Sekal 2 - Godope Awananapa Gilala

Awapamina taoda lelaloyana dalagi

¹ Na: tao lotobada:te na:dowali lopa palama dalagi tiliyamana, obate awapamina tao obape maile egete lelaloyana.

² Na: amale oba anate tiliyamana, a: miyama weleloya. Oba ameta na: nanayana. Na: Yelusalem baigape gigisata: gwama kabigita: awapamite tila gima welelowa.

³ Amale na:da gwalemonoyana pa:li dalagi na: elatena:yala a:pite eta pa:li dalagite oba dima pa:yana.

⁴ Amale oba dima a:negelayana, a: gulada:. Wete ya:ma apela kanika:napa dalagi ana, Yelusalem wa ta bininapa siti elamalelo gi ase lumata: gwama anekekeyapo waelabapi a:mala edeli.

⁵ A:pite na: na:ya a:mala ilale ta lapilamalowa, LODote lalelo. A:pite na: na:ya obape lulila elamalowa.

⁶ Pa:da:la, pa:da:la. Da: wawi ya:dela dololona wale wama saoda:la, LODote lalelo. Gi ase na: da: a sawisakana laoda: sakisaki gobama opa:ya auda:mina ewamena, LODote lalelo.

⁷ Sayon a: pa:. Ba:bilon baigala edelina luma da: wama gugula:la.

⁸ Ma:ma enoba LOD Kamalinapate lalelona gilala. Obate na: pakana:mite a: giwa:la miyana eta:mi a:ibaigama na: auna:miyana. Powate lumagite da: daloda:minamalelona obate LODope tao lapila dalowaminamalelo.

⁹ Na: na:dowali mai obai dima pakaminamalowa. Obaite taole papada:mina gi gobama aliyana lumate ameta obai apeyana eda:madili. Amale da: itawa eda:madelewa LOD Kamalipate na: auna:miwina gi.

¹⁰ O Sayononapa aminagi, a: mamamida:te sa:kelalo gi ase na: a: dima pa:te a: gobala elamalowa, LODote lalelo.

¹¹ Waelabega baigabaigate a:ma kadepala LODoda paoda:madili amale obaite na:dowali luma eda:madili. Na: da: gobala elamalowa a:pite da: LOD Kamalinapate da: dima na: auna:miyana gi itawa eda:madelewa.

¹² Awananapa wala LODote Yuda wa obape wa mite Yelusalem gwama obape wage lalamalelo.

¹³ A:ibaigana luma waelabega da: LODope sososko palala kakaleda:te litatala gi ase oba obape Awana genamale a patate lelawena.