Sekal 4 - Godope Awananapa Gilala

Golod waikita: Olib I saki gi

¹ A:pite na:da gwalemonoyana pa:li lumagi gwama pa:te na: ipa:lana:miyana, tenelalona lumagi ipa:laminamalelona gi a:na:pi.

² Oba na: nanate tiliyana, a: powa tilaloya. Na: ameta a:nege layamana. Na: golod waiki sokate tilalowa. A:ma sidila kabuwate dololo, a:pite 7 waiki a:mala pa:ipilili a:pite 7 siwi a:meta a:mai waikima dowatili.

³ Gwama waiki ebatala Olib i saki a:meta, eta kabuwa mimiti ya:dela a:pite eta kabuwa pele ya:dela litilili.

⁴ Na:da gwalemonoyana pa:li lumagi anate tiliyamana, lod, ma:mai lopala powaya.

⁵ Oba ameta a:negelayana, mamai lopala gi a: pa: itawata. Na: ameta a:nege layamana, lod, na: pa: itawa.

⁶ Enobala obana: dima a:negelayana, ma:ma enoba LODote Selubabel dima lalelona gilala. Pa: kamalile, pa: pa:nipa:nile ameta na:dowali limole a:na:minamadili. Ma:ma enoba LOD Kamalinapate lalelona gilala.

⁷ Kalekalenapa saka, a: powa lopalaya. Selubabelepe sosoko palala a: wa alapolagabanapa wa elamalelo. A:pite oba genama sidinapa ba:kele egete milelola lumate mamamida:te begale a:nege lalamadili, God ewamena, God ewamena.

⁸ Amale LODope gilalana: dima pa:yana,

⁹ Selubabelepe maite ma:ma balelamina genama sokate miyana. Obape maite a:na:mina gi guminamalelo. Enoba tepala a: LOD Kamalinapate a: dima na: auna:miwina gi itawa elamalelo.

¹⁰ Powate lumagite kokowabina gi pa: gige laleloya. Lumate tao awapamina Selubabelepe mai gobala dololamalelona gi tilite sa:keladelamadili. Ma:ma 7 tao enobai LODope taote a:i baiga kabigibega gobala tida:da wamidili.

¹¹ Amale na: pa:li lumagi anate tiliyamana, waiki mimiti ya:deta: pele ya:deta:la litatilina Olib I saki a:ta:piya.

¹² Na: gwama oba anate tiliyamana, ma:mai Olib i tata saki sape sasamininina golod paipo saki ebatala litatilina, obaimunu gi a:ta:piya.

¹³ Oba ameta a:negelayana, ma:mai lopalaimunu gi a: pa: itawata. Na: a:nege layamana, lod na: pa: itawa.

¹⁴ Enobala oba a:negelayana. Ma:mai enobai mai etapada:mida:na dala saki, obaite a:i baigala kabiginapa LOD dima gisaola elili.