Nayu 2 - Godope Awananapa Gilala

Nineba titiminamadilina gi

¹ Nineba a: dima giwa:lanapa a pa:we a: dima giwa:la elamalale. Ta lapida:na baiga sa:lele iwa:la edela, nabidi tepala lawiladele edela, giwa:la genamama dida:la, sa:leda:te kamalile litatala.

² LODote Ya:kobipe lulila gwama pakiminamalelo, enoba Islaelpe lulila a:na:pi, giwa:lanate obai a dapolete binida:miyana a:pite obaimunu tokobe adami a dapodamiyana.

³ Obape giwa:lana dalimunu ikewa a wasawasa bega edewina, obai wasawasana lopala a kakamiwina. Obai obaimunu giwa:la gawa a sa:leda:miwina enobala auli pa:kepa:kebega elelo. Obai giwa:la gima sa:ledili, obaimunu sakana giwa:la gawate kadepa pa:ela a:na:pi pa:ipilili. Obaimunu oso waelabeyagaite sikasika edeli.

⁴ Giwa:la gawate baiga nabidile sa:eda:te sela na:da:bega edeli, obai kabiginapa baiga gobana ekawile pa:na:dili. Obai taose waiki lulila a:na:pi a:pite kadepate pa:ela a:na:pi wamidili.

⁵ Oba obape kakamalina giwa:lana dala alelalo, obaite pa:da:dele a:i gagaminete nisisilili. Obai kabiginapa baiga tama gugula:te na:da:te kabigida:na ikewa pakakaminini.

⁶ Giwa:lanate wi kamina ogosa gamiwila kanaba dalagipe genamana sasiwadili.

⁷ Giwa:lanate kanabape susa:gi wama gwalite na:da:madili. Obape gisaolana amina tulugugu puwida: a:na:pi adimada:dele gwanasaweda:le obaimunu omo dapolamadili.

⁸ Nineba enoba ka:elanapa wi pisa a:na:pi. Nineba baigala lumate wama saodili, obaite mamidili, litatala, ege na:da:la, ameta etate pa:pa gwama isola:te pa:lelo.

⁹ Siliba alela. Gaolod alela. Baiga gobala sa:sa:lena lopala waelabeyagaite tatawate dowatili.

¹⁰ Nineba a giwa:lanate a titiminale titimiwina, luma pa:pa edeli. Luma mada kaela eda:dele emodili, obaimunu asimisi a bonogowadilila, kamali a binidiwina. Obaimunu sosoko iya:ta: a mala dapuwi.

¹¹ Dololoyana layonope genama ba:maya, layon susa:gite obape kokowabi omo dapuloyana saba, dalagi layonota: a:pite susa:gi layonota:te na:tiliyana saba, a:mala obaimunu kokowabite galabe gi bini sa:lele edeliyana.

¹² Layon dalaginapate nana lopala lapote, amale posole ta:tamunoyana obape susa:gita: kokowabita:te naenamada:le. Obate eloyana a:idoba obate dapoloyana lopalale tawamiyana obape ela saba obate dapoloyana sepo ta:teda:le tawamiyana.

¹³ Na: a: asakaminanowa, Kamalinapa LODote lalelo. A:dowali sakana giwa:la gawa ilale oloda:malowa, a:pite a:dowali apeda: kanika:da:na layon giwa:la gilite dapolamalelo. A:ibaigala na: a: dima eta nana lopala pa:pa elatelamalowa. Lumate a:dowali gibabana dalimunu gilala pa:pa gwama enamada:madili.