Osey 12 - Godope Awananapa Gilala

¹ Ipala:im obate gwana ila gi pa:pa itawa elelo, laoda: nanoyana lumagi a:na:pi. Obate ibasegela asemite a:ma kadepa lewabegale laoda: gwalama:te welelelo. A:pite obate sewata gita: luma dapola gita: begada:mineno. Oba Asiliyana lumada gi menagi da:mineno. A:pite obate Olib sape mamena auwamineno Isipt wama.

² LODote Yudape gi baminamalelo, oba Ya:ikob dima wisa atamalelo obape sosawenapa ela gima. Obate obape sosawe a:na:mina gima oba dima wisa atamalelo.

³ Obate agipe gwana gobala dolate obape kakape a:i gasima kalekalele gwaliyana, a:pite oba dalagi tepama saote Gododa lapitadoloyana.

⁴ Obate pa:li lumagida lapitada:dele oba gwalite miditiyana. Obate adimada:dele Godope amowa gima otidoloyana. Obate Betel baigale oba tilite a:pite amale obada gwalemonoyana.

⁵ LOD God Kamalinapa, LOD enoba obape gibalama gagi bapi.

⁶ Ameta da: gwama da:pe God dima eseda:te na:da:la, awe iwalela gita: gibalama gi bamina gita:le kakalele litatala, a:pite tepa waelabegale da:pe Godope gilala atolominamadelewa.

⁷ Lopala ewadolona lumagite sewatanapa awapaminale luma gasuda:mineno, obate ilile lopala alela gi begale iwaleda:lo.

⁸ Ipala:imite obaya oba awaga gile lalelo. Na: ya:biya:bi kabigibeyagai, na: lopala waelanapa lumagi eyamana. Na:dowali lopala waelabeyagai gobala eta, pa: awapanapa gita: sosawe gita: pa:pa tida:madili.

⁹ Na: enoba da:dowali LOD God, enobate Isipt wa gobale da: alete wama saoyamana. Na: da: gwama bikiwa gobala eda:na luma da:minamalowa, de awanana domoda:na tetepala gaomite sa:keladeleyamana gi a:na:pi.

¹⁰ Na: gigiwina dala dima gwalemonoyamana, na: obai dima inigwile gi tida: gi waelabeyagai dapuluyamana, a:pite gulili gilala obaile gwalemonoyamana.

¹¹ Giliyad sosawe bapinapa, Obape luma enobai sosawena. Giligal wala obai dala ka:o awanana nagala lopala da:minetedili. Obaimunu balalelamina awanana ba:kele gegenama enobai ba:kele tilida:mina a:na:pi eda:madili, a pasaminanapa a:ile dowatelamadili.

¹² Ya:ikobote Alama wama emote weleyana, Islael obate oko a:na:munoyana susa:gi gwalila gima, a:pite a:ma susa:gi wisa gima obate sip wai iwa:la eloyana.

¹³ Isipt wala LODote gigiwinapa dalagile Islael gwalite saoyana. A:pite gigiwinapa dalagile obate Islael sa:lele iwa:la eloyana.

¹⁴ Ameta Ipala:imite sokamanapa a:na:mina gile obape ga:o a dima:yana, obate dede samina gima wisa egelamalelo. A:pite Lodote oba dima alikikimina wisa atamalelo obape sosawe gima, obate Lododima pisala atayana gima.