Sepen 1 - Godope Awananapa Gilala

¹ Ma:ma enoba LODote Sepenaya dima gwalemonoyana gilala, enoba Kusipe mata, Kusi enoba Gedalayape mata. Gedalaya enoba Amalayape mata, Amalaya enoba Esekayape mata, Amonope mata Yosayate Yuda wala kanaba elaleyala, ma:ma gilala Sepenaya dima pa:yana.

Wate galabe gobama saolamalelona gilala lope kekemiyana gilala

² Na: a:ibaigala lopala waelabega wama gagamunamalowa, LODote lalelo.

³ Na: lumata: waita: daligile wama lapedolamalowa, na: sidina puwida: wama lapedolamalowa, a:pite wasewa gobana mewa wama gagamunamalowa. Na: luma danamela sosawe gi a:na:da:minina luma dapote binida:minamadili, na: ma:ma a:ibaigala edilina luma dapolamalowa, LODote lalelo.

Yuda wama ladoloyana gilala

⁴ Na: Yuda wama na:dowali mai gigiminamalowa, a:pite Yelusalem wala edilina luma waelabega dima. Ma:ma wala, na: ba:ilipe na:sa:da:minamadilina gi sosaweda:minamalowa, enoba pa: giladeletana sosawena guwali dalimunu gagi na: saowada:munamela lumate pa:pa gwama iwaledelamadili.

⁵ Puwite luma genama sidila baoda:te balelaminetedilina, obaite kadepa sidina ibinata: kadepata: samosota: balelada:minetedili, na: obai dapolamalowa. A:pite puwite lumate baoda:te LODope gagile gilala ladeletedilina a:pite Molekepe gagile gwama gilala ladeletedilina na: obai dapolamalowa.

⁶ Gwama puwite LOD baiga lapote na:da:dele, LOD pa:pa uwaleletedilina lumata: oba pa:pa gwalama:nina lumata:, na: obai sosaweda:minamalowa.

⁷ Sidinapa LODope sososko palala nugunale edela, gi ase LODope kadepa a auwapula elelo. LOD a sa:lewena obape luma dapoda:na nagala lopala a:na:pi dapola gima, obate iwida:miyana luma a wida:mida:na eda:wana.

⁸ LODope kadepala nagala lopala apilamadilina tepala, na: kanabape opisol dalata: a:pite kanabape matata: sosawe gi wisa dapulamalowa, gwama opa:yana wana lumumunu kakana lopala kakamina midilina luma iya:ta:.

⁹ Ya:ma kadepala na: ogosa tepana sima, litata emodilina luma sosaweda:minamalowa, a:pite obaimunu ididali balelada:mina gegenama gasumitada: gita: luma dapola kamali gita:le tatawaminina luma dapolamalowa.

¹⁰ LODote lalelo, ya:ma kadepala, Mewa ogosa tepama adimada: siya enamada:madili, kabiginapa baiga gobanapa sakinapa palale obaite obaimunu mi dapoladele adimadelamadili, a:pite sakale lopalate nisiselamadilina siyate saoda:madili.

¹¹ Sabedela, da: lopala ewada: wala edelewamena luma, da:dowali lopala ewadilina luma na: dapote binida:minamalowa, silibale lopala menepe awapamina alilitedilina luma sosawe bapi eda:madili.

¹² A:ma tepala na: waiki egete Yelusalem baigala luma uluwadolamalowa, a:pite sosawe a:na:da:mina gi kakamalina luma wisa dapulamalowa, obaite iwaleleli, LOD eta gi pa:pa a:na:minamalelo, enoba sa:lenapa gi o sosawenapa gi.

¹³ Obaimunu lopala lumate ilile alelamadili, obaimunu gegenama lumate titida:minamadili. Obai gegenama a:na:da:minamadili, ameta gegenama gobala pa:pa edelamadili, obai tokobe adami tolamadili, ameta waen pa:pa nidelamadili.

LODope kabiginapa kadepa gi

¹⁴ LODope kabiginapa kadepa a auwapula elelo, patila pa:la elelo. Enamada:la. LODope kadepanapa gwanasaweda: gi sokamabega, kakamalina giwa:lana dalate mamamidelamadili.

¹⁵ A:ma kadepa ga:o kadepa elamalelo, alikikiminata: gwanasawedata: kadepa elamalelo, mene gita: a:pite lumate obai sosaweda:minamadilina kadepa elalamalelo, wa itite lulila binilamalelo, itida:na itite wa itiminamadili a:pite wa iti kanabi elamalelo,

¹⁶ tutuli siyate giladelamadili a:pite lumate giwa:la mamamida:te siya pakakaminamadili enoba tadana baigama a:pite ebatana ga:gemida:na kabigida:na gegenama gagasida:ta:.

¹⁷ A:pite na: lumadima alikikimina egete pa:lamalowa a:pite obai tao kaokoda:na a:na:pi wamidelamadili, gi ase obai LODdima sosawe gi a a:na:da:miniyana. Obaimunu dede pulu a:na:pi wama sasaminamadili a:pite obaimunu obebete gwa a:na:pi a:ile dowatate ipowadelamadili.

¹⁸ Obaimunu silibata: gaolodota:, obaimunu galabe pawada:mina gima pa:pa awapa eda:madili a:ma LODope ga:o kadepala. Obape nugu ilate ololamalelona kadepala wa kabigbega enoba ilate ololamalelo, oba sela a:yata milamalelo a:ibaigala edelina luma waelabega dima.