Sekal 10 - Godope Awananapa Gilala

LODote Yuda wa sa:lele iwa:lanapa elamalelona gi

¹ Gogo pa: pa:lelona tepala da: gwi gima LOD anate tila, gi ase LODote gogo tepana iti a:na:da:munotelelo. Obate lumadima gwi auda:munotelelo, obate egada gobana lopala waelabega lumadima dapulotelelo.

² De alete edelewamena idadalite sewatana gilala da:dima ladili, wasiwa gidana dalate inigwile sewata gi tida:tedili, obaite inigwile tida:tedilina gi enoba sewata gi, obaite sewatale balela gilala ladeletedili. Enobala luma wama kaokoda:na sip a:na:pi pa: sogolale a: wamidili, obai tida:napa bini gobala wamidili.

³ Na:dowali ga:o gite sip tida:na daladima ilabega elelo, a:pite na: obaimunu ganabina daladima wisa elamalowa, LOD Kamalinapate sa:lele tidolamalelo enoba obape sip gagasila Yuda luma, a:pite giwa:la gobala ganabi lapila egete sa:kelalona oso a:na:pida:minamalelo.

⁴ Yuda wa gobale sokatenapa ba:kele saolamalelo, oba gobala bikiwa genama gwalila ola saolamalelo, oba gobala giwa:la gagi saolamalelo, oba gobala gaganabina dala waelabeyagai saoda:madili.

⁵ Obai daligile kakamalina dala a:na:pi eda:dele bodadana nabidile giwa:la edelamadili. Gi ase LOD obaida elelo, obai giwa:la eda:te osole wamidilina dala a:ima ba:ba:minamadili.

⁶ Na: Yudape luma kamalida:mite a:pite Yausepepe lumumunu galabe pawamidamamalowa. Na: obai gwama sa:leda:minamalowa gi ase na: obai aweda:lowa. Obai ne lope pa:pa na:sa:da:miyamana luma a:na:pi eda:madili, gi ase na: enoba LOD obaimunu God, na: obai dima gilala wisa ladolamalowa.

⁷ Ipala:im wana dala kakamalina dala a:na:pi edelamadili, obai adami wi kanika: nidiliwina dala a:na:pi edelamadili. Obaimunu sekowabi obai tida:te sa:keladelamadili, obai gwana gobale LOD dima sa:keladelamadili.

⁸ Na: obai dima susuwada:malowa a:pite obai a:gobama gaogoda:munamalowa. Gibalama, na: wisale obai alolamalowa, obai gwama waeda:madili lope waediyana gi a:na:pi.

⁹ Na: opa:pa:yana luma gobama obai ba:ba:munamalowamena tepala, obai wa amatana baiga gobale eda:dele na: gi iwalelamadili. Obaita: obaimunu sekowabita: a:mala edelete gwama pa:da:madili.

¹⁰ Na: Isipt wala obai gwama alete pa:lamalowa Asiliya wale na: obai gwama gaogoda:minamalowa. Na: Giliyad wata: Lebanon wata:ma obai alete pa:wamela, obaite eda: gima eda: saba pa:pa awapa elamalelo.

¹¹ Obai mene gidanapa wasewa gobale pa:da:madili, wasewa wite patimada:madilina tepala na: obai gelada:minamalowa, a:pite gaolanapa Nael wasewanapa wite apamalelo. Asiliya wape na: awagana: gi na: a:ima miditilamalowa. A:pite Isipt wanapa kanabape gagi wama kaolamalelo.

¹² Na: LOD gobala obai kamalida:minamalowa, a:pite obaite obape gagile wamidelamadili, LODote lalelo.