Sekal 6 - Godope Awananapa Gilala

Giwa:la gawa sakisaki gi

¹ Na: gwama tao lotobada:te sakana giwa:la gawa sakisaki tida:yamana, obaite podo saki tepatepala wama saolaliyala tida:yamana, a:mai enobai blons podo saki.

² Lopanapa sakana giwa:la gawa wasana osote silida:miniyana, sakinapa giwa:la gawa enobai itida:na osote silida:miniyana,

³ abibilona osote salikiliwanapa giwala gawa siliminiyana, a:pite gwegweyada:na osote sakisakinapa giwa:la gawa siliminiyana, a:mai oso waelabeyagai kakamalibapi.

⁴ Na: amalena: dima gwalemonoyana pa:li lumagi anate tiliyamana, lod, ma:mai powa lopalaya.

⁵ Oba amale a:negelayana. Ma:mai enobai sawisakana limo sakisaki, obaite LODope sabale wama saoda:te a:ibaiga kabigibegama na:da:tedili.

⁶ Itilanapa osote siliminoyana giwa:la gawate wawi ya:denapa wama weleyana, a:pite abibilona osote siliminiyana giwa:la gawate kadepate siliminoyana palama weleyana, a:pite gwegweyadana osote siliminiyana giwa:la gawate siyaledi palama weleyana.

⁷ Ya:mai kakamalina osote wama saodiyana tepala, obai kaka gwalediliyana a:ibaiga kabigibegama na:da:te wa titate pa:na:da:mada:le. Pa:li lumagi amale a:negelayana, da: na:da:te a:ibaiga wa kabigibega wamidela. Enobala obai wama saoda:te na:diyana.

⁸ A:pite obatena: dima mamamida:te a:negelayana, aga ti, wawi ya:denapa wama na:diwina oso na:dowali limodima a:me gi atiwina.

Yosuwape ganabi waiya gi

⁹ LOD amale ma:ma gilalalena: dima saoyana.

¹⁰ Oba a:negelayana, Ba:bilon wala pa:diyana dibulana luma, Eledaita: Tobayata: Yedaiyata: dila silibata: gaolodota: alo. Enoba kadepa mengila Sepanayape mata Yosayape genemama welamalelo.

¹¹ A: golodota: silibata: alete wete waiya a:na:mite, a:pite sidinapa guwali dalagi Yosuwa Yeyosadape matape ganabima kaima:.

¹² A: oba anamalelo ma:ma enoba LOD Kamalinapate lalelona gilala. Ma:ma enoba dalagi obape gagi enoba I Tala, obate obape sabala tala etata wete LOD balelamina genama a:na:minamalelo.

¹³ Oba enoba lumagi LOD balelamina genama a:na:minamalelo, amale lumate kanaba lumagi awagalina awaga gile oba awagelamadili, oba amale obape lumumunu ganabinapa elamalelo. A:na:pile guwali dalagite obape sabale manonamalelo. Guwali dalagi guwali oko a:na:minadele oko sasaba saki menagida:munamalelo, guwali okota: kanaba okota:.

¹⁴ Obai ya:ma waiya Eledaita: Tobayata: Yedayata: Sepenayape mata Enata:dima atiwila ya:ma waiya LOD balelamina genama gobala dololamalelo luma iwalelada:mina gima.

¹⁵ Wabegala edelina dalate pa:da:te LOD balelamina genama a:na:mina gima amowa gi milamadili, a:pite da: itawa eda:madelewa LOD Kamalinapate na: da:dima auna:miyana gi. Da: LOD da:dowali Gododima sa:lele gima kamida:madelewamena, ma:mai gi saoda:madili.