Osey 6 - Godope Awananapa Gilala

Islaelana lumumunu gi bamina gi

¹ Pa:dala, saga gwama LODdima esaeda:madili. Obate sa: a galabe sa:miyana ameta oba sa:pe galabe gwama sa:leda:munamalelo, obate sa: meleda sa:miyana, ameta oba sa:pe apapaya gwama salolamalelo.

² Sakai kadepa pa:na:diwila oba sa: gwama kamalisa:minamalelo, salikiliwanapa kadepala oba sa: gwama kamalisa:minamalelo se obape sosoko palala edelamada:le.

³ Awapa sa: LOD gi itawa eda:madili, awapa gi oba itawa eda: gima sa: begale iwiminamadili. Kadepape saola gite lalelo, oba saolamalelo, oba sa:dima tawa sulama gwi a:na:pi pa:lamalelo, obate a:i bauwaminanona gogo tepanapa gwi a:na:pi.

⁴ Ipala:im, na: powa gi a: dima a:na:minamalowaya, Yuda, na: powa gi a: dima a:na:minamalowaya, A:pe awe gi enoba ibasegenapa mimida:bi a:na:pi, a:ibaiganapa waote binilalona gi a:na:pi.

⁵ Enobala na: da: ta:ta:munoyamana na:pe gigiwina dalale, Ne da: na:pe magata gobana gilalale dapoyamana, na:pe gi bamina gite da:dima kadepa pa:ela gi a:na:pi eyana.

⁶ Na: kabiginapa awe nagala iwiminoyamana, pa: nagala lopala, a:pite God itawa gi da: gobama iwimunoyamana, pa: ilale oloda:na nagala lopala.

⁷ A:da:m a:na:pi obai kalekalenapa bata gi a ka:miyana, obai ya:mala na:le wama na:diyana.

⁸ Giliyad enoba sosawe gi a:na:da:mininina dalimunu wa, dededana a:iwate a:mala dowatili.

⁹ Obaite lumagi lapola gima a:wada:te mitatilina luma a:na:pi guwali dala gagsida: enobai a:na:pina edeli, obaite nabidi tepala luma dapotata na:da:te Sekem nabidima saodili, obaite pisalana sosawe gi a:na:da:minini.

¹⁰ Na: sosawe bapinapa gi a tiliyamana Islael luma gobala. A:ma wala obaite Ipala:im obe ewada: gima atiyana a:pite Islael a sosawe eyana.

¹¹ A:pite a: Yuda gima, ne na:dowali lumumunu sa:sa:lena gi pakakaminamalowamena tepala, sosawe gipe nana ulama dapola tepa a saowena.