Osey 9 - Godope Awananapa Gilala

Islaelpe sosawe gi wisa

¹ O Islael, a: ege sa:kelo, a: ege eta:mi wana lumate sa:kelada:dele maiyatilina gi a:na:pi elamalelo. Gi ase a: a:dowali God pa:pa sa:lele iwaleloyana, a: obebe ewadilina kipale gosa kabigibegale iwaledoloyana adami sasada:miniyana sasaba waelabeyagaile.

² Adami sasada:miniyana sasabata: adami wi tukuda:mina sasabata:te nana loplala lumadima pa:pa dapilamadili, kanika:da:na adami wite luma pa:pa amowada:malelo.

³ Obaite LODope wa gobala pa:pa dowatamidelamadili, Ipala:im obate gwama Isipt wama isola:lete wete a:mala Asiliya wala tatalina baya naonamalelo.

⁴ Obaite LOD dima waen nagala lopala pa:pa apilamadili, a:pite obaimunu nagala lopalate oba pa:pa sa:kelamainamadili. A:mai nagala lopala obai dima ameta sasala edelina lumumunu baya a:na:pi elamalelo. A:mai baya naenamadilina lumate sosawena luma eda:madili. Ma:ma bayate obai menagidima dololamalelo, a:ma bayate LODope genama gobama pa:pa dilamalelo.

⁵ A: a:pe omona:napa balelamina kadepala a: powa gi a:na:minamaleloya, LODope balelamina kadepala a: powa gi a:na:minamaleloya.

⁶ Galabe gobala wama emoda:te saoda:madilina, Isipt obai menagi sabama alolamalelo, a:pite Mepisite obai a:ida:munamalelo. Obaimunu silibate dowatiliyana sasaba ameta palepate apeda:madili, a:pite oladana tokobete obaimunu bikiwala apeda:madili.

⁷ Sosawe gipe wisa kadepa a saolama pa:lelo, obaimunu sosawe gipe wisa alela kadepa a auwapula ewena. Awapa Islael ma:ma gi itawa elamalelo. Gi ase a:dowali sosawe gi waelabapi a:pite a:dowali ga:o gi kabigibapi, pa: saoda:na gi lope ladolotanapa dalagi de ameta sewatanapa lumagi minenewa, limole tawaminanapa dalagi a daledalenapage layamana.

⁸ Pa: saoda:na gi lope ladolotanapa dalagita:, gwama Godota:, obai enobai Ipala:im wa lawilana edeli, ameta ya:wite obate waminanona nabidi tetepala oba atolominini, a:pite giwa:la gite obape Godope genama gobala oba atolominini.

⁹ Obaite sosawe gi gobama a gaola tepa bapima koliyana, enoba Gibiyape kadepala saoyana gi a:na:pi. Godote obaimunu sosawe a:na:da:mina gi iwaleda:wamunamalelo a:pite a:ma gima obai dima wisa dapulamalelo.

¹⁰ Ne lope Islael tiliyamana tepala na: sa:kelaloyamana, wi bininapa wala ga:lip adami tilapela eyamana, ne lope da:dowali wawata:mi tideyamana tepala lopena adamite pigi ile dowatiyana a:na:pi tida: pela eyamana. Ameta obai Bal Peyo wama pa:diyana tepala, obaite a:ma pa: ididalagi dima obaiya obai awanana da:miyana, a:pite obaite ya:ma lopala apela eda:dele pa:pa awapa ediyana.

¹¹ Ipala:imipe lulilate puwida: a:na:pi wama puwite welewela, nena gite dololamalelo, oposoma gi bini, amina gi bini.

¹² Obaite sege dapilamadilina tepala, obaimunu kaokola gi na: enoba sokatenapa lumagi. Awe iyo obai kakabeya, ne obaile wama esa:malowamena tepala.

¹³ Na: Taya baiga tiliyamana a:na:pile Ipalaima tiliyamana, sa:lenapa sabama toda:yana. Ameta Ipalamite luma dapolilina lumadima obaimunu sege dapulamalelo.

¹⁴ O LOD, obai dima dapu, a: powa lopala obai dima dapulamaleloya, Obaidima sege gwanale pasaleda: ana dapu, a:pite dina binina omo obai dima dapu.

¹⁵ Gilagal wala obaimunu pa: sogoda:na a:na:da:mina gima na: a:mala obai ilapala eloyamana. Obaimunu sosawe a:na:da:mina gima na: obai na:dowali genama gobala wama alete saolamalowa. Na: obai pa:pa gwama awedolamalowa, obaimunu gaganabinate na: asakana:minili.

¹⁶ Ipalaim a sosawe eyana obaimunu sasa a sesediyana, Obaite adami ulama pa:pa alawada:minili. Obai sege mata tidelamadili ameta, ne a:mai obaite iwaledilina sege mata dapolamalowa.

¹⁷ Na:dowali Godote obai a ilapala eyana, gi ase obai obape gilalama ilapala ediyana, a:pite obaite eta:mi wala a: wamida:na edelamadili.