Yaun 2 - Godope Awananapa Gilala

Yaunape timo gi

¹ Mewape gwana gobala Yaunate LOD obape Gododima timo eloyana.

² Obate a:negelayana, na: galabe gobala eloyamana tepala na: LODdima mamamida:yamana, a:pite obate na:pe gilala wisa eyana. Olawa gobala na: amowa gima mamamida:te midoloyamana, a:pite a: na:dowali adimada: enamayana.

³ A: gaola tepama na: miditina:yana, enoba wasewa a:i a:yata bapima, a:pite na: wi gobala eloyamana, a:dowali kakamalina wisesete, na: sidile pa:na:diliyana.

⁴ Ne iwaleyamana a: na: a wama ta:mite miyana, a:dowali sosoko palale, ameta na: a: gwama tilamalowa, a:dowali awananapa balelamina genamala.

⁵ Wite na: tubuna:minadele na: pipina:miyana, itilate na: gwanamana:minoyana, kosisite na:pe ganabi papana:miyana.

⁶ Podomunu sokate bapimana:peloyamana a:ma wala ogosa kaete dololamalelo elomina tepala. Ameta a: na:dowali kanika:wa kaokoda:na lumumunu sabale pakamiyana, O LOD na:dowali God.

⁷ Na:dowali kanika:wate kilitata weloyana tepala, na: a: LOD gi iwaleyamana, a:pite na:dowali timo gi a: dima pakamiyamana, a:dowali awananapa balelamina genama gobama.

⁸ Kakamali binina ididali balelada:mininina lumate, obai dima pa:da: gima dololona kabiginapa awe nagala a wama galamiwina.

⁹ Ameta na: ewama: dili gwaleda:dele a: dima kanika:wada:na nagala lopala apulamalowa. Ne gibalamale layamana gi na: a:na:minamalowa. Galabe pawamina gite LODdile pa:lelo.

¹⁰ Amale LODote mewa anayana Yauna talila gima, a:pite mewate wete Yauna wasewa gegedama taliyana.