Osey 4 - Godope Awananapa Gilala

LOD ote Islael luma danadoloyana gi

¹ LODope gilala enamada:la da: Islaelana luma gi ase LOD dile kamalinapa da: danada: gilala a:meta, da: ma:ma wala edelewamena lumadima. Ma:ma wala gibalama gi bini, gwama awe gi bini, gwama God iwalelanapa lumagi bini.

² Iwamina gi menagite dololo, a:pite sewata gita: gwama luma dapola gita:, ili gita: atodana dala ili gita: daladana ato ili gita:, obaite babala waelabega ka:ka:minini, a:pite dede samina gite gwala:ma: gwala:ma: elelo.

³ Ma:ma gima wate sabelelo, A:pite a:ma wala edelamadilina luma matate a:ima pelolamalelo. Wa gobana waita: gwama sidile puwida:midilina puwida:ta: a:pite wi gobana mewata: a kaokolili.

⁴ Ameta ege eta lumagite etadima gi bamina gi atamalelo, ege etate eta sosawenapage lalamalelo, gi ase da:pe luma enobai a:na:pina obaite guwali dalimunu gi babaminetana.

⁵ Da: a:i gagaminetedelewa kadepata: isata:la, a:pite Godope wala gilala lada:na dalate da:da niseseletedili. Enobala na: a:pe agi lapolamalowa,

⁶ na:pe luma itawa gi bini gile kaokoliyana. Gi ase a: itawa gi a ilapala eyana, na: iya:ta: a:e guwali ela gima a: ilapala elamalowa, gi ase a: a:dowali Godope babala a baiga dapoyana. Na: a:dowali sege iya:ta: baiga dapolamalowa.

⁷ Guwali dalate waedelaliyala, na: dima a:na:miniyana sosawe gite waediyana. Obaite na:pe Lulila ameta sosawena ididali dima mai giwitada: edeliyana.

⁸ Obaite na:dowali lumate sosawe gi wisama apiliyana nagala lopala naniyana, a:pite obai lumate a:na:da:miniyana sosawe gima sa:keladiliyana.

⁹ A:pite gi enoba a:na:pi dololo, luma guwali dala a:na:pi edeli. Na: sosawe gi wisa obai saki dima dapulamalowa obaimunu a:na:mina gima a:pite gwama obai dima wisa elamalowa obaimunu sosawe a:na:da:minamina gima.

¹⁰ Obai nanetedelamadili ameta pa:pa awapa eda:tedelamadili, obaite obaiya obaimunu obebe ewadelamadili ameta pa:pa waedelamadili, gi ase obai LOD a elatiyana.

¹¹ Obebe ewada: gita: pakalanapa waen sikata: gwama kanika:napa waen sikata:te obaimunu gi iwaleda: a wama aledamate weleyana.

¹² Na:dowali luma Obaite ididali dima na:da:tedili a:pite i palate obaimunu gilala wisa elotelelo. Obaiya obai ewada: gi limote obai a wama alete ka:oyana, obai obaimunu God pa:pa awele iwaleleli.

¹³ Obaite saka sidile nagala lopala apiletediliyana. A:pite obaite ilale oleletediliyana nagala lopala saka sidile ololiyana, Oka ita: Popola ita: gwama Telebinitita: i a:iya:dela. Gi ase amale a:wa saba sa:lepula bapi. Enobala da:pe amina ameta obebe ewada: gima esa:dilila, da:pe apili ameta dala bilibili gima esa:dili.

¹⁴ Na: da:pe amina pa:pa dapolamalowa obaite obebe ewada: gima eseda:madilina tepala, gwama da:pe apili iya:ta: enoba a:na:pi, obaite dala bilibili gima eseda:madilina tepala gi ase dala obaiya dala bilibilina ato dima na:da:tedili a:pite obaite ididali balelada:minetedilina genama gobana dala bilibilina atoda ewama: gi a:na:da:minetedili. Gi iwaleda: binina lumate a:ima niseselete sosawe eda:madili.

¹⁵ O Islael, a: dala bilibilinapa elelona tepala, awapa Yuda pa:pa a: a:na:pi elamalelo. Giligal wama pa:pa welamalelo, Bet Aben baigama ege dilamalelo a:pite ege elomina elelona LODope gagile gi kakalaminamalelo.

¹⁶ Islael luma gwana kakaleda: beyagai enoba gwana kalekalenapa bulumakao wai a:na:pi. A:na:pile LOD pa: awapa obai sa:sa:lena tiladana sabama alete welamalale, sip kokowabite sa:lenapa sabala edelina gi a:na:pi.

¹⁷ Ipala:im a ididali gida menagi ewena, oba elatela.

¹⁸ Obaite nida: wi a binidiyana tepala, obaite obebe ewada: gima tumidiyana, obai apeyana dalate pisala a:na:da:mina gi awele iwalediliyana.

¹⁹ Paiwa ganabite obai wama paiwada:minamalelo, a:pite obaimunu sosawena nagala lopala apila gite obai dima pisala egete pa:lamalelo.