Osey 7 - Godope Awananapa Gilala

¹ Ne Islael amowamalowamena, Ipala:imipe sosawe gite kekema saoda:madili, a:pite Samaliyape sosawe a:na:da:mina gi kekeda:madili. Obai sewata gi gobala edeli, ilinate gegenama gogobama ilile sa:eda:tedili, ilina gagasida:te nabidi tetepala luma ilida:minini,

² ameta obai a:ma gi pa:pa itawa edili, a:na:pi na: obaimunu sosawe a:na:da:mina gi waelabeyagai iwaleda:lowa. Obaimunu sosawe gite obai a kawapida:yana, waelabega tepala obaimunu sosawe a:na:da:mina gi na: tida:lowa.

³ Obaite a:na:da:mininina sosawena gile obaimunu kanaba dalagi sa:kelaminili. A:pite kanaba dalagipe pulagi iya:ta: sa:kelaminili obaimunu sewata gile.

⁴ Obai waelabeyagai enobai dala bilibilina edeli, ba:kele seyata ilate ololapela elelo, ase ilate tepa waelabegale babalelalo, palawa gwalilanapate ila pa:pa gwama tuminamalelo, palawa gwalila tepala asemite palawate potamalelona tepama saolamalelo.

⁵ Sa:dowali kanaba dalagipe poko kadepala, kanaba dalagipe pulagite waen sikale sosawe bapi eyana, a:pite obate luma ilapala da:mida:na lumada mai atimada:yana.

⁶ Obaimunu alipo ba:kele seyata a:na:pi, obaite oba dima ilada saodiyana. Obaimunu ga:o gite isa lewabegale dololo, a:pite kadepa puwela ila babalela a:na:pi etelelo.

⁷ Seyata ilanapa a:na:pi obai waelabega a a:na:pi ediyana, Obaite obaimunu gaganabina munitidili. Obaimunu kakanaba waelabeyagai nisisilili, a:pite etate na: pa:pa awana:miyana.

⁸ Ipala:imite eta:mi a:ibaigada menagi elelo. Ipala:im enoba sedeseda: eyana baya a:na:pi elelo, ya:de pa: esa:minananapa.

⁹ Atakabinate obape kamali a binimiyana, ameta oba a:ma gi pa:pa itawa eyana. Obape tita a kalate kawapiyana, ameta oba a:ma gi pa:pa tilelo.

¹⁰ Islaelpe na: awagana: gite lalelo Islael sosawenapa, ameta oba LOD Gododima pa:pa gwama isola:yana gwama oba pa:pa uwaloloyana.

¹¹ Ipala:im enoba keleba puwida: a:na:pi, oba gasumina gima gi pa: kalekalebega gwama oba iwalela pa: kalekale, obate eta tepala Isipt wadima mamamida:lo eta tepala obate Asiliyadima esa:lo.

¹² Obai na:diwila na: na:dowali tiya obai sidima miditilamalowa. Na: obai sidina puwida: a:na:pi a:ima silida:minamalowa. Obai menagimite edelamadilina gilala enamamalowamena tepala, na: obai alolamalowa.

¹³ Obai kakabeya, gi ase obai na:le a wama na:diyana, Obai sosawe eda:madili, gi ase obai na: asakana:miniyana, Na: obai wisale alolamalale iwiminanowa ameta obai na: gima sewatana gilala ladili.

¹⁴ Obai pa:pa obaimunu alipolena: dima adimadili ameta obai obaimunu tene sabala adimadili. Obaite kona taota: adami wi kanika:ta:ma menagimite gaogoda:minadele ameta na:le wama esa:dili.

¹⁵ Ne obai gi ituda:mite a:pite kamalida:miyamana, ameta obaina: dima sosawe a:na:mina gi sa:leminini.

¹⁶ Obai Kamalinapa Sidinapadima pa:pa esa:dili, obai enoba saitasaitanapa gagi a:na:pi. Obaimunu gaganabinate gili wasole nisisilamadili obaimunu pa: sogoda:na asakada:mina gilala gile. A:ma gima lumate obai iyada:minamadili Isipt wa gobala.