Osey 5 - Godope Awananapa Gilala

Islael lumumunu gi bamina gite pa:loyana gi

¹ Da: guwali dala, ma:ma gilala enamada:la Da: Islaelana luma sa:lele enamada:la Enamada:la, da: kanabape genamana, Ma:ma gi bamina gi da: gima pa:lelo. Da: Misipa wala ya:wi a:na:pi edeleyamana, da:pe tiyate Tabo wa egetata weleyana.

² Gaganabina asakada:mida:na lumate luma dapola gi gobama sa:eda:te na:dili, a:pite na: obai waelabega wisa dapulamalowa.

³ Na: Ipala:imipe gi waelabega itawa bapi, Islael na:dile pa:pa a:wate elelo Ipala:im, a: a a:ya a: ewada: gima esa:wena Islael a: a sosawe bapi ewena.

⁴ Obaimunu gite obai awapa gi pa:pa datalo, obaite obaimunu Gododima gwama pa:da:mada:le. Obaiya obai ewada: gi a:meta obaimunu alipo gobala dololo. Obai LOD gi pa: itawada:.

⁵ Islaelpe na: awagana: gite obai asakada:mina gima gibaba elelelo. Islael a:ta: gwama Ipala:imita: da: da:pe sosawe gobala a:i gagaminenewa, Yuda iya:ta: obaida a:i gagamineno.

⁶ Obaite obaimunu bulumakaota: sipita:da na:nili, LOD uwalelamada:le, obai oba pa:pa tilamadili, gi ase oba obaidile a a:wayana.

⁷ Obai LODdima pa:pa gima kamidili, obaite ili sege mata aminini. Amapulale obaimunu samoso kanika: balelamina gite obaita: obaimunu wata: dapolamalelo.

⁸ Gibiya wala tutuli iwila, Lama wala i umina dapola. Bet Aben wala giwa:la gilalale ga:gemadela Beniyamin a: lopa ete we.

⁹ Ipala:im wa titimiwila a:napa wa elamalelo, enoba obate a:na:da:munoyana gi wisate saodelamadilina kadepala. Islael udagaudaga gobala, Na: saoda:ma pa:dilina gi ladolowa.

¹⁰ Yuda wana gaganabina dala enobai wa a:yatada:la dowatilina ba:kele wama gagalada:mida:na luma a:na:pi edeli. Na: na:dowali ga:o gi obai dima saminamalowa, wite lapoda:te pa:lamalelona gi a:na:pi.

¹¹ Ipala:im a a:ima etomiyana. Obate gi baminano, gi ase obate ididali lopala gwaladama gima bata gi aliloyana.

¹² Na: nupi a:na:pi elelowa Ipala:im dima, Na: Yuda luma dapolamalowa ilate ipe obema dilelona gi a:na:pi.

¹³ Ipala:imite obape gite tila gi tiliyana tepala, a:pite Yudate obape palewa tiliyana tepala, Ipala:im amale asemite Asiliya dima esa:yana, a:pite kabiginapa kanabadima amowa gima esa:yana. Ameta oba a: sa:lemina gima nabidi pa:pa tilamalelo, gwama a:pe palewa pa:pa aula:minamalelo.

¹⁴ Na: Ipala:imi dima layon a:na:pi elamalowa Yuda lumadima kabiginapa layon a:na:pi elamalowa. Na: obai tatalada:munote a:pite wama welamalowa, Na: obai wama a:ipatite welamalowa, eta lumagi bini obai a:gegeda: gima.

¹⁵ Na: amale na:dowali wama gwama welamalowa, amale obai obaimunu sosawe gima gibaba eda:madili. Amale obai na:pe imimi uwalelamadili, obaimunu ededa:mida: gobala obaite na: gamobegale uwalenenamadili.