Osey 2 - Godope Awananapa Gilala

¹ A:dowali iyanigwala dima la, Ami, na:dowali luma. A:pite a:dowali sasawali dima la, Luyama, na:dowali awe iwaleda:na.

Islael wate sosawe wisa egete gwama sa:leyana gi

² Da:dowali agi anadela, oba anadela Gi ase oba pa: na:dowali susa:gi, Na: pa: obape dalagi. Awapa oba ya:ma dala bilibilinapa tao lotobada: gi obape sosokole wama milamalelo. A:na:pi obape omo saki tepa tepala pa: sogolale ela gi wama elatela gi awapa.

³ Na: obape kaliko dapoma:malowa obate abadu elamalale, A:pite oba kakana lopala bininapa minamalowa obate kowabi tepala eyana kadepala dololoyana gi a:na:pi. Na: oba a:napa wa a:na:pi minamalowa. Na: oba kadepa ila kalekalenapa wa a:na:pi minamalowa A:pite ne oba wi iyawa gabile lapolamalowa.

⁴ Na: na:pe awe iwalela gi obape segedima pa:pa kekeminamalowa gi ase obai dala bilibilinapa susa:gipe sege.

⁵ Obaimunu agite eta:mi dalada waminano obai pisala gile pipiladiyana. Obate layana, na: iwina:mininina dala gwaladamamalowa. Obaite na:pe bayata: wita: napinini, sipi konata: olib oweleta: nida: lopalata: napinamadili.

⁶ Enobala na: obape nabidi tokobe olale kakamunamalowa. Na: kakala bili lapilamalowa obate nabidi pa:pa tila gima.

⁷ Obate oba iwiminina dala datate welamalelo ameta obai pa:pa atida:malelo. Obate obai uwalodolote pa:pa tida:malelo. Amale obate lalamalelo, na: na:dowali dalagidima gwama welamalowa enoba lopenapa gi a:na:pi, gi ase na: obada sa:kelada eloyamana.

⁸ Obate na: pa:pa sa:lele tina:yana, ne konata: waen kanika:ta: a:pite olib oweleta: oba dima apuloyamana gi, a:na:pi silibata: gaolodota: kabigibegale apiladele oba sa:kelaminoyamana, ameta obaite Ba:il ididalidima dapiliyana.

⁹ Enobala na: kon ulama kakalewela wama auwaminamalowa, a:pite na:dowali kanika:napa adami wi sa:lewela. Na: na:pe sip konata: na:pe kalikota: gwama alolamalowa, a:pite oba lopala bininapa elamalelo obape abadu kawapila gima.

¹⁰ Enobala obape pa: awapada:na gi kekema milamalowa oba iwiminetediliyana dalimunu tao luliyabala. Eta lumagite na:pe mai gobala oba pa:pa gwalilamalelo.

¹¹ Na: obape sa:kela tetepa waelabeyagai ekeda:minamalowa, gogo gobana balelada:mina gaogoda:mina gita: obape kanika:da:na samoso gita:, obape sabadi kadepa gita: obape omoniyana tepala gaomina tepata:.

¹² Obape tokobe adamita: lepade adamita: dapolamamalowa. Enobai adami obate iwida:munoyana dalate wisa gima oba dima apiliyana. Na: obai da:niya da:minamalowa, a:pite wa gobana anekekeyapote naenamadili.

¹³ Na: ya:mai kadepa gima oba dima wisa atamalowa, enoba Obate ilale oloda:na sa:lele ipowada:na lopala Ba:il ididalidima apuloyana. Obate obaya obama mai mudita: tulikiyapota: kakamiyana, amale oba iwiminetediliyana dala wapikile gwaladamate weleyana, obate ameta na: gi a kobele ena:yana. LOD enoba gi lalelo.

¹⁴ Enobala na: oba giminamalowa, na: oba a:napa wama lopama:te welamalowa a:pite oba dima nagalale mamana:mina gilala ladolamalowa.

¹⁵ Amale na: obape ga:lip tokobe adami egada gwama apulamalowa, a:pite na: amale Ako golo goba enamada:le atolamina ogosa minamalowa. A:ma enoba wala obate dili gwaledolamalelo, obate apela kanika: tepala eloyana gi a:na:pi. Enoba obate Isipt wale wama saoyana kadepa a:na:pi.

¹⁶ LODote lalelo, ya:ma kadepala, a: na: pa:pa awana:minamalelo, a: na:dowali dalagi. Ameta a: lalamalelo, na:pe apeyanapa.

¹⁷ Na: Ba:il ididalimunu gagi omona: gi obape magata pile wama galaminamalowa. Obaimunu gagi pa:pa gwama domonamalelo, amowa gima.

¹⁸ A:ma kadepala na: obaida gi kakalaminamalowa, wa gobala edelina anekekeyapota: a:pite sidile puwida:midilina puwida:ta: a:ile wamidilina anekekeyapota:. Na: gagita: soba ta: gwama giwa:la gita: ya:ma wala ekeminamalowa, obaite ala gobala dowatelamada:le.

¹⁹ Na: a:da gimalada: gile elomina tepala elamalowa. Na: sogola gita: gibalama gi bamina gita: gobale a:da gimalada: elamalowa, gwama awe iwalela nagala gita:le.

²⁰ Na: a: menagi dima gimala:da elamalowa, a:pite a: LOD gi itawa bapi elamalelo.

²¹ A:ma kadepala na: gilala wisa elamalowa, LOD enoba gi lalelo. Na: sawisakanapimunu gilala wisa elamalowa, a:pite obaite a:ibaigama gilala wisa eda:madili,

²² a:pite a:ibaigate kona taope gilala gima, gima kamida:madili adami wi kanika:ta: a:pite oweleta:. A:pite obaite Yeseleledima gima kamida:madili.

²³ Na: gima na: oba a:ma a:ima toda:malowa. Na:pe awe iwalela kekeminamalowa ne Lo-Luyama lumagige layamana lumagidima, A:pite ne Lo-Ami gagi omona:yamana lumadima na: lalamalowa da: na:pe luma A:pite obaite lalamadili, a: enoba sa:dowali God.