Osey 11 - Godope Awananapa Gilala

LODope awe iwalela gi Islael lumadima

¹ Islael kowabi pulagi eloyana tepala na: oba sa:lele tiloyamana, a:pite na: na:pe pulagi awamiyamana Isipt wa gobala wama saolamalale.

² Na: Islael awaminaleyamala, obai ameta a:ma mamamida:te gile wama na:diyana. Obaite Ba:il dima dapoda:na nagala lopalale balelada:minete diliyana, a:pite obaite sa:sa:lena ipowada:na lopala ididali dima olelete diliyana.

³ Na: Ipala:im a:i saowamina gi itumiyamana, obai maima alete weloyamana, ameta obai a:ma gi pa:pa itawa ediyana, Ne obai sa:leda:munoyamana.

⁴ Na:pe awe iwalelale obai alete pa:loyamana, na: awe iwalela taole obai a:gegeda:yamana. Obaimunu madale ne menenapa i wama egedamayamana, a:pite obai dima golote obai baya dapuloyamana.

⁵ Obai Isipt wama gwama na:da:madili a:pite Asiliyate gwama obai apeyanapa elamalelo, gi ase obai pa:pa iwiminini obaimunu sosawele wama esa:da: gima.

⁶ Giwa:la gilite obaimunu kabigida:na baiga gogobale pa:ipilamadili, obaimunu baiga oogosa ka:ka:mminete, a:pite obaimunu bata gi waelabeyagimunu a:yatada: alilamadili.

⁷ Na:dowali lumate iwiminili na:le wama esa:da: gima. Enoba a:na:pi obaite Sidinapa dima timo eda:dele mamamida:te midili, obate eta nabidi bini bapi obai pakada:mina gima.

⁸ O, Ipala:im, na: a: ilapala ela gima pa: awapa. O Isalalel, na: pa: awapa eta:mi lumadima a: elatela gima, Ne Adma dima a:na:miyamana gi a: dima a:na:mina gi pa: awapa. Ne Seleboim dima a:na:miyamana gi a: dima a:na:mina gi pa: awapa. Na:dowali alipo a na: gobala opa:ya eyana, a:pite na:dowali kabiginapa awe iwalela gi a: dima a sidima diwina.

⁹ Na: na:dowali kamalinapa ga:o gi pa:pa a:na:minamalowa, gwama na: Ipala:im wa pa:pa gwama esa:te tilite lapolamalowa. Ase na: God, na: pa: lumagi, enoba Awananapa lumagi da: gobala. Na: pa:pa ga:o gida pa:lamalowa

¹⁰ Obaite LOD gwalama:madili, obate layon a:na:pi ulupodolo, Obate ulupodolamamalelona tepala obape segete emoda:dele sasiwoda:da pa:da:madili kadepate siliminanona palala.

¹¹ Obaite emoda pa:da:madii, Isipt wana puwida: a:na:pi, Asiliyana tulugugu puwida: a:na:pi. Na: obai obaimunu baiga ya:bima atilida:minamalowa. LODote lalelo.

Islaelpe soswe

¹² Ipala:im obate sewata gile na: gwanamana:miyana, Islaelpe genama obate gasumitada: gile sosawemiyana. A:pite Yuda oba Godope gi asakaminano, gwama obate Gibalama Awananapa dima baola gi bini elelo.