Osey 8 - Godope Awananapa Gilala

Islael lumate paiwa ganabi nana ulama dapolamadili

¹ A:pe magata pima tutuli miya:, giwa:lanapa waliyate LODope genama sidile puwilamina:no, gi ase luma na:dowali gima kamina gi babala a ka:miyana a:pite obai na:dowali babala asakamiyana.

² Islaelatena: dima mamamidolo, O, sa:dowali God, sa: a: gi itawada:.

³ Ameta Islael sa:lenapa gi a ilapala eyana, giwa:lanapate oba gwalama:malelo.

⁴ Obaite kakanaba pakakaminini pa: na:pe itawa gile, na:pe gilala bini gobala obaite kanabape sege domonini. Obaimunu silibata: gaolodota:le obaite obaiya obai gima ididali a:na:da:miniyana enobala obaite obaiya obai dima galabe egete pa:diyana.

⁵ O Sama:liya, a:dowali bulumakao kowabi ididaligi wama miditi, Na:dowali ga:o gite a:ma gima babalelalo. Obai powa tepala tatali binina edelamadiliya.

⁶ Obai Islaelana luma, Ma:ma bulumakao lumagite maile a:na:miyana lopala, enobala oba pa: God. Obate baelamalelona alisasi bapi eda:madili, ya:ma Sa:maliya wanapa ka:o kowabi.

⁷ Obaite ibowa todiyana a:pite nana ulama nana tepala ameta paiwa ganabi tiliyana. Kon i bapi ganabi bininapa, obate ulama pa:pa alawaminamalelo. Ameta kon dowata tepala ulama atakabinate naenamadili.

⁸ Islael a munitiyana, oba amapula eta:mi luma gobala elelo pa: lopala a:na:pi, lumate pa:pa iwiminili.

⁹ Obaite Asiliya wama a didiyana Obaite wa gobanapa donki a:na:pi oba kopa wa gobala a: wamina:no. Ipala:im obaya oba a obate iwaleda:lona daladima ewadoloyana.

¹⁰ Ameta obaite eta:mi a:ibaigana lumadima obaiya obai ewadiliyana sabala na: obai menagi sabama alolamalowa. Obaite asemite lopala binina eda:madili, kamalinapa kanabape a:na:mina gi gobala eda:dele.

¹¹ Islael obate sosawe wida:mina gima balelada:mina sasaba waelabeyagai a:na:da:munoyana, a:mai sasaba a ameta sosawe a:na:da:mina sasaba ediyana.

¹² Na: obai gima na:pe babala gobama gi waelabeyagai aliloyamana, ameta obaite a:ma gi ameta atakabinapimunu gi miyana.

¹³ Obaitena: dima nagala eda:tediliyana nagala lopala nagala gima alitediliyana amale obaite a:mai sesepo nanetediliyana, ameta LOD obai dima pa:pa sa:kelalotoloyana. Amapula obate obaimunu sosawe a:na:da:mina gi iwaleda:munamalelo a:pite obaimunu sosawe gi wisa dapulamalelo. Obaite gwama Isipt wama isola:da:madili.

¹⁴ Islael obate oba a:na:minanapa lumagi a elatete eta:mi kabigida:na kanaba gegenama a a:na:da:munoyana, Yuda obate giwa:late sa:ela gima pa: awapada:na baigabaiga a a:na:da:munoyana. Ameta na: ila obaimunu baiga gobama auwada:minamalowa a:mai ilate amale a:mai kakaleda:na baigabaiga oloda:malelo.