Osey 1 - Godope Awananapa Gilala

¹ Ma:ma enoba LODope gilalate Ausiya dima pa:yana. Ausiya enoba Bilipe mata. Ya:ma tepala kakanaba edeliyana Ausiya ta: Yotayam ta: Ayasa ta: Esekaya ta:. Obaite Yuda wa apeyana edeliyana, gwama Yelebowam Yeyowase pe mata Islael wala kanaba eloyana.

Ausiya pe sege ta: susa:gi ta: gi

² LODote Ausiyale gwalema: gi asemiyana. LODote oba dima a:negelayana, a: wete a:ya a: dima ya:ma dala bilibilinapa susa:gi gwali. A:pite enoba obape sosawena segeda. Gi ase ma:ma wala pa: sogolanapa dala bilibili gite tawalola a:pite lumate LODole wama na:dili.

³ Amale obate Goma gwaliyana, Dibalaimipe aminagi. Amale obate gwana ete dalagi pulagi amiyana.

⁴ A:pite LODote Ausiya dima a:negelayana, oba dima Yeselel gagi omona: gi ase tepa auwapula elelo na: obape iniwa kabeya Yeu Yeselel golo gobala luma dapoloyana gile na: ameta Islael wanapa kanaba gi a:yata milamalowa.

⁵ Enoba Yeselel golo gobala na: Islael pe giwa:la gagi ka:ka:munamalowa.

⁶ Goma gwama gwana ete a:pite susa:gi pulagi amiyana. Amale LODote Ausiya dima a:negelayana, oba dima Lo-Luyama, gagi omona: gi ase na: Islael lumadima awe iwalela gi pa:pa gwama kekeminamalowa, a:pite na: obaimunu sosawe gi pa:pa saoda:munote kobele eda:malowa.

⁷ Na: ameta Yuda wana lumadima awe iwalela gi kekeminamalowa. Na: enoba obaimunu LOD God, obaimunu galabe ne pawada:munamalowa, pa: giwa:la gile. Pa: gagita: pa: giwa:la gili waisota: pa: osota: gwama osole wamidilina dalata:le. Awa.

⁸ Amale Gomate obape suwakowabi Lo-Luyama omo awana eyana tepala obate gwama gwana ete, eta dalagi pulagi amiyana.

⁹ A:pite LODote Ausiya dima a:negelayana, oba dima Lo-Ami, gagi omona: gi ase da: pa: na:pe luma, a:pite na: pa: da:pe God.

¹⁰ Ameta Islaelana lumate ipana sasasa a:na:pi eda:madili domona gi pa: awapa. Pa: na:pe luma gilalate dololoyana sabale obaite elelona LODope sekowabi edelamadili.

¹¹ Yuda wana lumata: Islael wana lumata: obaite gwama menagiminamadili. Obaite menagi kanaba dalagi pakaminamadili a:pite obaite ya:ma wa gobale wama saoda:madili, gi ase Yeselelepe kadepate kabiginapa kadepa elamalelo.