Sekal 13 - Godope Awananapa Gilala

Sosawe wida:mina gi

¹ Ya:ma kadepala wi daodo pisa ka:elamalelo Da:ibidipe lumata: Yelusalem baigana lumata:dima, obaimunu sosawe gita: tatali gita: wida:mina gima.

² Ya:ma kadepala, na: wa gobala ididalimunu gagi wama sawada:munamalowa, a:pite luma obai pa:pa gwama iwaledelamadili, LOD Kamalinapate lalelo. Na: wala gilala lada:nata: tatali gi limota: wa gobala wama galada:minamalowa.

³ Etate wala gilala ladolamalelona, oba mata tiliyana agita: wawata:, oba dima a:nege lalamadili, a: pa:pa eolamalelo, gi ase a: LODope gagile sewata gilala ladoloyana. Obate wala gilala ladolamalelona tepala, obape wawata: agita:te oba gilile kuluminamadili.

⁴ Ya:ma kadepala wala gilala lada:na dala waelabeyagai obaite inigwile tidiliyana gima pisala edelamadili. Obaite wala gilala lada:na lumate kakaminete diliyana konale lutitiliyana kaliko pa:pa kakaminiyana, luma gasuda:mina gima a:na:pi obai pa: wala gilala lada:na dala.

⁵ Obate a:nege lalamalelo, na: pa: wala gilala lada:napa. Na: enoba egada tilanapa dalagi, na:pe apela kanika: tepale asemite enoba oko gobale elelowa.

⁶ Etate oba anate tilamalelona, a:dowali obe tepana apapaya a:ta:piya, oba ameta a:nege lalamalelo, na:dowali sopodalimunu genamala lumate na: apapaya na:miyana.

Sip tida:napimunu gi babamina gi

⁷ Giwa:la gili, a: sale, na:dowali sip tida:napa lapola gima, na: auwanapa dalagi lapola gima, LOD Kamalinapate lalelo. Da: sip tida:napa lapowamela, sipite wama kaokosa:mida:madili, a:pite na: na:dowali maile kokowabina dapolamalowa.

⁸ Wa kabigibega gobala, LODote lalelo, saki papala lumate dapolale dapolamadili, ameta salikiliwanapa wa pala gobala lumate edelamadili.

⁹ Ya:ma salikiliwanapa pala gobana luma na: ila gobama alete pa:lamalowa, lumate siliba ololetedilina gi a:na:pi tatali binida:mada:le na: obai oloda:malowa, a:pite golod a:na:pi na: obai teteda:te tilamalowa. Obai na:dowali gagima mamamidiwila na: obai dima gilala ladolamalowa, na: a:nege lalamalowa, obai enobai na:dowali luma, a:pite obai a:nege lalamadili, LOD enoba sa:dowali God.