Nayu 3 - Godope Awananapa Gilala

Ninebape sosawe wisa gi

¹ Ya:ma kabiginapa baiga titimite sosaweminamadili, lumumunu dede tawa bega, sewata gi tawabega, ilile aleliyana lopala gi tawabega, a:ma wa gobana sa:sa:lena lopala waelabeyagai ameta, amale lumate ilile alela gi pa:pa ekeminamadili.

² Osope tao pa:pa:te gwaledelilina siya enama, giwa:la gawape wilite gwaledili, osomunu gugula: siyate gwalelalo, sakana giwa:la gawate sikasika edelina siya enama.

³ Osole mitatilina giwa:lana dalate obaimunu osole giwa:lama sela na:da: bega edeli. Giwala gili waisota: gili kibilita: kadepate tuda:lo. Obaite luma waelabeyagai dapolili, kaokoda:na luma tilida:mina beyagai ameta obebe domona pa: awapa, lumate enobai obebele a:i gagaminini,

⁴ ma:ma gite saowena gi ase oba dala bibilinapa susa:gi a:na:pi iyawa kabigibega eloyana, a:lowa kabigibega, wasiwa gi a:na:da:mina kamalibega, obape iyawa gile luma aleloyana, obape wasiwa gile luma dibulama aliloyana.

⁵ LOD Kamalinapate a:negelalelo, Niniba na: a: dima wisa atamalowa. A:dowali matiya na: pakima:te a:dowali sosoko kawapima:malowa. A:e abadu elelona gi na: baigabaiga waelabega ituda:minamalowa, obaite a: e pisala elelona gi tilamadili.

⁶ Na: gwale a: kawapilamalowa, ne a: pisalaminamalowa, a:pite lumate a: tilite iyaminamadili.

⁷ A: tilamadilina lumate a: elatete wama guguladele a:negelalamadili, Nineba kabiginapa baiga a titimiwina, powate oba gwanasaweda: elamaloya. A: balelaminamalale lumagi miyale tilamalowaya.

⁸ Niniba a: pa: Tebes baigape sogola a:na:pi, Na:il wasewa gegedanapa baiga, wite a: gwanamamite dololo. A:ma Na:il wasewate obape a:wa saba elelo, a:pite wite obape ta elelo.

⁹ Itiyopiya wa enoba obape kamali sokate eloyana, Isipt iya:ta: enoba a:na:pi elamalelo a:yata bini. Put lumata: Libiya lumata: enobai oba amowana edeliyana.

¹⁰ Ameta giwa:lanate oba taole papamite dibulama gwalite na:diyana. Obai obape sekowabi nabidi atakawa tepala dapoladele alisasi ta:temina ediyana. Obai gititiwa gi a:na:mite kanabape okona dala alelete a:pite obape kabigida:na dala auli taole papada:miniyana.

¹¹ Nineba, a: obaida dalagile sika nidolote daledale elamalelo, a: a:dowali giwa:lanapate a: lapola gile emo saba uwalolamalelo.

¹² A:dowali tale gwanamada:mida:na kabiginapa baiga waelabeyagai mukusada:na kipa adami a:na:pi, a:pite nananapate adami i susumiwela adami obape magata gobama nisisilamadili.

¹³ A:dowali giwa:lana dala tido, obai waelabeyagai enoba ato a:na:pi edeli. Giwa:lanate sa:eda:mada:le a:dowali baiga ta ogosa waelabeyagai gaegelete dowatili, ogosa kakamina i a ilate oloda:yana.

¹⁴ Giwa:lanate a: gwanamaminini enobala a: nida: wi a:itu, baiga ta kakala:mi. A: masikamata: ba:keleta: sa:leda:mite ta gwama a:na:mi.

¹⁵ Ilate a:mala a: ololamalelo, giwa:la gili waisote a: ta:minamalelo sa:sa: a:na:pi lapote naonamalelo. A:pite sa:sa: a:na:pi waeda:la, tagada: a:na:pi waeda:la.

¹⁶ A: a:dowali ewada: saba apeyana naba a sidima pakamiwina, obai a waeda:te kadepa sidina ibina a:na:pi ediwina, sa:sa: a:na:pi obai pa:da:te a:ile apedilina lopala waelabeyagai nanale nanete wama puwida:te na:da:madili.

¹⁷ A:dowali lawilana dalata: tagada: a:na:pi kabigida:na dala enobai tagada: gagasida: a:na:pi, ga:ga: tepala obai baiga tama mitatelete edili, a:pite kadepa saowela obaite puwida:te na:da:madilina saba gi luma pa: itawada:.

¹⁸ Asiliya wanapa kanaba, a:dowali sip tida:na dala tenedili, a:dowali kabigida:na dala teneda:mada:le a dowatiwina. A:dowali luma giwa:lanate saka sidima datate na:diwina, obai gwama alete pa:la lumagi bini.

¹⁹ A:dowali apapaya gwama sa:lemina lumagi bini, a: enoba apapayale kaolamalelo. E dilamalelona gi enamada:madilina luma waelabeyagai mai pupuda:minamadili, gi ase obai itawada: e a:na:da:munoyana sosawena gi.