Sekal 9 - Godope Awananapa Gilala

Islaelpe giwa:lana lumumunu gi babamunamalelona gi God dile pa:yana gi

¹ LODope gilalate A:dalak baiga dima dololo a:pite Damaskes baigama pa:te dololamalelo gi ase lumata: Islael udaga waelabegata: obaimunu taole LOD tilili,

² a:pite Damaskes ebatanapa baiga Amat, a:pite gi a:na:da:mina sa:kemana baiga Tayata: Sidonota:.

³ Taya baigate obape giwa:la genama kakalaminanapa a:na:miyana, oba siliba lopala pulu a:na:pi a gaogoda:munoyana, oba nabidi tepana kakapa a:na:pi gaolod a gaogoda:munoyana.

⁴ Ameta LODote obape lopala alema:te welamalelo, oba alete wete wasewa tepala obape kamali lapoma:malelo, a:pite ilate oba ololamalelo.

⁵ A:sakelon oba tilite emolamalelo, Gasa baiga alikikiminada talapotata wamunamalelo, Ekalon enoba a:na:pi elamalelo, a:pite obape gibapimina gi binilamalelo. Gasa obape kanaba wama kaominamalelo a:pite A:sakelon wala lumate pa:pa edelamadili.

⁶ Atakabina lumate A:sadod egelamadili, a:pite na: Pilisitiyana lumumunu na: awagana: gi dapodamamalowa.

⁷ Obaimunu magata gobala na: dede wama egedamate, obai tatalina baya ma:ta nanilila wama egedamamalowa. Pa:pa kaokolamadilina lumate sa:dowali Godope luma eda:te Yuda wa gobala wa tida:na luma edelamadili, a:pite Ekalon baiganate enoba Yebusi baigana luma a:na:pi eda:madili.

⁸ Na: na:dowali lumada eladele obai gwanamada:minamalowa, giwa:lana lumate na:da:te pa:da:te edilina tepala. Giwa:lana lumate na:dowali lumumunu wa pa:pa gwama egelamadili, gi ase na: obai tida:lowa.

Sayonope kanabate palamalelona gi

⁹ O Sayonope aminagi a: kabigibegale sa:kelo,. Yelusalemape aminagi a: mamamido, A: ti, a:dowali kanaba a: dima pa:lelo, oba sogolanapa, oba dila galabe pawamina gi a:meta, oba misa:minapa a:pite donkile manate pa:lelo, enoba donki kowabile pa:lelo.

¹⁰ Na: Ipala:im wa gobala sakana giwa:la gawa wama alete welamalowa gwama Yelusalem baiga gobala giwa:la oso wama alete welamalowa, na: giwa:la gagi ka:ka:muamalowa. Oba waelabega baiga baigama gela gilala ladolamalelo. Obape kanabate tidolamalelona wa ya:dela wasewate dololo, a:pite ya:dela eta wasewate dololo. A:pite Yupala:itis wasewa palala obape wa a:ibaiga a:yatama welamalelo.

¹¹ Da: gima, na: dedele bata gi kakalamite miyamana, na: wi bininapa a:idobale da:dowali dibulana luma wama alete salamalowa.

¹² Da:dowali ta tolana baigama gwama na:da:la, da: taole papada:mida:na, wama saoda: gima enamadelewamena luma, amapula na: da:dima lalelowa, na: saki tepama begasegela da:dima nagala elamalowa.

¹³ Na: Yuda na:dowali gagi kota a:na:pi silimite, a:pite Ipala:im soba a:na:pi ditilamalowa. Sayon na: a:dowali sege mata pakada:minanamalowa, Gulis wama giwa:la eda:mada:le, a:pite a: giwa:la gili waiso a:na:pi minamalowa.

LODote saolamalelona gi

¹⁴ Enoba tepala LODote sidile obai dima saolamalelo, obape soba kadepate pa:ela gi a:na:pi elamalelo. LOD Awananapate tutuli iwilamalelo, oba siyale palana gogo laoda:le pa:lamalelo,

¹⁵ a:pite LOD Kamalinapate obaimunu a:wa saba elamalelo. Obaite ba:kele ditila lopalale luma dapolete a:ima ba:ba:minamadili. Obai sika nidiliyana luma a:na:pi mamamida:te midelamadili, obai enobai tawanapa kabuwa a:na:pi eda:madili lumate awana ba:kele genema sokotama wi pa:sa:pa:sa:da:minamadili.

¹⁶ Ya:ma kadepala LOD Godote obaimunu galabe pawamidamamalelo sip tida:napate obape sip gagasila sa:lele tidolamalelona gi a:na:pi. Obaite obape wa gobala pa:kepa:ke bapina luma edelamadili, ganabi waiya gobanapa ba:kele a:na:pi.

¹⁷ Obai imimi sa:selesege eda:madili, gi dabalibapi edelamadili. Konate dala apeda: kanika:da:na kamalida:minamalelo, waen wi kanika:te amina iya:ta: enoba a:na:pi da:minamalelo.