Sekal 5 - Godope Awananapa Gilala

Puwite weloyana pepa golominanapa gi

¹ Na: tao gwama lotobada:te sidi palala puwite weloyana pepa golomina tiliyamana.

² Obate na: nanate tiliyana, a: powa lopala tileloya. Na: ameta gilala wisa eyamana, na: puwite welelona pepa golominanapa tilelowa. Lewa awapamina 9 mita a:pite lupita awapamina 5 mita.

³ Obatena: dima layana, ma:ma enoba iwada:mina gite wa kabigibegama welelo, gi ase ma:ma pepa ya:dela dololona gilala enoba ilina luma waelabega wama auwada:mina gilalate dololo, ya:dela dololona gilala enoba sewatale gilala ladilina luma waelabega wama auda: mina gite dololo.

⁴ LOD Kamalinapate lalelo, na: ma:ma pepa papamina wama auwamimela obate ilina lumumunu gegenamata: sewatale na:dowali gagile gilala ladilina lumumunu gegenamata: waelabega gobama sa:elamalelo. Ya:ma pepa golomina genama gobala dolate genama ita: ba:keleta: sosaweda:munamalelo.

Eleka:isa gobala mananoyana susa:gi

⁵ A:pite na:da gwalemonoyana pa:li lumagite pa:tena: dima a:negelayana, a: tao lotobada:te ya:ma saolelona lopala ti.

⁶ Na: amale a:nege layamana, ya:ma powa lopalaya. Oba amale wisa eyana. Ya:ma mene awapamina ka:isa. A:pite oba gwama a:negelayana, ma:ma enoba wa gobala edelina lumumunu sosawe gi.

⁷ Amale ya:ma auli ka:isa ede pakeyana a:pite susa:gi a:ma gobala mananoyana.

⁸ Oba amale layana, ma:ma enoba sosawe gi. A:pite oba a:ma susa:gi gwama ka:isa gobama usumite auli ede gwama kamiyana.

⁹ A:pite na: tao lotobada:te ato saki wama saoliyana tida:yamana, ibowate obaimunu a:ita gobale laodoloyana. Obaimunu a:ita enoba kowa:go puwida:pe a:ita a:na:pi. Obaite ya:ma ele ka:isa a:ile egete sidima pakamiyana.

¹⁰ Na:da gwalemonoyana pa:li lumagi anate tiliyamana, obai saki ya:ma ele ka:isa miya wama egete na:niliya.

¹¹ Oba amale a:negelayana, Obai ya:ma ele ka:isa Ba:bilon wama egete na:nili, amale obape genama a:na:minamalale. A:ma genama gi guwila obai a:ma ele ka:isape saba bapima a:ma ele ka:isa milamadili.