Sepen 3 - Godope Awananapa Gilala

Yelusalem baigape wapiki tepanapa gi

¹ Sosawe gi a:na:da:munoyana kabiginapa baiga a: sosawe elamalelo, obate sosawebapinapa eladele luma alikikimina dapilotelelo.

² Oba gilalama pa: gima kamitanapa, oba LODope kakami gilalama gima pa: kamitanapa. Oba LOD pa:pa gibapiminano, oba obape God auwama pa:pa pa:telelo.

³ Obape opisol dala enobai kakamalina layon a:na:pi ulupodili, obape gaganabina dala enobai debe tepala wamideletedilina wa soka: edili, obai eta kadepana nana lopala pa: alitana.

⁴ Obape Godope gilala ladeletana dala na: awagana: kabigida:na edeli, obai seyada gidana dala. Obape guwali dalate awana saba sosaweminini a:pite kakami gilala ka:keminetedili.

⁵ Kabiginapa baiga gobanapa LOD enoba sogolanapa, oba sosawe gi pa:pa a:na:da:munotelelo. Ibasege waelabegale oba sogolale gi babamunotelelo, a:pite kanika:napa kadepa putolona tepala oba pa:pa bonogowalo, ameta gi pa: sogoda:na luma pisala gi pa: itawada:.

⁶ Na: eta:mi baigana luma a dapolowamena, obaimunu tadana gegenama a titida:munowamena. Obaimunu wamidilina nabidi tepala luma pa:pa wamidili, luma waelabeyagai bini bapi. Obaimunu kabiginapa baiga a giwa:lanate titida:miniwina, eta lumagi menagite pa:pa elelo, bini bapi.

⁷ Na: kabiginapa baiga dima layamana, a: na: emoladele a:pite ne a: sagabaminanowamena gi awapage lalamalelo. Amale obape ela saba pa:pa titiminamalowa, gwama na:dowali wisa oba dima pa:pa pa:lamalelo. Ameta oba kabigibegale iwimunoyana obape ela gi gobale sosawe gi a:na:munamalale.

⁸ Enobala da: na:ma enamadela, LODote lalelo, na: da: gima gibaba ela gima elamalowa. Na: gi iwalela a sa:lemiwamena a:ibaiga waelabega gaogomunote, baiga baiga waelabeyagai gaogoda:munamalale a:pite na:dowali ga:o obai sidima saminamalale enoba na:dowali kamalinapa ga:o ilabega. Wa kabigibega ololamalowa, enoba na:dowali nugu ga:o ila.

⁹ Amale na: waelabega lumumunu magata pi wida:munamalowa, obai waelabeyagaite LODope gagi omonenamada:le a:pite menagimite oba dima gisaola edelamada:le.

¹⁰ Kus wasewa emaya:dela, na: balelana:miniyana luma, opa:pa:ya na:da: ediyana luma, na: dima nagala lopala alete pa:da:madili.

¹¹ A:ma kadepala lumate a: papa pisalaminamadili, ena: dima a:na:da:munoyana sosawena gima, gi ase ma:ma baiga gobala na: awagana: gima sa:keladilina luma wama auda:minamalowa. A: pa:pa gwama na: awagana: elamalelo na:dowali awana sakala.

¹² Ameta na: a: gobala elamalowa gelanata: misa:minata:, enobai LODope gagi gibapiminetedilina luma.

¹³ Isalalelape gwama pa:da:madilina luma soaswe gi pa:pa a:na:da:minamadili, obaite sewata gilala pa:pa gwalemenamadili, obaimunu magata gobala sewata gi pa:pa dololamalelo. Obaite baya nanete tenedelamadili a:pite eta lumagite obai emo gi pa:pa dapulamalelo.

¹⁴ Dili gwaledo, O Sayonope aminagi, mamabegale mamamido, O Islael. Dili gwaleda:dele sa:kelo a:dowali gwana gobala, O Yelusalemape aminagi.

¹⁵ LODote a:dowali wisa a wama egema:yana, obate a: dima giwa:la ediliyana luma a wama eseda:miyana. LOD, enoba Islaelpe kanaba, a:da elelo, a: eta galabe gite pa:la gima pa:pa gwama emolamalelo.

¹⁶ A:ma kadepala obaite Yelusalemadima lalamadili, a: ege emo, O Sayon, a:dowali mai ege a:ima bonogowada:minamalelo.

¹⁷ LOD a:dowali God a:da elelo, oba kamalinapa giwa:lanapa a: dima ganabi lapila atamalelo. Oba a: dima kabigibegale sa:kelolamalelo, obate obape awe nagalale a: gelaminamalelo, obate dili gwaleda: gile a: dima sa:kelolamalelo.

¹⁸ Domoda:na pokopoko gima gwanasaweda: gi, na: da: gobale wama milamalowa, ma:mai gi da:dima menebega eladele pisala gi elamalelo.

¹⁹ A:ma tepala ne gi a:na:minamalowa, da:dima sosawe gi a:na:da:miniyana lumadima. Na: a:i sauda:na lumumunu galabe pawamidamamalowa a:pite wama opa:ya na:da: ediyana luma gwama gaogoda:munamalowa. Na: obai dima sa:kela gita: ewama: gita: datamalowa wa waelabegala obai pisalada:miayana sabala.

²⁰ A:ma tepala na: da: gaogoda:munamalowa, a:ma tepala na: da: baigama alete pa:lamalowa. Na: a: dima awaga gi atamalowa a:pite wa gobana lumate a: dima sa:keladelamadili ne a:dowali sa:sa:lena gi gwama pakakamunamalowamena tepala da:dowali tao luliyabala, LODote lalelo.