana lopala sa:sa: kokowabite naniyana, a:pite sa:sa: kokowabite na:sa:da:miyana lopala eta:mi sa:sa:te naniyana.

⁵ Sika nida:na luma, da: dowatelewamena sabale saleda:te sabedela. Waen nideletana luma waelabega da: adimadela, da: waen kanika: gima sabedela, gi ase lumate waen kabuwa magatale sela wama alidamiwina.

⁶ Eta a:i baigana giwa:lana na:pe wa a egiwina, obai kakamalibeyagai, a:pite luma ananasanana bega, ya:mai lumumunu poso enoba layono poso a:na:pi, a:pite susa:gi layonope kalita a:na:pi.

⁷ Obai na:dowali tokobe adama a kakapada:miwina, na:dowali kipa adami i a sosaweda:miwina. I kaka obai a kwakwaminete wama ba:ba:mite i tata abibilobapi ediwila a: na:sa:da:miwina.

⁸ A: esesawalida:na kakana lopala kakamite sabelalona aminagi a:na:pi eyo, gima lada: dalagi kaowela gwanasaweda: elelo.

⁹ Kon nagala lopalata: adami nagala lopalata: obai LODope genamama pa:pa alete pa:da:tedili. Guwali dala LOD odima gisaola edelina obai sabedili.

¹⁰ Egada goba wa a sosawe bapi eda:wana, a:i a kakaleda:wana, kon iyapo a sosawe eda:wana, waen kanika:da: a apada:wana, owel a apada:wana.

¹¹ Egada apeyana dala da: madakaela edela, tokobe adami apeyana dala da: sabedela, witita: balita: gima gwanasaweda: edela, gi ase egada gobana nana ulama a sosawe bapi ediwina.

¹² Tokobe adami i a sesediwina kipa adami i a ila ediwina, sipolo adami ita: a:pol adami ita:, waelabega egadana i a ila ediwina. Gibapi, lumumunu sa:kela gi a wama kaowena.

Lumate gi iwalela opa:ya eda:mada:le obai awada:miyana gi

¹³ Guwali dala, da: esesawalida:na kakana lopala kakamite sabedela, awana nagala lopala apiletedilina ba:kele genama okona dala da: gwanasaweda: edela. Pa:da:la, ama isala esesawalida:na kakana lopala kakamite tenedela, na:dowali Godope sosoko palala gisaola edelewamena dala, ase kon nagala lopalata: adami wi nagala lopalata: da:dowali Godope genamama alete pa:da: gi a ekediyana.

¹⁴ Awanale baya awana gi luma danala, luma Godope awana sabama gaogoda:mina. Wawana dalata:, wa gobala edelina luma waelabega iya:ta: danala. LOD da:dowali Godope genamama awada:mina, a:pite LOD dima adimada: pakamina.

¹⁵ Ya:ma kadepa malemabega. Gi ase LODope kadepa a auwapula elelo, enoba kadepala galabete Kamalinapadila pa:lamalelo.

¹⁶ Ma:ma gi sa:pe sosoko palala dololo baya kanika:wa a ta:ewena sa:pe Godope genama gobala, a:pite sa:kela gita: balela gita: pa:pa dololo.

¹⁷ Kon tao a sesediwina, a:i gobala. Kon alila gegenama a sosawe ediwina, kon i a ka:ekelete a:ile dowatilila kon ulama a sesediwina.

¹⁸ Ka:o a:na:pi adimada:le ededamidili. Obai gagasida:le daledalele wamidili, gi ase sa:sa:lena tila a sesediwina, sip gagasila iya:ta: obai alikikimina enamadili.

¹⁹ Na: a: dima adimada:lowa, O LOD, gi ase wa gobana tila sa:sa:lena a ilate oloda:wenana, a:pite wa gobana i waelabega a ila babalelate oloda:wena.

²⁰ Wa gobana wa wai iya:ta: a: dima adimadili, wa gobana kebane waelabeyagai wi a apada:wana a:pite ilate a:napa wa gobana sa:sa:lena tila a oloda:wena.