Sekal 8 - Godope Awananapa Gilala

LODote Yelusalem sa:kelamina gi layana gi.

¹ LOD Kamalinapape gilalatena: dima gwama pa:yana.

² Ma:ma enoba LOD Kamalinapate lalelona gilala. Na: kabigibegale Yelusalem gima nugu elelowa. Oba gima na: nugu eladele ilabega elelowa.

³ Ma:ma enoba LODote lalelona gilala. Na: Sayon wama gwama isola:te pa:te Yelusalem baigala elamalowa. Enoba tepala lumate Yelusalem baiga gibalama gi baiga gagi omona:madili, obai LOD Kamalinapape saka awana saka gagi omona:madili.

⁴ Ma:ma enoba LOD Kamalinapate lalelona gilala, a:ikoda wamidelamadilina ababayana dalata: gwama auwana atota: Yelusalem baigala nabidi ebatala gwama mitatelamadili, obai kakabeya bapima na:delamadili.

⁵ Yelusalem baiga nabidi tepala sekowabita: susukaowabita: waelabeyagaite iyadelamadili.

⁶ Ma:ma enoba LOD Kamalinapate lalelona gilala, gwama pa:da:madilina lumate ya:ma tepala ma:ma gima emosa:mida:madili, ameta na: ma:ma gima pa:pa emosa:minamalowa, LOD Kamalinapate lalelo.

⁷ Ma:ma enoba LOD Kamalinapate lalelona gilala, na: kadepate pulelona palale dowatilina wata: gwama kadepate siliminanona palatale dowatilina wata:le edelina na:dowali lumumunu galabe pawamidamamalowa.

⁸ Na: obai gwama alete pa:lamalowa Yelusalem baigala edelamada:le, obai na:dowali luma edelamadili, a:pite na: obaimunu God eladele obai dima gibalamanapata: sogolanapata: elamalowa.

⁹ Ma:ma enoba LOD Kamalinapate lalelona gilala. Obai LOD Kamalinapape genama sokate miyana kadepala a:mala edeliyana lumate wala gilala lada:na dalimunu gilala enamadiyana, enobai luma da: kamalibega eda:la balelamina genama a:na:mina gima.

¹⁰ Ya:ma tepa pa: saolanapa tepala, dalata: anekekeyapota:te oko wisa pa:pa aleletediliyana. Giwa:la emoda:dele lumate sa:lele obaimunu oko a:na:da:mina gima pa:pa awapa edeliyana, gi ase na: obaite obaimunu sopodala dima giwa:la edelamada:le gi midamayamana.

¹¹ Ameta na: ne lope ma:mai lumadima a:na:da:munoyamana gi amapula na: pa:pa gwama pa:diwina lumadima a:na:pi a:na:da:mina elamalowa, LOD Kamalinapate lalelo.

¹² De tolamadelewamena gulimiti sa:lele apeda:madili, ga:lip tokobe adami sa:lele alowada:madili, a:ile nana ulama sa:lele egelamadili, a:pite sawisakale mimida:bite pelolamalelo. Na: pa:diwina lumadima ma:mai gi waelabega dapulamalowa obaite alelamada:le.

¹³ Yudata: Islaelata: da: waelabega baigabaiga a iwida:miwamena, ameta amapula na: da:pe galabe pawamidamamalowa a:pite da: obai sa:kelada:minamadelewa. Ege emodela, da: kamalibega eda:la.

¹⁴ Ma:ma enoba LOD Kamalinapate lalelona gilala, da:dowali wawata:mite na:dowali ga:o gi pakamiyana tepala, na: galabe gi da:dima data gi iwaleladele da:dima pa:pa nagala eloyamana, LOD Kamalinapate lalelo,

¹⁵ enoba a:na:pile na: gi a iwalewamena ne Yelusalemata: Yudata:dima sa:sa:lena gi dapulamalale. Ege emodela.

¹⁶ Ma:mai enobai de a:na:da:minamadelewamena gi, da: ameta gibalama gilala etadima lata edela, a:pite gi babamina sabala da: gibapi gita: gwama sogola gita:le gi babamina.

¹⁷ Da: ege sopodaladima sosawe gi a:na:da:mina nabidi uwadelela, da: ege sewatale gilala lada: gi iwida:mina. Ma:mai gi waelabega gima na: ga:olelowa, LODote lalelo.

¹⁸ LOD Kamalinapape gilalate gwamana: dima pa:yana.

¹⁹ LOD Kamalinapate a:negelalelo, de samoso 4 ta:, 5 ta:, 7 ta:, gwama 10 ta:le baya awana eda:te edelewamena, Yuda ameta a:mai tetepala kabigibegale sa:keladele poko a:na:da:munamalelo. Enobala da: gibapi gita: gela gita: alela.

²⁰ Ma:ma enoba LOD Kamalinapate lalelona gilala. Luma waelabeyagaite pa:da:madili a:pite eta:mi baigabaigale pa:delamadili,

²¹ a:pite eta baigana lumate eta baigama na:da:te ma:na:pi lala eda:madili, saga amapula na:da:te LOD Kamalinapa dima timo edelete LOD kamalinapa uwalelamadili, na: welelowa.

²² Luma waelabega opa:pa:yanata: gwama kakamalina baigabaigata: LOD Kamalinapa uwalelamada:le Yelusalem baigama pa:da:madili, oba dima timo edelamada:le.

²³ Ma:ma enoba LOD Kamalinapate lalelona gilala. Enoba kadepala 10 dala gilala opa:pa:yana baigabaiga gobale menagi Yudanapa dalagipe kaliko ya:de gwalite oba anamadili, saga a:da na:da:, gi ase Godote a:da elelona gi sa: a enamada:mena.